بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى
حالىق تورابى>>قوعام

قالىقتاپ قانات قاعا بەر «اققۋ»

2013.06.26 16:46   كەلۋ قاينارى : حالىق تورابى



  1-ماۋسىم بالالار مەرەكەسىندە «اققۋ» كومەك تورابى ىلە كولدەنەڭ قالاشىعىنداعى مال شارۋاشىلىق وڭىردەگى باستاۋىش مەكتەپ فۋتبول كومانداسىنا كوماندا كيىمىن سيلادى.

  حالىق تورابى قازاقشا ارناسىنىڭ بەيجيڭنەن بەرگەن حابارى. جۋىردا «ءىنجۋ» ەسىمدى ءسابيدىڭ اك سۋىن جۇتىپ الىپ، وڭەشى كۇيىپ ەمحانادا ەمدەلىپ جاتقانى تۋرالى حابار عالامتوردا تارالعاننان كەيىن، بۇل حابار ەستىگەن جاننىڭ قابىرعاسىن قايىستىرىپ، كوپ بولىپ ءسابيدىڭ تىلەۋىن تىلەپ، «كوپ تۇكىرسە كول بولار» دەپ بارشا جۇرت كومەك قولىن سوزىپ ەدى. سول ءسابي جۇرتتىڭ اق تىلەۋىنىڭ، كوپ كومەگىنىڭ ارقاسىندا بەيجيڭدە ەمدەلىپ، قازىر دەنساۋلىعى قالپىنا كەلىپ، ءتاتتى قىلىقتارىمەن ءتانتى ەتكەن سابيلەرمەن بىرگە ويناۋعا مۇمكىندىك الدى.

  ءسابيدىڭ جاعدايىن ەڭ الدىمەن عالامتورعا جاريالاپ، جۇرتتىڭ نازارىن اۋدارعان «اققۋ» كومەك تورابىنىڭ ەرىكتىلەرى بولاتىن. شالعايدان شىرقىراپ ەم ىزدەپ بەيتانىس قالا ۇرىمجىگە كەلگەن قانداستارىنا جاقىنىنداي جاردەمدەسىپ، ەمحاناداعى بارلىق ىستەرىنىڭ باسى قاسىندا بولىپ، كۇندىز-ءتۇنى كەزەكتەسىپ كۇتىپ، زىر جۇگىرگەن بوز بالالار مەن بويجەتكەندەرگە ءسابيدىڭ اتا-اناسى اتىنان العىس. وسى ورايدا ءبىز «اققۋ» كومەك تورابى جايلى ازداپ مالىمەت بەرە كەتۋدى ءجون كوردىك.

  «اققۋ» كومەك تورابىن تۇستىك اۆياتسيا سەرىكتىگىندە ىستەيتىن وركەن مۇباراك ۇلى اتتى ازاماتىمىز 2007-جىلى عالامتور جەلىسىنە قوسقان بولاتىن. سودان بەرى، بار جوعى بەس جىلدىڭ ىشىندە اتالعان توراپ كوزگە كورىنەرلىك ءبىرتالاي ءىس تىندىرعان. قازىر «اققۋ» كومەك تورابىنىڭ تىزىمدەلگەن مۇشەسى 2800 ادامعا جەتىپ، قيمىلدارعا تۇراقتى قاتىناسا الاتىن 80نەن استام ەرىكتى مۇشەسى بار ەكەن. 2012-جىلى شينجياڭ ەرىكتىلەر قوعامى جاعىنان تىكە قاراستى ۇيىم اتىنا يە بولعان. 2013-جىلى تۇڭعىش كەزەكتى شينجياڭ كولەمىندە ايەلدەر مەن بالالارعا ارنالعان قايىر-ساحابات سيلىعىن باعالاۋ قيمىلىندا «مەيىر باعىشتاۋ سيلىعىنا» داڭقپەن يە بولعان.

  «اققۋ» كومەك تورابى وقۋ جاسىنداعى بالالاردى نەگىزگى كومەكتەسۋ وبيەكتىسى ەتىپ، وتباسىندا قيىنشىلىعى بار بالالاردىڭ ۇيرەنۋ جاعدايىنا ايىرىقشا نازار اۋدارىپ، ولاردىڭ ءسابي سانالارىنا بولاشاققا دەگەن ءۇمىت شامىن جاعىپ كەلەدى. اتالعان توراپ 2005-جىلدان بەرى قانات جايدىرعان «جاڭا سومكا، جاڭا ءۇمىت» قيمىلىندا، قازىرگە دەيىن 1531 وقۋشىعا جاڭا سومكا مەن وقۋ-قۇرالدارىن سيلاعان. مۇنان سىرت، «ءادىل» وقۋعا كومەكتەسۋ قيمىلىن قانات جايدىرىپ، بۇكىل ەلدىڭ جەر-جەرىنەن كومەك قولدارىن سوزعان مەيىربان جاندار مەن كومەككە يە بولعان 70 وقۋشىنىڭ اراسىندا دانەكەرلىك رول وينادى. «ءبىر مەكتەپ، ءبىر كىتاپحانا» قيمىلىندا ولار اۋىل-قىستاقتارداعى شارت-جاعدايى ناشار مەكتەپتەرگە شاعىن كىتاپحانالار قۇرىپ بەرىپ، وقۋشىلاردىڭ ءبىلىم كاۋسارىنان سۋسىنداۋىنا وراي جاراتتى. قاراجات ماسەلەسىنەن قابىرعاسى قايىسىپ، تىلدەن قينالعان تالاي اۋرۋ-سىرقاۋدىڭ كوڭىلىنە مەدەۋ بولىپ، قينالعاندا كومەك قولدارىن سوزدى. سونىڭ ءبىرى رەتىندە، ءىنجۋ اتتى ءسابيدىڭ بەيجيڭگە بارىپ ەمدەلۋىنە اتالعان سايت 250 مىڭ يۋان جىلۋ قاراجات توپتاپ بەردى ءارى ەرىكتىلەر ءىنجۋدى ەمدەتۋ بارىسىندا باستان-اقىر كومەكتەستى. ايتا بەرسەك، «اققۋ» كومەك تورابى تىندىرعان وسىنداي ىزگى ىستەر تولىپ جاتىر. وقىرمانداردىڭ «اققۋ» كومەك تورابىنا كىرىپ، قاتىستى مالىمەتتەردى ەگجەي-تەگجەيلى ۇعىسۋىنا بولادى.

  سابيلەر ءبىزدىڭ بولاشاعىمىز، بالانىڭ كىرشىكسىز كوڭىلى سەزىمتال كەلەدى، بالا كۇنىندە سەزىنگەن مەيىر-شاپاعات ولاردىڭ تۇتاس ومىرىنە تەرەڭ اسەر ەتەدى، وسى تۇرعىدان الىپ ايتقاندا، «اققۋ» كومەك تورابى ۇلتتىڭ بولاشاعىنا ساياتىن يگى ىستەرمەن شۇعىلدانۋدا دەپ ايتۋىمىزعا ابدەن بولادى. ءبىز «اققۋ» كومەك تورابىنىڭ الداعى ىستەرىنە ساتتىلىك تىلەپ، قوسىندارىڭ ۇلعايا بەرسىن، ءتىپتى دە كوپ بالالار قوعامنىڭ مەيىر-شاپاعاتىن سەزىنەتىن بولسىن دەگىمىز كەلەدى. (سۋرەتتەر «اققۋ» كومەك تورابىنان الىندى)

  كەلۋ قاينارى: حالىق تورابى

【1】 【2】 【3】 【4】 
جاۋاپتى رەداكتورى : نۇرعيسا قۇرمانجان ۇلى

 سۋرەت