ىلە قازاق اۆتونوميالى وبلىسىنىڭ 17 –رەتكى اقىندار ايتىسى، مادەنيەت -ساياحات مەرەكەسى شيحۋدا باستالدى

2013.06.18 11:28   كەلۋ قاينارى : حالىق تورابى

　　«ىلە كەشى» گازەتىنىڭ ءتىلشىسى ناعيما قۋاتقان قىزى حابارلايدى. ىلە قازاق اۆتونوميالى وبلىستىق حالىق ۇكىمەتىنىڭ ۇيىمداستىرۋىمەن تارباعاتاي ايماعى ۇستىنە الىپ، شيحۋ قالاسى وتكىزگەن ىلە قازاق اۆتونوميالى وبلىسىنىڭ 17 - رەتكى اقىندار ايتىسى، مادەنيەت- ساياحات مەرەكەسى ماۋسىمنىڭ 16 – كۇنى تاڭەرتەڭ «سىرا مەكەنى» اتالعان كورىكتى شيحۋ قالاسىنىڭ جاڭا قالا الاڭىندا باستالدى. مەرەكەنىڭ باستالۋ سالتىن وبلىستىڭ ورىنباسار باستىعى مۇقيات جارمۇقانبەت ۇلى باسقاردى. وبلىس باسشىلارىنان مانەن زەينەل ۇلى، زۇنۇن اكبار قاتارلىلار مەرەكەنىڭ باستالۋ سالتىنا قاتىناستى.

　　ەلىمىزدىڭ جەر - جەرىنەن كەلگەن ساياحاتشىلار مەن شيحۋ قالاسى تۇرعىندارى مارە-سارە بولىپ جىر تويىنىڭ سالتاناتتى اشىلۋ سالتى وتەتىن جاڭا قالا الاڭىنا جينالدى. باستالۋ سالتىنىڭ شىمىلدىعى اقىندار ايتىسىنىڭ اۆتونوميالى رايون دارەجەلى مۇراگەرى، تارلان اقىن جامالقان قاراباتىر قىزىنىڭ اقىندار ايتىسى تۋىن كوتەرىپ جەڭىل اۆتوكولىكپەن شارشى توپتان ءوتىپ، جۇرتقا قۇرمەت بىلدىرۋىمەن اشىلىپ، قازاقتىڭ تۇيەلى كوشى ءوتتى، سودان كەيىن 100 ادامدىق بيشىلەر شارشى توبى، 100 ادامدىق دومبىراشىلار شارشى توبى، 100 ادامدىق كەستەشىلەر شارشى توبى ونەر كورسەتىپ، شىڭگىل اۋدانىنىڭ 10 مىڭ كىسىلىك قاراجورعا ءبيى، تولى اۋدانىنىڭ 10 مىڭ كىسىلىك دومبىرا شەرتۋ قيمىلى، نىلقى اۋدانىنىڭ 10 مىڭ كىسىلىك قىزاي كەستەسىن تىگۋى، ءدوربىلجىن اۋدانىنىڭ مىڭ مەترلىك قازى جاساۋى سياقتى گەنيس رەكوردىن جاراتىپ (جاڭالاپ)، قازاقتىڭ ءداستۇرلى ونەرىن ايگىلەگەن سالتاناتتى ساتتەر جۇرتقا قايتالاي ەلەستەتىلدى. قيمىلدا ءدۇبىرلى تويعا ارناپ سويىلاتىن كوك قاسقا تايعا، اق سارباس قويعا باتا جاسالىپ، اق شىلاۋىشتى اجەلەر توي قۋانىشىنىڭ اق شاشۋىن شاشتى.

　　قيمىلدىڭ باستالۋ سالتىندا وبلىستىق پارتكومنىڭ ورىنباسار شۋجيى، وبلىس باستىعى مانەن زەينەل ۇلى ماڭىزدى ءسوز سويلەدى. ول بىلاي دەدى: بۇل رەتكى اقىندار ايتىسى ورتالىقتىڭ شينجياڭ قىزمەتى اڭگىمە ءماجىلىسى اشىلعانىنا ءۇش جىل بولعان ساتتە، بۇكىل شينجياڭداعى ءار ۇلت حالقى پارتيا 18- قۇرىلتايى مەن ج ك پ اۆتونوميالى رايوندىق 8- كەزەكتى قۇرىلتايىنىڭ رۋحىن ۇيرەنىپ، دايەكتىلەندىرىپ، وبلىسىمىزداعى ءار ۇلت حالقى وبلىسىمىزدىڭ قارىشتاپ دامۋى مەن باياندى تىنىشتىعىن جەبەپ، گۇلدەنىپ - كوركەيگەن، باي ، جاراسىمدى ىلە قازاق اۆتونوميالى وبلىسىن قۇرۋ اياق الىسىن جەدەلدەتكەن ساتتە وتكىزىلىپ وتىر. وسى جولعى اقىندار ايتىسى، مادەنيەت -ساياحات مەرەكەسىنىڭ وتكىزىلۋى «جۇڭگو ارمانىن» جان - جاقتى جىرلاپ، ءار ۇلت كادرلارى مەن جۇرتشىلىقتى جۇدىرىقتاي جۇمىلىپ، اۆتونوميالى وبلىسىمىزدىڭ قارىشتاپ دامۋى مەن باياندى تىنىشتىعى ءۇشىن تاماشا جاعداي جاراتۋعا شابىتتاندىرۋدا توتەنشە ماڭىزدى ءمان الادى. وزىق مادەنيەتىمىزگە ۋاكىلدىك ەتەتىن اقىندار ايتىسىنىڭ ساپاسىن جوعارىلاتۋدا «سوتسياليزىم ءۇشىن، حالىق ءۇشىن قىزمەت ەتتىرۋ» جانە «بارلىق گۇل شەشەك اتۋ، جالپى جارىسا ءۇن قاتۋ» باعىتى بويىنشا اقىندار قوسىنىن ساپالىلاندىرىپ، ۇزدىك اقىنداردى تاربيەلەپ، جەتىلدىرىپ شىعۋ ارقىلى وسى تەكتى ونەرىمىزدى ەرتەڭگى ۇرپاققا جالعاستىرۋ ءار دارەجەلى پارتيا، ۇكىمەت ورىندارى مەن قاتىستى تاراۋلاردىڭ بۇلتارماس بورىشى ەكەندىگىن دە تانىپ جەتۋىمىز ابدەن قاجەت.

　　شيحۋ قالىق پارتكومنىڭ ورىنباسار شۋجيى، قالا باستىعى مايسان زاعىپار ۇلى قارسى الۋ سوزىندە بۇل رەتكى قيمىلدىڭ شيحۋ قالاسىندا ءوتۋى شيحۋ قالاسىنىڭ قوعامىنىڭ، ەكونوميكاسىنىڭ دامۋىنا تۇرتكىلىك رول اتقارۋمەن بىرگە، شيحۋ قالاسىنىڭ تابىستارىن ۇگىتتەۋگە جەبەۋشى بولاتىندىعىن تىلگە تيەك ەتىپ، قوناقتاردىڭ وسى رەتكى قيمىلعا قاتىناسقاندىعىنا العىس ايتتى.

　　ۇعىسۋىمىزشا، بۇل رەتكى ونەر مەرەكەسى 18 - ماۋسىمعا دەيىن جالعاسادى ەكەن، قيمىلدا اقىندار ايتىسى ارقاۋ ەتىلىپ، ات بايگەسى، قازاقشا كۇرەس، تەڭگە ءىلۋ، قىز قۋار، كوكبار، بۇقا تارتىس، دويبى جارىسى، كيىز ءۇي باعالاۋ، قازاقى قولونەر بۇيىمدارى كورمەسى، اس-سۋ جارمەنكەسى سياقتى باي مازمۇندى مادەنيەت، دەنەتاربيە قيمىلدارى وتكىزىلىپ، جۇرت تىلەگى قاناعاتتاندىرىلادى ەكەن.

　　كەلۋ قاينارى: حالىق تورابى