«قارعالداق» اتىنداعى سيلىقتى شىعارما اۋدارما باسەكە جارىسىندا سيلانعان شىعارمالار(5)

2013.12.11 17:03  

　　 كۇن

　　احمەت ەمين (ەگيپەت)

　　تەرەزەنى اشىپ قالدىم، ءۇي ىشىنە كوز قارىقتىرار التىن ساۋلە ساۋ ەتىپ توگىلدى. جومارت كۇن نۇرىمەن بىرگە ۇيگە ءلۇپىل قاققان ومىرشەڭ تىرشىلىك تىنىسى ىلەسە ەندى. سول ساتتە ونە بويىم جىلىنعانداي راقات كۇي كەشتىم. كۇن ءار جولى قاراسىن كورسەتۋدەن ىلگەرى مەنىڭ ءومىرىم تۇڭعيىق تۇنەك پەن مۇلگىگەن تىنىشتىق قۇشاعىندا قۇنداقتالىپ، قىبىرسىز دا قادىرسىز وتەتىن-دى.

　　قىس ماۋسىمىندا التىن اراي كۇن نۇرىنان قىمبات نەمەسە كۇن جايىندا اڭگىمە كورىگىن قىزدىرۋدان ارتىق كوڭىلدى سەرپىلتەر دۇنيە بار ما، ءسىرا؟ ساقىلداعان سارى اياز ەتتەن ءوتىپ سۇيەكتى قارىعاندا، لاپ ەتكەن ۇشقىن كوزىڭە شالىعار بولسا، سول ۇشقىن قۇشاعىنا ءوزىڭدى اتىپ جىبەرۋگە شاق قالاسىڭ.

　　ۇلى تابيعات دۇنيەسى ءتىلسىم سىرعا تولى عوي. دەسە دە، كۇننىڭ وزگەلەردەن شوقتىعى بيىك، ايبىنى بولەك. جىلدىڭ ءتورت ماۋسىمىندا دا جۇزىنەن ءارى تايمايدى. جاز كۇندەرى دە سولاي. دەسە دە، قىستا ەركىڭە قويماي ەلىكتىرە تۇسەرى حاق.

　　جازدا ونىڭ اسەمدىگى شار تاراپقا توگىلگەن شۋاعىمەن، ءجۇزىن كولەگەيلەمەي اشىق ۇستايتىن قاسيەتىمەن دارالانادى.

　　ءبىز ونى ارداقتايمىز، ودان يمەنەمىز. اۋەلى بويىمىزدى اۋلاق سالىپ، تايساقتاپ تۇرامىز. سوندا دا وعان دەگەن ىڭكار سەزىمىمىزدى جۇرەگىمىزدەن وشىرە المايمىز. ول ارەدىك قىڭىرلانىپ دولدانا دا قالادى. دەسە دە، دولى قىڭىرلىعىنىڭ استارىندا مەيىر - شاپاعاتى دا جاسىرىنعان.

　　ول، بەينە، كەڭ پەيىلى مەن قاتۋلى مىنەزى، دارقاندىعى مەن ايباتى سايما-ساي ءدانىشپان ىسپەتتى. لاپىلداتا بۇرىككەن تۇيدەك جالىنىمەن دەنەمىزدى كۇيدىرە ورتەپ، ءجۇزىمىزدى قۋىرا قاقتايدى. سوسىن بىزبەن قوشتاسار ساتتە جىلى ءجۇزدى، بيازى ەلشىسى ــ اي بيكەنى جىبەرىپ، پانيدەگى جىبىرلاعان جان يەلەرىنىڭ كوڭىلىن اۋلايدى. سول ارقىلى تارپاڭ وجارلىعىن جۋىپ - شايىپ، يىلمەس قاتالدىعىن جىبىتەدى. باسبۇزار تەنتەكتىگىن تەزگە سالادى.

　　قىس كۇندەرى كۇن مۇلدەم باسقا بەينەگە ەنەدى. مومىن، بايسالدى قالپىن اڭعارتادى. سىپايى، سابازدىعىن سەزىندىرەدى. ءبىز ءارقاشان ونىڭ قامقورلىعى مەن جاناشىرلىعىن اڭسايمىز. كوكىرەگىمىزدى ساعىنىش دەرتى جايلايدى. قىرىق قۇبىلعان، حيكىمەتكە تولى كۇن بىردە جارقىراپ، بىرەسە سارعىش تارتىپ، كەيدە قىپ - قىزىل تۇسكە ەنەدى... جانارىڭدى ارباپ، ەرىكسىز قيال الەمىنە جەتەلەيدى. قايسى ءتۇستىڭ ەڭ كوركەم، ەڭ ءساندى ەكەنىنە باعا بەرۋگە شاراسىز قالامىز.

　　ۋا،كۇن! كوز جاۋىن الار شەكپەنىڭدى شەشىپ، گۇل - بايشەشەككە كيىندىرىپ، گۇلدەردى تاماشالاعان ءدۇيىم ەلدى ءتانتى ەتەسىڭ. گۇل -بايشەشەك سەنىڭ اجار -كوركىڭنىڭ ارقاسىندا بال - بۇل جانادى، تولقىنداي ويناعان نۇرلارىڭمەن ساۋلەتتى سىمباتقا بولەنەدى... مىناۋ قىزىل -جاسىلدى الەم ــ اسقاقتىعىڭنىڭ كۋاسى، ماساتىداي قۇلپىرعان عالام ــ مەيىربان مىنەزىڭنىڭ ايعاعى.

　　سەن بولعان سوڭ عانا تامىرلاردا قان تۋلاي جوڭكىلەدى. سەبەبى قان قورەكتەن باستاۋ الادى. ال قورەكتىڭ قاينار كوزى سەنىڭ شۇلەن شۋاعىڭ ەمەس پە! سەن پانيدەگى كۇللى تىرلىكتىڭ تىرەگىسىڭ. سەن ــ بولعاندا عانا بايتاق دالا ءتوسى دانگە تولىپ، جەمىس اتاۋلى تاۋ - توبە ۇيىلەدى؛ سەن بولعاندا عانا سايىن دالا جاسىل ءپۇلىس جامىلىپ، كوك جۋساننىڭ ءيىسى بۇرقىرايدى...كۇن! نەتكەن ۇلى ەدىڭ!

　　الايدا، سەنى جاراتۋشىنىڭ كيەلى قۇدىرەتىن «ۇلى» دەگەن ءبىر اۋىز سوزبەن عانا بەينەلەۋ جەتەرسىزدىك ەتپەي مە!

　　اۋدارعان: قۋات جۇماش ۇلى

　　(3 – دارەجەلى سيلىق بەرىلدى)