ىلە وبلىسىنىڭ 17 - رەتكى اقىندار ايتىسى، مادەنيەت، ساياحات مەرەكەسى تابىستى اياقتادى

2013.06.19 08:00   كەلۋ قاينارى : حالىق تورابى

ەرەكشە سيلىق يەگەرى

　　«ىلە كەشى» گازەتىنىڭ ءتىلشىسى ناعيما قۋاتقان قىزى حابارلايدى. 3 كۇنگە جالعاسقان ىلە قازاق اۆتونوميالى وبلىسىنىڭ 17 - رەتكى اقىندار ايتىسى، مادەنيەت، ساياحات مەرەكەسى بارلىق كۇنتارتىبىن تابىستى ورىنداپ، ماۋسىمنىڭ 18 - كۇنى تۇستەن كەيىن تارلان تارباعاتايدىڭ شيحۋ قالاسىندا ءساتتى اياقتادى.

　　بۇل رەتكى قيمىلداعى بەيزاتتىق مۇرامىز اقىندار ايتىسىنىڭ كوكجيەگىن كەڭەيتىپ، مازمۇنىن بايىتۋعا قۇلشىنعان اقىندار ايتىس ونەرىنىڭ اسپانىنا قانات قاققان قىرانداي سامعادى. وزگەشە ونەرىمىز تەرمەنىڭ ءداستۇرلى ەرەكشەلىگىن ساۋلەلەندىرگەن جەز تاڭداي، بۇلبۇل كومەي تەرمەشىلەر، ون ساۋساعىنان ونەر تامعان ادۋىن كۇيشىلەر، الپىس ەكى تامىردى بالقىتاتىن قوبىزشىلار، جاراسىمدى ۇلتتىق ۇلگىدەگى كيىم جوبالاۋ شەبەرلەرى ءوز ونەرلەرىن ايگىلەپ، ءار ۇلت كورەرمەندەرىن تاڭداي قاقتىرا تامساندىردى. سونداي - اق قازاقتىڭ كيىز ۇيلەرى باعالانۋمەن بىرگە، ۇلتتىق قولونەر كورمەسى اشىلىپ، مەرەكەنىڭ مەرەيىن اسىردى. بۇدان تىس شيحۋ ساحاراسىندا ات ءۇستى سپورت ويىندارىنان بايگە، تەڭگە ءىلۋ، قىزقۋار سياقتىلار دابىرالى وتكىزىلدى. اقىندار ايتىسىنا ىلە وبلىسىنا توتە قاراستى ورىنداردان، التاي، تارباعاتاي ايماقتارىنان سارالانعان 36 اقىن قاتىناسىپ، ولار دىڭ شياۋپيڭ نازارياسىن، «ۇشكە ۋاكىلدىك ەتۋ» ماڭىزدى يدەياسىن جەتەكشى ەتىپ، عىلمي دامۋ كوزقاراسى مەن «جۇڭگو ارمانىن» جۇزەگە اسىرۋ جانە جاراسىمدى قوعام قۇرۋدى، سونداي - اق پارتيانىڭ ابزال ساياساتى مەن حالىق بۇقاراسىنىڭ باي - باقىتتى تۇرمىسىن جىرلاپ، قوعامداعى كەلەڭسىز جايتتەردى شەنەپ، كورەرمەندەردىڭ القاۋىنا بولەندى. بۇل رەتكى ايتىستى 3 كۇندە 50 مىڭنان استام كورەرمەن تاماشالادى.

　　اقىندار ايتىسىندا ءادىلعازىلاردىڭ ءادىل، جاريا باعالاۋى ناتيجەسىندە التاي اقىنى جاميعا داۋلەت قىزى ەرەكشە سيلىقتى، ىلە اقىنى ەرلان امانقوجا ۇلى، التاي اقىنى قاناتبەك زايتوللا ۇلى جانە تارباعاتاي اقىنى انار بەدەلقان قىزى 1 - دارەجەلى؛ رايقان،ناعىمان، ارزىگۇل، زۋرا، پاتىعالى، ۇلاربەك قاتارلى 6 اقىن 2 - دارەجەلى؛ ەربولات، جانار، عازيزا، جارقىنبەك، گۇلسىناي، ءدينا، ەرسىن، مەيىرجان قاتارلى 8 اقىن 3 - دارەجەلى سيلىقتاردى الدى. ەرەكشە سيلىققا 12 مىڭ يۋان، 1 - دارەجەلى سيلىققا 10 مىڭ يۋان، 2 - دارەجەلى سيلىققا 8 مىڭ يۋان، 3 - دارەجەلى سيلىققا 6 مىڭ يۋان اقشا بەرىلدى. تەرمە ايتۋ جارىسىندا تىلەۋقابىل سارسەنبەك ۇلى 1 - دارەجەلى، جازيرا سارقىتبەك قىزى، گۇلزينات ماعاۋيا قىزى 2 - دارەجەلى؛ باقىتنۇر ءىلياس قىزى، قايرات سەيىلقان قىزى، باقىتبەك جۇسىپبەك ۇلى قاتارلى تەرمەشىلەر 3 - دارەجەلى سيلىقتى الدى. دومبىرا شەرتۋ جارىسىندا قادىل بەيىسقان ۇلى 1 - دارەجەلى؛ ەرلان ىسقاق ۇلى، راقيلا مىرزابەك قىزى 2- دارەجەلى سيلىق الدى. قوبىز تارتۋ باسەكەسىندە ارشىن باقىت قىزى 1 - دارەجەلى، داۋلەت بىرلەس ۇلى، ميرا قادىل قىزى 2- دارەجەلى سيلىقتى؛ قيسا - داستان ايتۋدا ەركىن تۇرسىنبەك ۇلى 1 - دارەجەلى؛ مالىك سۇلەيمەن ۇلى، دۇيسەن مۇقاي ۇلى 2 - دارەجەلى سيلىقتاردى الدى. ۇلتتىق كيىم ۇلگىلەرىن كورسەتۋدە زياتقان ايدارقان قىزى 1 - دارەجەلى، ۇلتاي ساكەن قىزى، باقىتقان مانات قىزى 2 - دارەجەلى سيلىق الدى.

　　جابىلۋ سالتىندا تاعى ىلە قازاق اۆتونوميالى وبلىسىنىڭ 18 - رەتكى اقىندار ايتىسى، مادەنيەت، ساياحات مەرەكەسىن وتكىزۋ جونىندەگى قاۋلى وقىلىپ، 2016 - جىلى 18 - رەتكى اقىندار ايتىسى، مادەنيەت، ساياحات مەرەكەسىن وتكىزۋدى ۇستىنە العان التاي ايماعىنا ايتىس تۋى مەن گەربى تاپسىرىلدى. 18 - رەتكى اقىندار ايتىسىنىڭ تۋى مەن گەربىن العان التاي ايماقتىق پارتكومنىڭ مۇشەسى رازبەك قامزا ۇلى 18 - رەتكى اقىندار ايتىسىن ءساتتى وتكىزۋگە سەنىم ءبىلدىردى.

　　ىلە قازاق اۆتونوميالى وبلىسىنىڭ ورىنباسار باستىعى مۇقيات جارمۇقانبەت ۇلى قيمىلدىڭ جابىلۋ ءسوزىن سويلەپ، بۇل رەتكى اقىندار ايتىسىنىڭ بارلىق كۇنتارتىبىنىڭ تابىستى اقتاعانىن تىلگە تيەك ەتىپ، وسى رەتكى قيمىلدى وتكىزۋدى ۇستىنە العان تارباعاتاي ايماعىنا، شيحۋ قالاسىنا راقىمەت ايتتى جانە ۇلتتىق مادەنيەتىمىزدى جانداندىرىپ، دامىتۋعا كۇش سالۋ كەرەكتىگىن اتاپ ءوتتى. قيمىلدىڭ جابىلۋ سالتىن وبلىستىق ۇكىمەتتىڭ ورىنباسار باس حاتشىسى سەرىك ماقات ۇلى باسقاردى. سۋرەتتەردى «ىلە كەشى» گازەتىنىڭ ءتىلشىسى ن. قۋاتقان قىزى تۇسىرگەن

　　(«ىلە كەشى» گازەتىنىڭ 2013 – جىلى ماۋسىمنىڭ 19 – كۇنگى سانىندا جاريالانادى)

　　كەلۋ قاينارى: حالىق تورابى