«قارعالداق» اتىنداعى سيلىقتى شىعارما اۋدارما باسەكە جارىسىندا سيلانعان شىعارمالار(4)

2013.12.11 17:03  

　　 كۇن

　　احمەت ەمين (ەگيپەت)

　　تەرەزەنى اشىپ قالىپ ەدىم، كوز ۇيالتاتىن التىن ساۋلە بولمە ىشىنە توگىلىپ، جالىندى تىرشىلىك لەبى مەن ارىندى ومىرشەڭدىك كۇشتى دە بىرگە الا كەلگەندەي بولدى. مەنىڭ دە تۇلا بويىم جىلىنىپ سالا بەردى. كۇن كوزى شىعۋدان ىلگەرى ءومىرىم قاراڭعى تۇنەكتە ەش ءبىر ءمان -ماعىناسىز كۇيدە ءوتىپ جاتقان.

　　قىس كۇندەرى كۇننەن نەمەسە كۇندى اڭگىمە ەتۋدەن ارتىق جانعا راقات نارسە بار ما؟ قاقاعان ايازدان ءتىسىمىز ساقىلداپ، تۇلا بويىمىز قۇرىسىپ، وتتى كورگەندە، لاۋلاعان جالىنعا ءوزىمىزدى اتىپ جىبەرەردەي بولامىز.

　　ۇلى تابيعاتتىڭ كەرەمەتىنە ءتىل جەتكىزۋ قيىن. دەسە دە، بارىنەن ۇستەم تۇراتىنى ــ كۇن. ول جىلدىڭ ءتورت ماۋسىمىندا دا سۇلۋلىعىنان جازبايدى. جازدا دا سونداي، دەسەدە، قۇدىرەتىن كورسەتەتىن كەز قىس كۇندەرىندە بولادى.

　　جاز كۇندەرى ونىڭ سۇلۋلىعى قۇدىرەتتى كۇش -قۋاتى مەن ءوزىن جاسىرماي اشىق ۇستايتىندىعىنان بەينەلەنىپ تۇرادى.

　　ءبىز كۇنگە تابىنامىز، ودان يمەنەمىز، ءتىپتى ودان قاشقالاقتايتىن كەزدەرىمىز دە بولادى، دەسە دە ونى تاعى قيعىمىز كەلمەيدى. ول كەيدە كارىنە ءمىنىپ قاتىگەز بولىپ كەتەدى، الايدا سول قاتىگەزدىكتىڭ ارتىندا مەيىرىمدىلىك جاسىرىنىپ جاتىر.

　　ول قۇددى ءبىر ەركىڭە جىبەرىپ شولجاڭداتىپ تا، بەتىڭنەن قاعىپ جاسىتىپ تا جىبەرمەيتىن دانا ۇستازعا ۇقسايدى.

　　ول قىزعىلت جالىنىمەن تەرىمىزدى كۇيدىرىپ، بەتىمىزدى قاريدى. سولايدا، بىزبەن قوشتاسارىندا ءوزىنىڭ بيازى دا مەيىرلى ەلشىسى ايدى جىبەرەدى، اي تىرشىلىك اتاۋلىنى ايمالاپ جۇباتىپ، كۇننىڭ وجارلىعى مەن قاتىگەزدىگىن ۇمىتتىرعانداي بولادى.

　　قىستا كۇن باسقا ءبىر قىرىنان كورىنىپ، بىزگە ءوزىنىڭ موماقاندىعى مەن بايسالدىلىعىن، مەيىرباندىعى مەن سابازدىعىن تانىتادى. ونىڭ مەيىرى مەن جاناشىرلىعىن ويلاساق بولدى، جۇرەگىمىزدى قيماستىق بيلەپ الادى.

　　مىڭ قۇبىلىپ، الۋان تۇسكە مالىنىپ وتىراتىن كۇن بىردە كۇمىستەي اقشىلدانىپ، بىردە التىنداي سارعايىپ، بىردە وتتاي قىزارىپ ادامدى قيالعا باتىرادى. ءبىز ءسىرا قايسى ءتۇستىڭ ناعىز كوز سۇرىندىرەرلىك كوركەم ەكەنىنە ءجىپ تاعا المايمىز.

　　ۋا، كۇن! سەن ءساندى كويلەگىڭدى گۇلدەرگە كيگىزىپ، گۇل تاماشالاۋشىلاردىڭ تاڭدايىن قاقتىردىڭ. گۇل قاۋاشاقتارى سەنىڭ كوركىڭنەن ءنار العاندا عانا اسەم تۇسكە ەنەدى، نۇرىڭدى ەركىن سىمىرگەندە عانا كوز جاۋىن الا قۇلپىرادى... جاپ -جاسىل ءتۇس سەنىڭ جومارتتىعىڭنىڭ ايعاعى بولسا، نارت قىزىل ءتۇس ــ شۇلەندىگىڭنىڭ كۋاسى.

　　بويىمىزداعى قان سەن بولعاندا عانا تامىرلارىمىزدى بويلاپ جۇيتكي الادى، سەبەبى قان ناردەن كەلەدى،ال، ءنار سەنىڭ جىلۋىڭنان باستاۋ الادى.

　　كۇللى تىرشىلىك سەنىڭ بيلىگىڭدە، سەن بولساڭ عانا اتىزدار دانگە تولىپ، جەمىس اعاشتارى ماۋەلەپ تۇرماق. سەن بولساڭ عانا گۇلدەر شەشەك اتىپ، جەر بەتى جاسىل جەلەك جامىلماق...

　　كۇن، سەن نەتكەن ۇلى ەدىڭ!

　　ايتسە دە، سەنىڭ جاراتۋشىڭدى «ۇلى» دەگەن سوزبەن عانا تەڭەي سالۋ ءجون بولار ما ەدى!

　　اۋدارعان: جەڭىس جىكباس ۇلى

　　(2 – دارەجەلى سيلىق بەرىلدى)