ناۋرىزدا اق تىلەكتەر توگىلگەن، جىر مەكەنى كوكتوعايدىڭ ەلىنەن

2014.03.04 15:45   كەلۋ قاينارى : حالىق تورابى

　　گۇلميرا داۋلەتبەك قىزى حابارلايدى. جەر انا بۋسانىپ، جىل باسى ناۋرىز كەلدى، نار تاۋلار ۇيقىسىنان ويانىپ، كوكتەمنىڭ كۇلكىسىنەن ءان ەستىلدى، بوتاسىنان يىگەن بوز ىنگەندەي، تابيعاتتىڭ بار دەنەسى ەلجىرەپ، بۇكىل الاپ نۇرعا بولەندى.

　　ايدان امان، جىلدان ەسەن وتكەنىنە شۇكىرلىك ەتىپ، جاڭا جىلدى شاتتانا قارسى الىپ، مول باقىت پەن بايلىق سيلاعان كونە جىلدى ۇزاتىپ سالۋ ءار حالىقتا بار ءداستۇر. ءيا، سالت - ءداستۇرىمىزدى ۇلىقتاپ، ۇلىستىڭ ۇلى كۇنى ناۋرىز مەرەكەسىن بۇكىل ەل بولىپ تويلاپ جاتتى.

　　ناۋرىز كۇللى تىرشىلىك يەسىن سان بوياۋعا كومىلتىپ، شۋاق نۇرىنا شومىلتىپ، جان جۇيەسىن ەگىلىتكەن مەيىرىمنىڭ بۇلاعىنداي سەزىلدى، پارتيا 18 - كەزەكتى 3 - جالپى ءماجىلىسىنىڭ بۇكىل ەلىمىزدەگى ءار ۇلت حالقىنا تۇسكەن مەيىر شۋاعى، پارتيامىزدىڭ شۇعىلالى ساياساتىنىڭ دەمەۋىندە جاۋقازىنداي جايناعان ۇلتتىق مادەنيەتىمىزدىڭ قاۋلاپ وسكەن قۇراعىنداي سەزىلدى.

　　كوكتوعاي اۋدانىنىڭ جىلقى جىلعى ناۋرىز مەرەكەسىنە ارنالعان «كەنىشتى مەكەن كوكتوعاي» اتىنداعى ساۋىق كەش 3 - ناۋرىزدا التاي قالاسىندا قويىلدى.

　　ساۋىق كەشتىڭ شىمىلدىعى ءور التايدىڭ ورلىگىن، جالىندى جاستاردىڭ جۇڭگو ارمانىن ورىنداۋ جولىندا زىمىران زاماننىڭ العى لەگىنە لەسكەن اسىققان اساۋ ارمانىن، اسقاق تالعامىن مازمۇن ەتكەن كولەمدى توپتىق ءبي «سامعاۋ» بيىمەن اشىلدى.

　　كوكتوعاي اۋدانىنىڭ جىلقى جىلعى ناۋرىز مەرەكەسى ساۋىق كەشىندە «گاۋھار» ءبيى ارقىلى مەرۋەرت مەكەن كوكتوعايدى، «كەنشىلەر جىرى» ارقىلى كوكتوعايدىڭ كەن بايلىعىن تىلگە تيەك ەتتى. باسقا جىلداعى كونسەرتپەن وزگەشەلىگى، كوكتوعاي اۋدانىندا تۋىپ –وسكەن، كوكتوعايدان قاناتتانعان ونەرپاز ۇل - قىزداردى شاقىرىپ، كوكتوعايدىڭ ءتول تۋما ءان - كۇيىن ساحناعا كوتەردى.

　　بۇل جولعى كونسەرتتىڭ تاعى ءبىر ەرەكشەلىگى «اپام ۇرسادى»، «توي» سىندى ەكى كومەديانى ساتيرالىق تىلمەن ساحناعا كوتەرىپ، كورەرمەن قاۋىمدى كۇلكىگە كۇپتى قىلدى. قوعامداعى ءجۇز بەرگەن ادامگەرسىزدىك، قايىرىمسىزدىق جەرىنە جەتە سىندالىپ، اسپا - توك توي جاساۋ سالتىن سىنداپ، ادامداردى ادامگەرشىلىككە، قايىرىمدىلىققا، ۇقىپتى، ۇنەمشىل بولۋعا جەتەلەدى.

　　كوكتوعاي اۋداندىق پارتكومنىڭ ورىنباسار شۋجيى، اۋدان اكىمى ەرجان كازىم ۇلى تىلشىگە بىلاي دەدى: «ايماقتىڭ باسشىلارى كوكتوعاي اۋدانىنىڭ ناۋرىز مەرەكەسىن وتكىزۋىنە ايىرىقشا ءمان بەرىپ، نۇسقاۋ كورسەتتى. وسى جولعى كونسەرتتى التاي قالاسىنا اكەلۋدەگى ماقساتىمىز: مادەنيەتتى اۋىل - قىستاقتارعا ءتۇسىرۋ، قالالارعا جەتكىزۋ سىندى ۇندەۋگە ءۇن قوسىپ، كوكتوعايدىڭ مادەنيەتىن التايداعى ءارۇلت حالقىنا تانىستىرۋ بولدى. كونسەرتكە 3 ايلىق ۋاقىتپەن دايىندىق جاسالدى، تانىمالى ءبي رەجيسسەرى گىمىش ماعىپەر قىزىن ۇسىنىس ەتىپ، ساۋىق كەشكە جەتەكشىلىك ەتتىك. ايگىلى انشىلەر دالەلقان ادىلبەك ۇلى، گۇلنۇر اسكەرقان قىزى، كومەديانىڭ كوكەسى اتانعان قۋانتاي زاقان ۇلى قاتارلى ونەرپازدار ساۋىق كەشتە اسەم ءان سيلاپ، كوڭىلدەرىن كۇلكىمەن كومكەردى. كوكتوعاي مادەنيەتىن التاي حالقىنا اكەلىپ تانىتىپ، ءارۇلت حالقىن قۋانىشقا بولەگەنىمىزدى ماقتانىش سانايمىز، حالىق ءوزى ءبىر باعاسىن بەرە جاتار».

　　التاي قالاسىنىڭ تۇرعىنى بولات بىلاي دەدى: «كوكتوعايدىڭ ناۋرىز كونسەرتى وتە تارتىمدى بولدى، اسىرەسە، كومەديانىڭ كوتەرگەن تاقىرىبى تاماشا، كورەرمەن قاۋىمدى كۇلكىمەن قۋانتىپ تاستادى».

　　ارايلاپ جەتكەن ءاز ناۋرىز مەيرامىندا اق مول بولىپ، جىلقى جىلىمىز ىرىستى، شابىستى بولسىن، بەرەكەنىڭ شامىن جاعىپ، ءار ۇلت حالقى بالىن تاتقان، جاراسىمدى قوعام ءۇشىن، باياشات زامان ءۇشىن تالپىنىپ جاتقان ءاربىر شاڭىراققا باق بەرەكە سيلاسىن، تولاعاي تابىستار اكەلسىن دەگىمىز كەلەدى.

　　سۋرەتتەرى ارداق بەيىسقان ۇلى تۇسىرگەن

　　كەلۋ قاينارى: حالىق تورابى