بەيجيڭدە اباي قۇنانبايەۆتىڭ ءمۇسىنى بوي كوتەردى

2014.03.20 09:48   كەلۋ قاينارى : حالىق تورابى

　　قازاقستاننىڭ سىرتقى ىستەر مينيسترى ەرلان ىدىرىسوۆ جۇرەك جاردى لەبىزىن بىلدىرۋدە.

　　حالىق تورابى، بەيجيڭ، 20 - ناۋرىز. كەشە ەلدى ەلەڭ ەتكىزەرلىك قۋانىشتى وقيعاعا كۋا بولدىق، ارينە، وقيعا دەپ ايتۋعا تاتىرلىق جاعداي. قازاقتىڭ ۇلى ويشىلى، حاكىم ابايدىڭ ەسكەرتكىشى ءنان قالا بەيجيڭنىڭ ورتالىعىنداعى چاۋياڭ ساياباعىندا بوي كوتەردى. قازاقستاننىڭ سىرتقى ىستەر مينيسترى ەرلان ىدىرىسوۆ، قازاقستاننىڭ جۇڭگودا تۇراتىن باس ەلشىسى نۇرلان ەرمەكبايەۆ قاتارلى ديپلوماتتار، جۇڭگو مەملەكەتتىك ساياسي كەڭەس مۇشەسى، بەيجيڭ جينتاي كوركەمونەر سارايىنىڭ باستىعى، بەيجيڭدەگى اباي ءمۇسىنىنىڭ اۆتورى يۋان شۇيكۇن قاتارلى قوناقتار، بەيجيڭدەگى قازاق قىزمەتكەرلەر، ستۋدەنتتەر وسى ءبىر ءمانى مەن ماڭىزى بولەك يگى ىسكە كۋا بولدى.

　　قازاقستاننىڭ سىرتقى ىستەر مينيسترى ەرلان ىدىرىسوۆ بۇل يگى شارا توڭىرەگىندە جۇرەك جاردى قۋانىشىمەن ءبولىسىپ، اباي اتا ءمۇسىنىن اينىتپاي سالعان يۋان شۇيكۇن مىرزاعا العىس ايتتى. يۋان شۇيكۇن مىرزا اباي ءمۇسىنىن جاساۋ تۋرالى 2012 – جىلى سول كەزدەگى مەملەكەت ءتوراعاسى حۋ جينتاۋ جولداسقا ۇسىنىس جاساعانىن ماقتانىش سەزىمىمەن بايانداپ، قازاقتىڭ ۇلى ويشىلى، باس اقىنى اباي تۋرالى تەرەڭ تۇسىنىگىن تانتتى، ىلە – شالا قازاقتىڭ قارا كوزى ابايدىڭ «عىلىم تاپپاي ماقتانبا» اتتى ولەڭىن جاتقا زاۋلاتسا، چاۋياڭ رايونىنداعى بەلگىلى باستاۋىش مەكتەپتىڭ وقۋشىسى باي يۇيچۋان ابايدىڭ قارا ءسوزىن حانزۋ تىلىندە ناشىنا كەلتىرە وقىدى. سالت سوڭىندا ءوسپىرىم ونەرپازدار اباي اندەرىن شىرقاپ، اباي ولەڭدەرىن وقىدى.

　　بۇل يگى شارا حالقىمىز ءۇشىن بىرلىك، بەرەكە ايى، جىل باسى سانالاتىن ناۋرىز ايىنىڭ جايماشۋاق كۇنىندە ءساتتى اياقتادى. عاسىر بۇرىن ساحارادا حالقىنىڭ قامىن جەپ، تەرەڭ فيلوسوفيالىق ويلار قورتقان اباي اتانىڭ بەيجيڭ چاۋياڭ ساياباعىنداعى كول بويىندا ويعا شومىپ وتىرعان ءمۇسىنى الدىندا قۋانا – قۋانا سۋرەتكە ءتۇسىپ، رۋحىمىز ءوسىپ اتتاندىق.

　　كەلۋ قاينارى: حالىق تورابى