بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

اپتا ارقاۋى: قازاقستان ەلباسى جايلى جازىلعان كىتاپتىڭ تۇساۋ كەسەرى وتكىزىلدى

2013.10.25 16:05  



  حالىق تورابى قازاقشا ارناسىنىڭ 25-قازاندا بەيجيڭنەن بەرگەن حابارى. قازاقستان رەسپۋبليكاسى پرەزيدەنت كەڭسەسىنىڭ باستىعى، ساياسات عىلىمىنىڭ دوكتورى، پروفەسسور ماحمۇت بازارقۇل ۇلى قاسىمبەكوۆتىڭ «ەلىن سۇيگەن، ەلى سۇيگەن ەلباسى ــ قازاقستان رەسپۋبليكاسى پرەزيدەنتى تۋرالى وچەرىكتەر» اتتى كىتابىنىڭ حانزۋشا باسىلىمىنىڭ تۇساۋ كەسەرى 25-قازاندا بەيجيڭدەگى جۇڭگو حالىق شەتەلدەرمەن دوستىق قوعامىنىڭ زالىندا وتكىزىلدى.

  تۇساۋ كەسەر سالتىن جۇڭگو حالىق شەتەلدەرمەن دوستىق قوعامى مەن قازاقستان رەسپۋبليكاسىنىڭ جۇڭگودا تۇراتىن باس ەلشىلىگى بىرلىكتە ۇيىمداستىرعان. كىتاپتىڭ حانزۋ وقىرماندارىمەن جۇزدەسۋىنە قازاقستانداعى نازاربايەۆ ورتالىعى مەن بەيجيڭدەگى ۇلتتار باسپاسى كوپ ەڭبەك ەتتى. كىتاپتىڭ اۆتورى قاسىمبەكوۆ باستاعان ۇيىرمە قازاقستاننان ارنايى ات شالدىرىپ بەيجيڭگە كەلىپ سالتقا قاتىناستى. جۇڭگونىڭ قازاقستاندا تۇرعان بۇرىنعى باس ەلشىسى جوۋ شياۋپەي، قازاقستان رەسپۋبليكاسىنىڭ جۇڭگودا تۇراتىن باس ەلشىسى ەرمەكبايەۆ جانە رەسەي، ازەربايجان، قىرعىزستان، مولدوۆا، ۋكراينا، وزبەكستان قاتارلى ەلدەردىڭ جۇڭگودا تۇراتىن باس ەلشىلەرى، سونداي-اق شاڭحاي سەلبەستىك ۇيىمى باس حاتشىسىنىڭ ورىنباسارى قاتارلى قۇرمەتتى قوناقتار دا تۇساۋ كەسەر سالتىنا قاتىناستى. قاتىستى باسشىلار مەن قوناقتار سوزگە شىعىپ، اتالعان كىتاپتىڭ ءمانى مەن ماڭىزدى تۋرالى بايانداپ، قازاقستان پرەزيدەنتى نازاربايەۆتىڭ ەڭبەكتەرى تۋرالى جوعارى باعا بەردى.

  «ەلىن سۇيگەن، ەلى سۇيگەن ەلباسى ــ قازاقستان رەسپۋبليكاسى پرەزيدەنتى تۋرالى وچەرىكتەر» اتتى كىتاپ 2008-جىلى ەڭ العاش قازاق تىلىندە جارىق كورگەننەن كەيىن، ورىس تىلىندە ەكى رەت باسىلىپ شىققان، كەيىن تۇرىك تىلىندەگى تۇساۋ كەسەرى دە ستامبولدا وتكىزىلگەن. كىتاپتىڭ اۆتورى قاسىمبەكوۆ تۇساۋ كەسەر سالتىندا ءسوز العاندا بۇل كىتابىنىڭ حانزۋ وقىرماندارىمەن جۇزدەسكەنىنە ايىرىقشا قۋاناتىنىن ءبىلدىرىپ، وسى جۇمىستىڭ باسى-قاسىندا بولىپ تەر توككەن بارلىق ازاماتتارعا العىسىن جەتكىزدى.

  تاريحي-پۋبليستيكالىق بايانداۋ جانرىندا جازىلعان وچەركتەر جيناعىندا قازاقستان رەسپۋبليكاسىنىڭ تۇڭعىش پرەزيدەنتى ن. ا. نازاربايەۆتىڭ ءومىرى مەن قىزمەتى تۋرالى باياندالعان. كىتاپ اۆتورى ناقتى فاكتتەردەن قۇرالعان ماتەريالداردىڭ، بىرەگەي مۇراعاتتىق قۇجاتتاردىڭ، سونداي-اق جەكە باقىلاۋىنىڭ نەگىزىندە قازاقستاننىڭ مەملەكەت باسشىسىنىڭ كوپ قىرلى تۇلعاسىن ادام، ازامات، ۇلت كوشباسشىسى رەتىندە كورسەتە بىلگەن.

  شىعىستا «مىڭجىلدىققا جول العاشقى قادامنان باستالادى» دەگەن اتالى ءسوز بار. قازاقستان كوشباسشىسى تۋرالى كىتاپتىڭ باسىلۋى جاڭا عاسىرداعى جۇڭگو مەن قازاقستان حالقى اراسىنداعى ستراتەگيالىق جانە تۇراقتى تاتۋ كورشىلىكتىڭ دامۋىنا وڭ ىقپال ەتەتىن قادامداردىڭ ءبىرى بولدى.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 【10】 
جاۋاپتى رەداكتورى : نۇرعيسا قۇرمانجان ۇلى

 سۋرەت