كوركەم ىلەدە ناۋرىز

حابارىن جازىپ سۋرەتتەرىن تۇسىرگەن باقىتبەك ءجۇمادىل ۇلى

2014.03.10 16:53   كەلۋ قاينارى : حالىق تورابى

　　كونسەرتتىڭ بەتاشار ءبيى «تۇلپار ءدۇبىرى»

　　ىلە قازاق اۆتونوميالى وبلىسىنىڭ جىلقى جىلعى ناۋرىز مەرەكەسىن تويلاۋعا ارنالعان «كوركەم ىلەدە ناۋرىز» اتتى تەلەۆيزيا كونسەرت كەشى 8-، 9-ناۋرىز كۇندەرى ىلە تەلەۆيزياسىنىڭ كونسەرت زالى جانە قۇلجا قالاسىنداعى اۋىل شارۋاشىلىق 4-شى مادەنيەت ورتالىعىندا جەكە-جەكە تۇرلىشە مازمۇندا سالتاناتتى ءوتتى.

　　الدىنعى مايدانداعى كونسەرت نومىرلەرى حانزۋ، قازاق، قىرعىز، ۇيعۇر، قاتارلى 6 ۇلت تىلىندە ازىرلەنىپ، كونسەرت مازمۇن جانە فورما جاقتان ىلەدەگى ءار ۇلت حالقىنىڭ باقىتتى تۇرمىسىن، دامۋعا بەت العان ورنىقتى دا بەرەكەلى قوعامنىڭ ءسان-سالتاناتىن، ىلە وبلىسىن سالالار بويىنشا سۇيەمەلدەپ كەلە جاتقان جياڭسۋ ولكەسىندەگى كادرلار مەن حالىقتىڭ ىلەدەگى ءار ۇلت حالقىنا دەگەن قالتقىسىز كومەگى سياقتى كەلەلى تاقىرىپتار ايقىن بەينەلەندى. وسى مايدان كونسەرتتى ىلە تەلەۆيزياسى حانزۋ، قازاق، ۇيعۇر تىلدەرىندەگى كانالداردا الداعى كۇندەردە كورەرمەندەرمەن جۇزدەستىرەدى.

　　سوڭعى مايدان كونسەرت كىلەڭ قازاقشا بولدى دا، بۇندا ىلە وبلىستىق ءان-ءبي ۇيىرمەسىندەگى ونەرپازدار مەن وبلىسقا توتە قاراستى ءار قايسى اۋدانداردىڭ ونەرپازدارى دالانى دا، قالانى دا دۋمانداتىپ، تۇلپاردىڭ دۇبىرىمەن جەر جۇيكەسىن جۇمسارتىپ كەلىپ جەتكەن جىلقى جىلعى «ۇلىستىڭ ۇلى كۇنىن» اسقاق ءان، اجارلى بىيمەن قارسى الاتىن حالىقتىق ءداستۇر، سالتىمىزدى بوياۋى قانىق كوركومونەرلىك ورەمەن بەينەلەپ، جۇرت كوڭىلىن جاىدراتتى. وسى مايدان كونسەرتتى 22-ناۋرىز كۇنگى ۇلىستىڭ ۇلى كۇنىنە ارنالعان مەرەكە قارساڭىندا بۇكىل ەلدەگى كورەرمەندەرمەن جۇزدەستىرمەككە شينجياڭ تەلەۆيزياسى كەسكىنگە ءتۇسىردى.

　　وبلىستىڭ ءتورت باسشىلىق القاسىنداعى باسشىلار جانە ءبىر ءبولىم زەينەتكە، دەمالىسقا شىققان قارتتار ۋاكىلدەرى مەن ءار ۇلت كادر جۇرتشىلىعىنان ەكى مايداندا جيىنى 1500دەن ارتىق ادام كونسەرتتى تاماشالادى.

　　ىلە وبلىسى قۇرىلعاندىعىنىڭ 60 جىلدىعىن قۇتتىقتاۋعا ارنالعان كولەمدى ءان-ءبي «وبلىسىم» جانە «ناۋرىز»، «كوركەم مەكەن ىلە» قاتارلى ءان-ءبي نومىرلەرى مەن جاستاردىڭ توپتىق ءبيى جانە «ارلان» توبىنىڭ ءداستۇرلى كۇركىرەمەسى حالىقتىق كوركومونەردىڭ زامانا مادەنيەتى مەن ۇشتاسقان كەمەلدى ورەسىن بايقاتسا، ساۋىق كەشتى تاماشالاعان قالىڭ قاۋىم وسى ەكى مايدان ساۋىق كەشتىڭ ۇزىن ىرعاسىنان ىلەدەگى ءار ۇلت حالقىنىڭ بەرىك ىنتىماقتا بولىپ، «دوڭگەلەك داۋلەتتى قوعام قۇرۋ» ۇلى نىساناسىنا ات سالىسىپ جاتقان رۋحاني بەينەسىن ايقىن اڭعارىپ، پارتيا مەن ۇكىمەتتىڭ حالىقتىق مادەنيەتتى وركەندەتۋگە ءمان بەرىپ، حالىق تۇرمىسى قۇرىلىسىن جاقسارتۋدى نەگىز ەتكەن ۇلى نىسانداردى ورىنداۋعا قۇلشىنىپ وتىرعان ابزال ساياساتىن تولىق سەزىندى.

　　كەلۋ قاينارى: حالىق تورابى