بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

سەكسەننىڭ سەڭگىرىنە تاياعاندا

− «التاي گازەتىنىڭ» قازاقشا باسىلىمى جايلى بايان

ماعاز سۇلەيمەن ۇلى

2013.11.08 15:01  

رەداكسيا القاسى. سۋرەتتەردى تۇسىرگەن قايروللا كومانتاي ۇلى
رەداكسيا القاسى. سۋرەتتەردى تۇسىرگەن قايروللا كومانتاي ۇلى 

  ۇستەگى جىلدىڭ 25-قازانى بولاتىن. ۇرىمجىدەگى كۇنلۇن قوناق ۇيىندە بۇكىل شينجياڭداعى گازەت-جۋرنال، باسپا ورىندارىنىڭ وزاتتاردى قاتىناسقان سالتاناتتى باس قوسۋ «قۇلاققاعىس ەتۋ» دەگەن اتپەن ءوز جۇمىسىن جۇرگىزىپ جاتتى. سالتاناتتى ءماجىلىس اياقتار الدىندا تۇتاس شينجياڭداعى «قوس 10 ۇزدىك» گازەتتەردىڭ، جۋرنالداردىڭ، باسپالاردىڭ ۋاكىلدارى ءۇش توپ بولىپ ساحناعا كوتەرىلىپ، سيلىق الدى. بۇلاردىڭ اراسىنداعى بىردەن-ءبىر قازاق ازاماتى تالعاتبەك مۇقامەتوللا ۇلى بولاتىن. مىنە، «التاي گازەتى» مەكەمەسى پارتكومىنىڭ ورىنباسار شۋجيى، مەكەمە باستىعى، باس رەداكتوردىڭ ورىنباسارى تالعاتبەك مۇقامەتوللا ۇلى ساحنادا وتىرعان باسشىلاردىڭ ءدال ورتاسىنان ورىن العان، اۆتونوميالى رايوندىق پارتكومنىڭ تۇراقتى مۇشەسى، رايوندىق پارتكوم ۇگىت ءبولىمىنىڭ باستىعى لي شۋەجۇن جولداستىڭ قولىنان قازاقشا «التاي گازەتىنىڭ» 2012-جىلعى باعالاۋدا اۆتونوميالى رايون بويىنشا «قوس 10 ۇزدىك» گازەتتىڭ ءبىرى بوپ باعالانعاندىعى جونىندەگى گرامموتانى تاپسىرىپ الدى.

  ناق مايداندا بۇل سالتاناتتى ءساتتى كوزىممەن كورگەن مەن شەگىنىس جاساي ويلاپ، مىنالاردى ەسكە الدىم: الدىڭعى عاسىردىڭ اياعىنداعى جىلداردىڭ بىرىندە مەن اۆتونوميالى رايوندىق اقپارات، باسپا ءسوز مەكەمەسى قاراستىلىعىنداعى شينجياڭ بويىنشا از ۇلتتار تىلىندەگى گازەتتەردى باعالاۋ كوميسسياسىنا مۇشە ەدىم. ەسىمدە قالۋىنشا 1998-جىلى قاڭتاردا ياعني تۇڭعىش كەزەكتى گازەت ساپاسىن (مازمۇذن جانە رەداكتورلىق، كوررەكتورلىق) باعالاۋدا «التاي گازەتى» (قازاقشاسى) بۇكىل شينجياڭداعى از ۇلت تىلىندە شىعاتىن 30 نەشە گازەت اراسىنان قارا ءۇزىپ شىعىپ ءبىرىنشى بولدى. ال، وسىدان ەكى جىل وتكەن سوڭ جۇرىلگەن شينجياڭداعى گازەتتەر اراسىنان «قوس 10 ۇزدىك» گازەتتەردى باعالاۋدا تاعى ءبىرىنشى ورىندى يەلەدى. سونان قازىرگە دەيىن بۇل گازەت 2002-جىلى (3- كەزەكتى)، 2004-جىلى (4-كەزەكتى)، 2006-جىلى (5-كەزەكتى، 2010-جىلى (7-كەزەكتى) بيىل تاعى (9- كەزەكتى) «قوس 10 ۇزدىك» گازەتتەر قاتارىنان ورىن الىپ، وسى مازمۇنداعى باعالاۋ جۇرىلگەن 15 جىلدا جيىنى 7 رەت «قوس ون ۇزدىك» گازەت دەگەن ات الدى، اتاندى. ال، 2010-جىلى قىركۇيەكتە، ىلە قازاق اۆتونوميالى وبلىستىق ءتىل-جازۋ قىزمەت كوميتەتى جاعىنان قازاق تىلىندەگى باسىلىمداردى ءتىل-جازۋ تۇرعىسىنان باعالاعاندا «ۇزدىك گازەت»، اۆتونوميالى رايون 2011-جىلى جۇرگىزگەن 22-كەزەكتى «شينجياڭ اقپارات سيلىعى» گازەتتەردىڭ اقپاراتتىق سۋرەتتەر ىستەتۋ باعالاۋىندا «1-دارەجەلى گازەت» بولىپ باعالاندى.

  اۋىزدى تولتىرىپ-تولتىرىپ ايتارعا تولارلىق بۇل تولاعاي تابىستار قالاي قولعا كەلدى؟ جۋىردا، مەن بولاشاق تۋىندىما شيكى ماتەريال ىزدەپ، توپتاۋ بايلانىسىمەن تۋعان جەرىم التايدا بولعان كەزىمدە ءوزىم 13 جىل قىزمەت ەتىپ، تەر توككەن وسى قارا شاڭىراققا بارىپ، گازەتحانا باستىعى تالعاتبەك مۇقامەتوللا ۇلى، ورىنباسار باس رەداكتور جەڭىس كالەلقان ۇلى قاتارلى جولداستارمەن اڭگىمە دۇكەن قۇردىم.

  «التاي گازەتى» ايگىلى دەموكرات، العاباسار ءشارىپحان كوگەدايەۆتىڭ تۇسىندا، ياعني 1935-جىلى 27-جەلتوقساندا «التاي» دەگەن اتپەن ءبىر باسپا تاباقتى، 4 بەت ەتىلىپ، العاشىندا اپتاسىنا ءبىر سان، كەيىن كەلە اپتاسىنا ەكى سان شىعىپ، تارالىمى 300 دانا بولعان، ءبىر جىلدان سوڭ 1000 داناعا جەتكەن. سول كەزدەگى باسپا جابدىعىن سوۆەت وداعى بەرگەن. 1936-جىلدىڭ باسىندا گازەت اتى «التاي شينجياڭ گازەتى» بوپ وزگەرگەن. 1945-جىلى قىركۇيەكتە «التاي شينجياڭ گازەتى» «ەرىكتى التاي گازەتىنە»، 1951-جىلى 8-جەلتوقساندا «ەرىكتى التايدان» «التاي حالقى» گازەتىنە اينالعان. 1959-جىلى 4-شىلدە گازەتتىڭ ەندىگى اتى «التاي گازەتى» بوپ تۇراقتانىپ، بۇگىنگە دەيىن وسى اتپەن شىعىپ كەلەدى.

  2005-جىلى 1-قاڭتاردا، «التاي گازەتىنىڭ» ەكى تىلدەگى باسىلىمى بەت سانىن مولايتىپ، رەڭدى گازەت بولىپ شىعا باستادى. ال، وسى جىلدىڭ 26-جەلتوقساننان باستاپ «التاي گازەتىنىڭ» ەكى تىلدەگى باسىلىمى كۇندىك گازەتكە اينالعان.

  التايدىڭ جانە « التاي گازەتىنىڭ» تاريحىندا ەرەكشە اۋىزعا الىپ، ماقتانىشپەن اتاپ وتەرلىك ءبىر ۇلاعاتتى ءىرى ءىس: 1938-جىلى گازەت ساندارىندا ءتوراعا ماۋ زىدۇڭنىڭ «ۇزاققا سوزىلاتىن سوعىس» اتتى ايگىلى شىعارماسىنىڭ سول كەزدەگى «التاي گازەتى» رەداكسيا القا باستىعى مۇقاش جاكە ۇلىنىڭ اۋدارماسى ارقىلى «تەكە تىرەس» دەگەن اتپەن قازاقشا جاريالانۋى دەر ەدىك. مىنە، مۇنان بايقالادى: كەزىندەگى «التاي گازەتى» جاپونعا قارسى سوعىستىڭ جەڭىسكە جەتۋى، دۇنيە جۇزىلىك فاشيزمگە قارسى سوعىستىڭ جەڭىسى، ۇلت ازاتتىق كۇرەسىنىڭ جەڭىسى ءۇشىن وشپەس ەڭبەكتەر ءسىڭىرىپ، وزىنە التىن ءارىپتى تاريح جازىپ قالدىردى.

  «التاي گازەتىنىڭ» تاريحى ۇزاق دەگەنىمىزدە، باستىسى، «التاي گازەتىنىڭ» قازاقشا باسىلىمىنىڭ تاريحى ۇزاق. گازەت ەڭ الدىمەن ۇلتتىكى، ونان كەيىن عانا دۇنيە جۇزىنىكى بولماق. ءارقانداي ۇلتتىق تىلدەگى گازەت الدىمەن ءوز ۇلت بۇقاراسىنىڭ ءتول مۇددەسىن ءتۇبىرلى تۇردە بەينەلەي ءبىلۋى، ونان سوڭ بارىپ ۇلتىنا، حالقىنا ءجۇرىلىپ جاتقان قوعامدىق ءتۇزىمدى ءتۇسىندىرىپ، سوعان ەسەلى ۇلەستەر قوسۋعا شاقىرا بىلۋگە مۇددەلى.

  تاريحى 80 جىلعا تاياعانداعى ءتۇيىن «التاي گازەتى» باستان-اقىر جەرلىك اقپاراتتىڭ سانى مەن ساپاسىن ويداعىداي يگەرە ءبىلدى. ونان «التاي» دەگەن ۇعىم اڭقىپ تۇردى. ونى وقىعان ءارقانداي ادام التىن التايدى، اسقار التايدى جاقىننان، تەرەڭنەن تۇسىنەتىن بولدى. «التاي گازەتى» قازىرگە دەيىنگى تاريحىندا توڭكەرىس، قۇرىلىس، رەفورما، دامۋ ءداۋىرىن باستان كەشىردى. «التاي گازەتى» ج ك پ التاي ايماقتىق كوميتەتىنىڭ ورگان گازەتى رەتىندە، اسىرەسە، سوڭعى 30 جىلدان استام ۋاقىتتان بەرى تىڭ تەبىمەن ۇدەي العا باسىپ، ۇدىرە تارتتى. ج ك پ-نىڭ جاماعات پىكىرى جەتەگىنە ادال ءارى تاباندى بولدى. التايدىڭ رەفورما جاساۋ، ەسىك اشۋ مەن وسىزامانداندىرۋ قۇرىلىسىندا قولعا كەلتىرگەن قوماقتى تابىستارىن ۇزبەي ۇگىتتەدى. ۇلتتار ىنتىماعىن ۇگىتتەۋدە شينجياڭ بويىنشا الدا ءجۇردى. گازەتتىڭ التايدان شىققان سەرجان، ابدان، جاڭ ۋانجيە، جاڭىل راقات قىزى، ءانيپا ءالىماحۇن قاتارلى وزاتتار مەن ۇلگىلەردى تولىق، جان-جاقتىلى اسەرلى تۇردە تانىستىرىپ، ولاردىڭ تۇتاس شينجياڭ مەن بۇكىل ەلگە ايگىلى ادامدارعا اينالۋىنا ۇلەستەر، ۇلەس بولعاندا شەشۋشى دە ماڭىزدى ۇلەستەر قوسقانى انىق. جوعارىداعى ەڭبەك ەرى ەگەيلەر ج ك پ ورتالىق كوميتەتى ۇگىت ءبولىمىنىڭ باسشىلارى جاعىنان جانە اۆتونوميالى رايوندىق پارتكوم جاعىنان تۇراقتاندىرىلىپ قولداۋ تاپتى. بۇكىل ەلگە ءماشھۇر ادامدارعا اينالدى. قازاق ۇلتى نەگىز، كوپ ۇلت ارالاس قونىستانعان التاي سىندى اتا جۇرتتا ۇلتتار ىنتىماعىنىڭ گۇلى اشىلىپ، قوعام ورنىقتىلىعى مەن ۇلتتاردىڭ ىنتىماعى مازمۇندىق جاقتا داۋىرمەن بىرگە ىلگەرىلەپ، ءورىس اشا جاڭالىق جاراتۋىندا بۇل گازەتتىڭ الار سىباعاسى مەن ۇستار ۇلەسى ايرىقشا.

  رەفورما جاساپ، ەسىك اشىلۋ «التاي گازەتى» ءۇشىن التىن ءداۋىردىڭ باستالۋى بولدى. ياعني گازەتتىڭ تيراجى، بەت سانى مولايدى. ءتىپتى، سوڭعى جىلدارى رەڭدى باسپا تەحنيكاسىن دا قولدانا باستادى.

  رەڭدى گازەت شىعا باستاعاننان بەرى بەت ۇلگىسى، ستون اتتارى قاتارلى جاقتاردا تىڭ بەينە، جاڭا وزگەرىستەر ارت-ارتىنان تۋىندادى. سول ارقىلى گازەت بەتىنىڭ كوركەمدىگى، تارتىمدىلىعى ارتتى. ماقالا مولايىپ، ينفورماتسيا قاينارى كۇشەيدى. مازمۇن جاعىندا «ۇشكە جاناسۋعا» تاباندى بولىپ، وقىرمانداردىڭ قىزۋ القاۋىنا بولەندى.

  2005-جىلى 26-جەلتوقساننان باستاپ كۇندەلىك گازەت بوپ شىعا باستاعان بۇل گازەت ۇجىمى جانە ونداعى جالپى قىزمەتشىلەر التاي حالقى اراسىنا ءتىپتى دە تەرەڭدەي ارالاسىپ، ءىس جۇزىندىككە، ومىرگە، بۇقاراعا جاناسۋعا ونان ارمان ءمان بەرىپ، كۇشەيتە ءبىلدى. گازەت كوللەكتيۆى ج ك پ-نىڭ قۋاتتاماسىن بەينەلەۋدى حالىق تىلەگىن اڭىس ەتۋمەن، دۇرىس بەتالىسقا تاباندى بولۋدى قوعام جاعدايىن حالىق رايىن تۇسىنۋمەن بىرلىككە كەلتىرە ءبىلدى. اقپاراتتاعى تارتىمدىلىق پەن باۋراعىشتىقتى بارىنشا قويۋلاتتى.

  2008-جىلدان باستاپ «التاي گازەتى» گازەت شىعارۋدى وزەك ەتۋ باعىتىنا تاباندى بولىپ، قوعامدىق ونىمدىلىكتى ماڭداي الدى ورىنعا قويۋعا دەن قويۋ، گازەت شىعارۋمەن كىرىس قاينارىن مولايتۋدى تەڭ ۇستاۋ، وسى ارقىلى قوعامدىق ونىمدىلىككە قول جەتكىزۋگە ۇمتىلىس جاسادى. گازەتحانا كادرلار ءىسى ءتۇزىمى مەن ءبولىس ءتۇزىمىن اتقاردى. تاياۋ 3 جىلدان بەرى وسى ەكى ءتۇرلى ءتۇزىم رەفورماسىنىڭ اينالىمى ويداعىداي ناتيجەگە قول جەتكىزدى. رەفورما باستاپقى قادامدا ءالى دە تومەن ورەدە بولعانىمەن، الايدا، شابىتتاندىرۋ مەحانيزمىن قولدانۋ، تەڭگەرمەشىلدىكتى تالقانداۋ ــ گازەت شىعارۋ ىستەرىمەن اينالىساتىن باسقا اقپارات ورىندارى ءۇشىن دە باستاما بولىپ، ۇلگى رولىن وينادى.

  بۇل كۇندەرى «التاي گازەتى» مەكەمەسىندەگى جۇمىسشى-قىزمەتكەرلەر ەكى ءتۇرلى رۋحتى قالىپتاستىردى. ونىڭ ءبىرى كاسىپتى قۇرمەتتەۋ، سول كاسىپكە شىنايى ءوزىن ارناۋ رۋحى. مۇندا، قوعام دامۋىنا ساي گازەتتىڭ ۇگىتتىك مولشەرى زورايدى. گازەتتىڭ بەت سانى كوبەيتىلدى. وسىدان بىلايعى جەردە قىزمەت مولشەرى ەسەلەپ ارتتى. ال، قىزمەتكەرلەرى ارتپاعاندىقتان بۇرىنعى بار قىزمەتكەرلەردىڭ ۇستەمەلەپ قىزمەت ىستەۋىنە تۋرا كەلدى.

  سوندىقتان، رەداكتور، تىلشىلەر، اۋدارماشىلار دەمالىس ۋاقىتتارىن كوپتەپ قيىپ، ءوز قىزمەت ورىندارىندا ءۇنسىز ىستەپ، ...«اتسىز قاھارماندارعا» اينالدى. وسىنداي ءبىر كەزەڭدە ءبىر سان گازەت 20 بەت بوپ شىققان رەكورد جارتىلعان كۇندەر دە بولدى. ەندى، ءبىرى جالپى جاعدايدى دۇرىس تانۋ، جالپى جاعدايمەن ساناسۋ رۋحى.

  «التاي گازەتى» بىرنەشە جىلداردان بەرى قاراي «سەنبىلىك» «اپتا اجارى» اتتى ايداردى جاقسى باسقارىپ وقىرماندى باۋراعان ەدى. ال، تاياۋ جىلداردان بەرى ەل ەسىندە جوق ەكى جاڭالىعىمەن جارىق ەتىپ تاعى كورىندى. ياعني بۇل گازەت سوڭعى كەزدەردى «اۋىلعا ارناۋ» اتتى ارناۋلى سان شىعارا باستادى. ينتەرنەت پاراقشاسىندا «التاي قولفون گازەتى» جانە بار. «اۋىلعا ارناۋ» اپتاسىنا ءبىر سان بوپ شىعىپ، مالشى، ديقان قاۋىمىنىڭ قولىنا تەگىن بارىپ تيسە، سوڭعى گازەت قازاق ءتىلدى قالىڭ ابونتتاردىڭ قاجەتىنەن شىعىپ وتىر.

  قازاق رەداكسياسى اپتاسىنان ءبىر جولعى ۇيرەنۋدەن اۋىتقىعان جوق. ال، ۇيرەنۋمەن قولدانۋ تىعىز ۇشتاستىرىلدى. سونىمەن بۇل مەكەمەدە، « كاسىپتىك ءمورال» نەگىز ەتكەن «تورتتە بولۋ» تاربيەسى تىنباي جالعاسىپ كەلەدى. ياعني سيتلى دۇرىس، قوعامدا جاقسى ازامات، مەكەمەدە جارامدى قىزمەتكەر، سەميادا تاڭداۋلى مۇشە بولۋ ۇنەمى دارىپتەلدى، ءمورال ساباعىن جاقسى تىڭداپ، ۇلگىلەردەن تاربيە كورىپ، قوسىندى جاقسى قۇرىپ، يدەيا، ءمورال تاربيەسىن تەرەڭدەتۋ، قاجىرلى قاراپايىم بولۋ، ۇنەمشىلدىكتى دارىپتەپ، مول ۇلەس قوسۋعا تىرىسىپ وتەدى. وسىلايشا گازەت ءوزىنىڭ تۇتاس قوعام جونىنەن رۋحاني مادەنيەت قۇرىلىسىنىڭ ۇگىتشىسى، جەتەكشىسى، باستاماشىسى بولاتىن رولىن ابدەن تانىدى. ويداعىداي وينادى. سونىمەن گازەتتىڭ «اۋىلعا ارناۋ» جانە «التاي قولفون گازەتى» قاتارلى تەتىكتەرىنەن تولىق پايدالانىلىپ، «احلاق-ءمورال الاڭى»، «جاقسى ادامدار جانىمىزدا»... «ەڭ سۇيىكتى التايلىقتار» قاتارلى ارناۋلى ايدارلارى ارقىلى التايدى بۇكىل شينجياڭعا، تۇتاس جۇڭگوعا تانستىرۋعا تالپىنىستار جاسادى.

  «مادەنيەتتى دارىپتەپ، جاڭاشا سالت ورناتۋدى» وزەك ەتكەن حابار-وشار، قاجەتتى ماتەريالدار «اۋىلعا ارناۋ» مەن «التاي قولفون گازەتىنىڭ» ارناۋلى سانىندا ۇزبەي جاريالانىپ، قالىڭ وقىرمان جاعىنان قىزۋ قارسى الۋعا بولەندى. تۇتاس جىل بويىندا جوعارىداعى مازمۇنمەن، جوعارىداعى ارناۋلى سانداردا جاريالانعان جالپى ماقالا 600 پارشاعا جاقىندادى.

  2012-جىلى «التاي گازەتى» پارتكومى ج ك پ التاي ايماقتىق كوميتەتى جاعىنان ايماقتىڭ «ۇلى وتاندى قىزۋ ءسۇيىپ، كورىكتى مەكەن قۇرايىق» اتتى قيمىلىندا ۇزدىك ورىن اتاندى. 2013-جىلى شىلدە ايىندا ايماق جاعىنان ۇزدىك نەگىزگى ساتى پارتكومى بوپ باعالاندى. ال، مۇنىڭ الدىندا بۇل مەكەمە ىركەس-تىركەس ەكى جىل ايماقتىڭ يدەيالىق ۇگىت تاربيەسىندەگى وزات ورىن، ايماقتىڭ ەكولوگيالىق ورتانى قورعاۋداعى وزات ورنى بولدى. سوڭعى 3 جىلدان بەرى بۇل گازەتتەن 9 اقپاراتتىق تۋىندى اۆتونوميالى رايون بويىنشا تاڭداۋلى تۋىندى بوپ باعالاندى. 18 اقپاراتتىق تۋىندى بۇكىل مەملەكەتتىك از ۇلت رايونىنداعى گازەت تۋىندىلارىن باعالاۋدا ۇزدىك تۋىندى بولدى، 26 اقپاراتتىق تۋىندى ىلە قازاق وبلىسى جاعىنان تاڭداۋلى تۋىندى بوپ سيلاندى. 33 اقپاراتتىق تۋىندى التايدىڭ ءوز اۋماعىندا تاڭداۋلى اقپاراتتىق تۋىندى بوپ باعالاندى، گازەت مەكەمەسى ۇدايعى 6 جىل اۆتونوميالى رايون دارەجەلى مادەنيەتتى ورىن بوپ باعالانىپ قالماستان، بيىل تاعى دا قايتالاي سالىستىرىپ باعالاۋدا ءوز قالپىن ساقتادى.

  حالقى ءۇشىن قالتقىسىز قىزمەت اتقارىپ، تولىقسىعان داۋىرگە قادام تاستاعان بۇل گازەت ءوز ومىرىندە بۇلعاقتى زاماننىڭ بۇلتاعىنا ءتۇسىپ، سان وزگەردى. سان ساپىرىلدى. ءتىپتى ەڭ العاشقى جىلدارىنان ارحيۆ تە قالعان جوق. گازەت تەك شىعىستان التىن يەك تاڭ اتىپ، وتانىمىز ازاتتىق العاننان كەيىن عانا ەسىن جيىپ، ەتەگىن جاپتى. ول بىرتىندەپ ازدان مولايدى، كىشكەنەدەن ۇلكەيدى. بۇگىن ۇلكەن فورماتتى، 4 بەتتىك كۇندەلىك گازەت بولىپ، اپتاسىنا 5 سان، جىلدىق تارالىمى 15 مىڭ تيراجبەن 30عا جۋىق ادام جۇمىس جاساۋدا.

  ەندى 2 جىلدان سوڭ «التاي گازەتىنىڭ» قازاقشا باسىلىمىنا 80 جىل تولادى. گازەت سەكسەننىڭ سەڭگىرىنە شىعادى. التايدىڭ قاتپارلى تاريحىنان حابارى بار قارتتارىمىز مىنانى بىلەدى: «التاي گازەتىنىڭ» باسپادان شىعۋى التايدا بۇرىن باسپا ءسوز بولماعان تاريحتى اياقتاتىپ، التاي حالقىنا ونىڭ ىشىندە قازاق حالقىنا التىن اراي نۇر شۇعىلاسىن توكتى. 80 جىلدا «التاي گازەتى» قانداي جولداردى باسىپ ءوتتى؟ نەندەي بيىكتەردى الدى؟ بۇعان جاۋاپ بەرۋ. ەكى جىلدان كەيىنگى ەندىگىنىڭ ەنشىسىندە.

  ءبىزدىڭ بۇل ماقالامىز شينجياڭ بويىنشا گازەت-جۋرنالداردى سالىستىرىپ، باعالاپ وتىرۋ ۇردىسكە اينالعان سوڭعى 15 جىلدا «التاي گازەتىنىڭ» قارا ءۇزىپ الدا كەلە جاتقاندىعىن ەسكەرىپ، بۇل گازەتتىڭ وسى جاقتارداعى تابىستارىن وزەك ەتە وتىرا جۇرت نازارىن اۋدارۋ ماقساتىمەن جازىلىپ وتىر. 15 جىلدا 7 رەت ماڭدايى جارقىراپ بايگەدەن كەلۋ راسىندا وڭاي-وسپاق ءىس ەمەس ەكەنى حاق!

  سوناۋ ءبىرىنشى رەتكى باعالاۋدا ۇزدىك بولۋدىڭ شارتتارى بىلاي دەپ ورىلگەن-دى. ياعني: گازەتتىڭ ءبىر بەتىندە 8 ماقالادان تومەن بولماۋى، سۋرەت سانى 5 تەن جوعارى بولۋ. بۇل ارينە، گازەتتىڭ كوز تارتىپ، كوڭىل اۋدارالىق بولۋىن كوزدەۋ تۇرعىسىنان، ال، كوررەكتورلىق جاقتان العاندا، ءبىر مىڭ ارىپتىك ماقالا ىشىندە كەتكەن قاتەلىك سانى تەك ەكى ارادان عانا كەزىگەتىن بولۋى كەرەك دەپ قاتاڭ قاداعالانعان. باعالاۋ ولشەمى جالپى مازمۇنعا قاراي بەت قۇرىلىمى كوركەم بولۋ، اقپاراتتىق سۋرەتتەرى انىق بولۋ، باسپا ساپاسى جاقسى بولۋ. رەداكتور، كوررەكتورلىق ساپا ولشەمى جوعارىلانعان قازىرگى كەزدە ءالى ۇردىستەن جازباي سول داڭقتى ءداستۇرىن جالعاستىرىپ كەلەدى. ەكى جىلدا ءبىر رەت جۇرىلەتىن بۇل بايقاۋدا جوعارىداعىداي ناتيجەنى ەنشىلەپ وتىرۋى «ەكىنىڭ ءبىرى ەگىزدىڭ سىڭارىنىڭ» قولىنان كەلە بەرەتىن جاي قۇبىلىس سانالماسا كەرەك.

  ءارقانداي گازەتتىڭ جاقسى باسقارىلۋى سول گازەت ۇجىمىنداعى جالپىلىقتىڭ مادەني ورەسى مەن جاپپاي بەلسەنە ات سالىسۋىنان بولىنبەيدى. بۇل ارادا ارينە، توپتى باستاۋشىنىڭ رولى ايرىقشا. ءبىز ايتامىز: تالعاتبەك مۇقامەتوللا ۇلى مەن جەڭىس كالەلقان ۇلى باستاعان بۇل كوللەكتيۆ كوسىلگەن ۇستىنە كوسىلە شاۋىپ، تىڭ دا تىنىستى تىرشىلىكتەرى ارقىلى بۇرىنعىدان دا بيىك بەلەستەردى باعىندىرىپ، «التاي گازەتىن» ونان دا ايشىقتى، ونان دا جۇرت جۇرەگىنەن جوسىلا ءىز تاباتىن تارتىمدى باسىلىم ەتىپ باسقارا بىلەدى. سونداي بولۋىنا تىلەۋلەسپىز دە!

  اۆتوردىڭ قىزمەت ورنى: ش ۇ ا ر ۇلت ىستەرى كوميتەتى

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 
جاۋاپتى رەداكتورى : نۇرعيسا قۇرمانجان ۇلى

 سۋرەت