ۇرىمجىدە «قازاقستان مادەنيەت كۇنى» ساۋىق كەشى ءوتتى

2013.11.11 15:59   كەلۋ قاينارى : ءتاڭىرتاۋ تورابى

　　ءتاڭىرتاۋ تورابىنىڭ تىلشىلەرى سايراش تۇرارجان قىزى مەن جاڭىلقان سايلاۋ قىزى حابارلايدى:

　　ەلىمىزدىڭ مادەنيەت مينيسترلىگى مەن قازاقستاننىڭ مادەنيەت جانە اقپارات مينيسترلىگى، قازاقستاننىڭ جۇڭگودا تۇراتىن باس ەلشىلىگى سەلبەسىپ وتكىزگەن «قازاقستان مادەنيەت كۇنى» اتىنداعى ساۋىق كەش 7 - قاراشا كۇنى كەش ۇرىمجىدەگى شينجياڭ حالىق سارايىندا سالتاناتپەن وتكىزىلدى.

　　ساۋىق كەش باستالاردان بۇرىن، قازاقستاننىڭ جۇڭگودا تۇراتىن باس ەلشىسى نۇرلان بايۇزاق ۇلى ەرمەكبايەۆ ارناۋ ءسوز سويلەدى.

　　ساۋىق كەشتە قازاقستان رەسپۋبليكاسىنىڭ قۇرمانعازى اتىنداعى مەملەكەتتىك وركەسترى، قازاقستاننىڭ ەڭبەك سىڭىرگەن حالىق ارتيستەرىنەن روزا رىمبايۆا، بەكبولات تىلەۋحانوۆ، مايرا مۇحامەت قىزى، ايگۇل نيازوۆا، ەدىل قۇسايىن جانە «وردا» توبى تاماشا ونەر سيلاپ، تاماشالاۋشى قاۋىمنىڭ ايرىقشا القاۋىنا بولەندى. ساۋىقكەش قۇرمانعازى اتىنداعى مەملەكەتتىك وركەستردىڭ ورىنداۋىنداعى قۇرمانعازىنىڭ كۇيى «سارى ارقامەن» باستاۋ السا، وركەستردىڭ سۇيەمەلدەۋىندە مايرا مۇحامەد قىزىنىڭ ورىنداعان حانزۋ، ۇيعۇر تىلدەرىندەگى تارتىمدى اندەر مەن «اققۋ» فولكلورلىق-حورەوگرافيالىق ءانسامبىلىنىڭ ورىنداعان ۇيعۇر ۇلتىنىڭ ءبيى قازاق ەلىنىڭ جۇڭگوعا، اسىرەسە شينجياڭ حالقىنا دەگەن قۇرمەتىن، دوستىعىن ءبىلدىرىپ، تاماشالاۋشى قاۋىمنىڭ ىستىق ىقىلاسىنا بولەندى.

　　ايتا كەتسەك، «قازاقستان مادەنيەت كۇنى» − جۇڭگو مەن قازاقستان ەكى ەل مادەنيەت مينيسترلىگىنىڭ جىلدىق مادەنيەت جوسپارى بويىنشا ورىستەتكەن ەڭ جوعارى ورەدەگى مادەني الماسۋ بولىپ ەسەپتەلىنەدى. 5 - قاراشا كۇنى جۇڭگو مادەنيەت مينيسترى ساي ۋ مەن قازاقستان مادەنيەت جانە ينفورماتسيا مينيسترى مۇحتار قۇلمۇحاممەت ەلىمىزدەگى مەملەكەتتىك ۇلكەن تەاترحانادا وتكىزىلگەن ايتۋلى قيمىلدىڭ باستالۋ ساۋىق كەشىنە قاتىناستى ءارى ءسوز سويلەدى. 7 - قاراشادان باستاپ قازاقستان «استانا بالەت» حورەوگرافيالىق ۇجىمىنىڭ جەكە كونسەرتى بەيجيڭ، شاڭحاي قالالارىندا قويىلدى. 5 - قاراشادان 15 - قاراشاعا دەيىن جۇڭگو مەملەكەتتىك مۇراجايدا «ۇلى دالا قازىناسى» اتتى كورمە ورنالاستىرىلدى.

　　ءتوراعا شي جينپيڭ 7 - قىركۇيەكتە استانادا قازاقستاننىڭ زۇڭتۇڭى نازاربايەۆپەن كەڭەس وتكىزگەندە ايتقانىنداي، جۇڭگو مەن قازاقستاننىڭ جان - جاقتى ستراتەگيالىق سەرىكتەستىك قاتىناسى تاتۋ كورشى بولۋدىڭ، ءوزارا تيىمدىلىك جاساپ، ىنتىماقتاستىق ورناتۋدىڭ ۇلگىسى. قازاقستانمەن دوستىق سەلبەستىكتى دامىتۋ − جۇڭگو ديپلوماتياسىنىڭ بەتالىسى. سوندىقتان دا وسى جوعارى دەڭگەيدە وتكىزىلىپ جاتقان قيمىلدار ەكى ەل ديپلوماتيالىق قارىم - قاتىناس ورناتقاننان بەرگى ءبىر رەتكى كولەمدى مادەنيەت قيمىلى بولىپ، ەكى ەلدىڭ مادەنيەتى ارقىلى تاتۋلىقتى، دوستىقتى نىعايتا تۇسۋدە تۇرتكىلىك رول وينايدى.

　　ۇعىسۋعا قاراعاندا، 2014 - جىلى جۇڭگو قازاقستاندا «جۇڭگونىڭ مادەنيەت كۇنى» قيمىلىن وتكىزەدى ەكەن.