اپتا ارقاۋى: شاتتىعى ەسىپ ناۋرىزدىڭ كوكتوعايدان، التايدا جىر شاشۋىن كوپكە جايعان

2014.03.07 15:36  

　　ۇسىنىس ەتىلگەن ءتىلشى مۇقامادي ءشارىپ ۇلى، باقىتقان اسەت ۇلى حابارلايدى. قىتىمىر قىستىڭ ىزعارى كەتىپ، شۋاقتى كوكتەمنىڭ حابارى جەتكەن، كۇن مەن ءتۇن تەڭەلىپ، بار تىرشىلىك جاندانىپ، قايتا قۇلپىرعان، ەلىمىزدەگى ءار ۇلت حالقى پارتيانىڭ ىستىق مەيىرىنە بولەنگەن، قيقۋلاپ قۇس جەتىپ، ادامداردىڭ اۋىزى اققا ءتيىپ، جەر ۇستىنە شاتتىق ورناپ، جەر ارقاسى كەڭىپ، كۇللى تىرشىلىك الەمى قايتا تۇلەگەن، پارتيا 18 - كەزەكتى ءۇشىنشى ءماجىلسى ءساتتى اشىلىپ، جۇڭحۋا توپىراعىن شۇلەن شۇعىلاسىنا بولەگەن ساليحالى ساتتە، كوكتوعاي اۋدانى وسىزامانعى مادەنيەتتى جەتەكشىلىككە الۋ باعىتىندا تاباندى بولىپ، 3-ناۋرىز تۇستەن كەيىن تاۋ قالاسى اتانعان التاي قالاسىندا «كەنىشتى مەكەندە ناۋرىز» اتتى ءبىر مايدان كوڭىلدى كونسەرت نومەرلەرىن قويىپ، التاي قالاسىنداعى ءار ۇلت بۇقاراسىنا رۋحاني ازىق باعىشتادى.

　　وسى رەتكى كونسەرتكە ايماق، اۋدان باسشىلارى، اۋداننان دەمالىسقا شىققان قارت كادرلار، ەگىنشى - مالشىلار، التاي قالاسىنداعى ءار ۇلت كورەرمەندەرىنەن بولىپ 500 گە جۋىق ادام قاتىناسىپ، كوڭىلدى كونسەرت نومەرلەرىنەن كوز ايىم بولدى. اۋداندىق كوركەمونەر ۇيىرمەسىنىڭ ارتيستەرى مەن اۋىل ونەرپازدارى ءۇش ايعا جۋىق ۋاقىتپەن تىڭعىلىقتى دايىندالعان ناۋرىز كونسەرتىندە كوكتوعاي اۋدانىنداعى ونەرپازدار وزدەرى جاراتقان «تاۋ ىشىندە اۋىلىم» قاتارلى اندەر ەستىگەن جاننىڭ قۇلاق قۇرىشىن قاندىرسا، «اپام ۇرسادى»، «توي» قاتارلى كومەديالار ەزۋ جيعىزباس تارتىمدىلىعى ارقىلى كورەرمەندەردى كۇلكىگە بولەدى. دالەلقان ادىلبەك ۇلى، گۇلنۇر اسكەرقان قىزى، ەرعالي نۇرزادا ۇلى قاتارلى مىقتى انشىلەرمەن كومەديك قۋانتاي زاقان ۇلىنىڭ ونەر كورسەتۋى كونسەرتتى ءوز مارەسىنە جەتكىزدى.

　　اۋداننىڭ وسى رەتكى تاجىريبە الماستىرۋ سيپاتىنداعى التاي قالاسىندا قويىلعان ناۋرىز ساۋىق كەشى كورەرمەندەردىڭ قۇلاق قۇرىشىن، كوز مەيىرىن قاندىرىپ، بارەكەلدى ايتقىزۋمەن قاتار كەنىشتى مەكەن كوكتوعايداعى ءار ۇلت حالقىنىڭ قول ۇستاسىپ العا باساتىن، جۇڭگو ارمانىن ورىنداۋ ءۇشىن ورتاق قۇلشىناتىن، باياشاتتى دا ىنتىماقتى، تىنىستى تىرلىگىن ايشىقتى بەينەلەپ بەردى.

　　مۇقامادي ءشارىپ ۇلى: كوكتوعاي اۋداندىق راديو - تەلەۆيزيا مەكەمەسى

　　باقىتقان اسەت ۇلى: كوكتوعاي اۋداندىق مال - شارۋاشىلىق مەكەمەسى

　　كەلۋ قاينارى: حالىق تورابى