كورىكتى كۇز كەلبەتى

سۋرەتتەرىن ءتۇسىرىپ ماقالاسىن جازعان باقىتبەك ءجۇمادىل ۇلى (ىلە حالىق راديو ىستانسياسى)

2013.10.30 18:02   كەلۋ قاينارى : حالىق تورابى

ورمان جيەگىندەگى كۇز الاۋى

　　ءار جىلى جانعا جايلى، ماي توڭعىسىز مامىراجاي قوڭىر كۇز كەلىپ، اتىزدان التىن ءداننىڭ تاۋى جينالىپ، كۇزەكتە مالشى مايلانىپ، مامىرلاعان ءار تۇلىگىن يىرگەن قازان ايى باستالىسىمەن تۇستىگى ءۇيسىن تاۋىنا يەك ارتىپ، تەرىستىگى ءتاڭىر تاۋىنىڭ بولەكنۇر تاۋ سىلەمىن جاستانىپ، باتىستان شىعىسقا ءۇش ءجۇز شاقىرىمنان ارتىق كوسىلە جاتقان، ۇلى جاراتىلىس سيلاعان تۇنىق تابيعاتى بار جەر ءجانناتى ـــ شۇرايلى ىلە اڭعارى بولەكشە تۇسكە ەنىپ، الۋان بوياۋمەن اسەمدەلگەن كۇزگى كوركىمەن كورگەن جاندى وزىنە ەرەسەن باۋرايدى.

　　قارلى شىڭى كوك تىرەگەن اسقار تاۋلى، قويناۋىنا قۇت ۇيىعان ورماندى القابى، سىڭعىرلى ساۋمالى بۇلاقتارى سىر شەرتكەن سالماۋ - سالماۋ سالاسى بار «ءۇش بۋرىل» دەپ اتالعان قاس، كۇنەس، تەكەس اڭعارىنىڭ كۇزگى كورىنىسى ءوزىنىڭ دارا تابيعاتى، اسەم بوياۋىمەن كوز تارتادى. كوك وزەن جاعالارىنداعى تال - تەرەكتەردىڭ جاپىراقتارى التىنمەن اپتالعانداي سارى تۇسكە ەنسە، «ءۇش بۋرىلدىڭ» دا تۇستىك بەتكەيلەرىنە تارالعان اۋماقتى جابايى الما، ورىك ورمانى القىزىل تۇسىمەن كەڭ ساحارا توسىنە الىپ كىلەم توسەگەندەي اسەم كورىنىس قالىپتاستىرادى. مىنە بۇل كۇزدىڭ كوركى، مىنە بۇل كۇز بوياۋىنىڭ سىرلى تابيعاتقا سيلاعان سىمباتى. ىلە اڭعاىنىڭ ءار جەرىنەن فوتواپپارات كوزىنە ءتۇسىرىپ وقىرمانعا ۇسىنىپ وتىرعان مىنا ءبىر توپ كۇز كورىنىستەرىنە زەر سالساڭىز، تۇنىق تابيعاتتى ساحاراداعى كۇز كوركىنىڭ سىر - سىمباتىن تىلمەن جەتكىزە الماعانىمىزدى سەزىنەرىڭىز حاق.

　　كەلۋ قاينارى: حالىق تورابى