«كوكقامىردا ناۋرىز» اتتى ساۋىق كەش وتتى

2014.03.03 16:50   كەلۋ قاينارى : حالىق تورابى

　　1 – ناۋرىز كۇنى قۇلجا اۋدانى شىنحۋا قوناق سارايىندا الىس - جاقىننان كەلگەن سيلى مەيماندار مەن جەرگىلىكتى تۇرعىندار ءبىر - بىرىنە «ۇلىس وڭ بولسىن، جىلدان امان، ايدان ەسەن وتەيىك» دەپ تىلەك تىلەسىپ، ىستىق ىقىلاسپەن امانداسىپ جاتتى. «كوكقامىردا ناۋرىز» اتىنداعى قۇلجا اۋدانىنىڭ جىلقى جىلعى ناۋرىز مەرەكەسىن قارسى الۋ ساۋىق كەشى وسى ارادا وتكىزىلدى.

　　اۋىل – قىستاقتارداعى ونەرپازداردان سارالانعان ءانشى، كۇيشىلەر كوكقامىر ساحاراسىندا وتكەن يگەن كۇرىشباي ۇلى، الىپپەك مالىك ۇلى، اسەت نايمانباي ۇلى قاتارلى ونەر يەلەرىنىڭ كۇمبىرلى كۇيلەرى مەن ءتاتتى اندەرىن تامىلجىتا اۋەلەتتى. اقىندار كوكقامىردىڭ اسەم دالاسىن، باي – باقىتتى زاماندى جىرعا تيەك ەتتى. اۋليە اۋىلىنداعى ەگىنشى – مالشى ۇلاندارىن ارناۋلى جاتتىقتىرعان مەملەكەتتىك 1 - دارەجەلى ءبي رەجيسسورى، وبلىستىق ءان – ءبي ۇيىرمەسىندەگى انار ۇسەيىنباي قىزى مەن ءدىلنۇر ءمۇتالىپ قىزى ءبي نومەرلەرىنە جەتەكشىلىك ەتىپ، «جەڭەشەلەر»، «قىزدار – اي» جانە «ءبىز باقىتتى بالالارمىز» قاتارلى بيلەرمەن ساحنانىڭ سالتاناتىن اسىردى.

　　سوڭىندا اۋداندىق پارتكومنىڭ تۇراقتى جوراسى قاليالى قىزايجان ۇلى بۇل جولعى قيمىلدىڭ ماڭىزى، ماقساتى جونىندە ەگجەي-تەگجەيلى تۇسىنىك جاسادى. اۋدان باسشىلارىنىڭ قيمىلدىڭ جابىلۋ سالتىن قورتىندىلاۋىمەن ىلەسە، اۋليە اۋىلى وسى جولعى ناۋرىزعا ارنالعان كوركەمونەر قيمىلىن تابىستى اياقتاتىپ، كەلەر جىلعى ناۋرىز مەرەكەسىن سالتاناتتى وتكىزۋ تۋىن قاراعاش اۋىلىنا ۇسىندى. سۋرەتتە: سالتاناتتى ناۋرىز مەرەكەسىنەن فوتو قيىقتار.

　　سۋرەتىن ءتۇسىرىپ، حابارىن جازعان باعداۋلەت باتىربەك ۇلى

　　كەلۋ قاينارى: حالىق تورابى