بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

ءۇمىت ۇرپاقتاردا

قاليبەك كەنجە ۇلى

2014.04.16 13:03   كەلۋ قاينارى : حالىق تورابى



  باسپا سالاسىندا قىزمەت ىستەگەنىمە تابانى كۇرەكتەي قىرىق جىلدىڭ ءجۇزى بولىپتى، جەتپىستى ەڭسەرىپ، ءومىرىمنىڭ كوپ شىجىعى مەن قىزىعىن استانامىز بەيجيىڭدە وتكىزىپپىن، اۋ باستا كوپتەگەن دۇنيەلەرگە بالا بوپ قاتىناسىپ، كوزىمىزبەن كورىپ، بۇگىن شال بوپ، باتا بەرەتىن جەتپىستى جەلكەلەپپىن، كۇنى كەشە قازاقتىڭ جاڭا ءبىر جىل باسى ناۋرىزدىڭ بەيجيىڭدەگى 32-رەتكى مەرەكەسىن وتكىزدىم.

  سامارقاننىڭ كوك تاسى ەرىگەن جىل باسى، سالتاناتتى ناۋرىز مەرەكەسىن، جەر-جەردە ءتۇرلى كولەمدە وتكىزگەنىن ەستىدىك، ارىسى حالقارادا بىرلەسكەن مەملەكەتتەر ۇيىمىنىڭ ءتوراعاسى پان جيۋىن دۇنيە جۇزىندەگى ناۋرىز وتكىزەتىن ۇلتتارعا مەرەكەلىك سالەم جولداسا, ال ەلىمىزدىڭ مادەنيەت، ەكونوميكا، ساياسي ورتالىعى بولعان حانبالىقتا جىل باسىنىڭ اق تىلەگىن، تىلەۋ كوجە جاساپ، مارە-سارە بولىپ تويلاپ، ناۋرىزعا ارنالعان كولەمدى ساۋىق كەش، مەكەمە ورىنداردىڭ باس بولىپ تويلاۋى مەن ءاربىر رايونداردا اتالمش شاراعا ارنالعان ناۋرىز كەشى كوركەمدىك پەن ىزگىلىككە ۇمتىلعان قازاق ستۋدەنتتەرى جاعىنا قاراي ويستى. وسىنداعى مەكتەپتەردەگى قازاق وقۋشىلاردىڭ ناۋىز تويى بولىپ ءوتتى، ءبىر قانشاسىنا دا بارىپ قاتىناستىق، سونىڭ ىشىندە وزىمە وي تاستاعان، اتا بوپ بارىپ، ىستىق ىقىلىسىممەن باتا بەرىپ قايتان چاۋ ياڭ رايونىنداعى سىرتقى ەكونوميكا ساۋدا ۋنيۆەرسيتەتى، جۇڭگوشا ەمشىلىك ۋنيۆەرسيتەتى، حيميا ونەركاسىپ ۋنيۆەرسيتەتى، بەيجيىڭ بىرلەستىك مەكتەبى سىندى ءتورت جوعارى مەكتەپتەگى قازاق وقۋشىلارىنىڭ بىرلەسىپ وتكىزگەن ناۋرىز مەيرامى مەنى ءبىر جاساتىپ، ۇلتىمىزدىڭ بولاشاق ۇرپاقتارىنان ۇلكەن ۇمىت پەن ارمان ارقالاپ قايتتىم.

  جىل باسى ناۋرىزعا دەگەن جۇرتتىڭ كوڭىلىندەگى تىلەگى مەن ساعىنىشىنا تابيعاتتا ىرازىلىعىن بەرگەندەي، كۇندە ىس-تۇتەك بولىپ تۇراتىن بەيجيىڭنىڭ اۋاسى ناق بۇگىن وزگەشە اشىق بولدى. كوكپەڭبەك اسپان، تاپ-تازا تۇنىق اۋا، جادىراعان جانعا جايلى كۇن نۇرىنا كوكتەمنىڭ قوڭىر سالقىن سامالى قوسىلىپ ناۋرىزدىڭ تاڭەرتەڭى ادامعا تۋعان جەردىڭ تابيعاتىن ەلەستەتىپ، ساعىنىشىن ارقالاتىپ تۇرعان ساتتەردە ۇلتتار باسپاسىنىڭ تەتا اعا رەداكتورى، مەڭگەرۋشىسى باقىتبەك توقتاسىن ۇلى تەلەفون شالىپ، ناۋرىزدىڭ اق تىلگىن ايتا كەلىپ، وسى ءبىز تۇرعان رايونداعى ءتورت جوعارى مەكتەپتىڭ ستۋدەنت وقۋشىلارى وزدەرى ىنتىماقتاسىپ، وزدىكتەرىنەن ۇيىمداسىپ، ناۋرىز مەرەكەسىن تويلاماقشى ەكەنىن، سوعان مەنىڭ بارىپ قاتىناسىپ، باتا بەرىپ قايتۋىما رۇقسات سۇراعان بۇيىمتايىن ايتىپ ءوتتى. ريزاشىلىدىعىمدى بىلدىرگەننەن كەيىن. بالالارىمنىڭ ناۋرىز مەرەكەسىن تويلاۋعا ات باسىن بۇردىم.

  كەلە جاتقان كەزىمدە ءبىر-ءبىر ءۇيدىڭ ەركەلەتىپ وسىرگەن بالالارى قازىرگى مىناۋ زاماننىڭ ءتۇرلى جاعىمىسىز قىلىقتارىن جۇقتىرىپ الدى ما، سالت ءداستۇرىن بىلە مە، سىرا ءىشىپ سىلقيىپ وتىراما؟ دەگەن كوڭىلىمدە كۇدىك كۇماندا وزىممەن بىرگە باردى. ءبىراق ۇلتتىق كيىم كيىپ، سالەم بەرىپ جۇگىرىپ شىققان ۇل قىزدارىمدى، رەتتى ورنالاستىرعان قيمىلدارى مەن تۇنىق قازاق تىلدە تومپاڭداپ جۇگىرىپ جۇرگەن جىلى جۇزدەرىن كورگەندە بىراز سەيىلىپ سالا بەردى. داستارقاندارى وتە مول، قازاقي جاسالىپ، جەڭلدەۋ سايلەرىنىڭ ورتاسىنا تىلەۋ كوجەلەرى مەن سىباعالارىن ءتىزىپ قويان جونداتىپ قويىپتى. باتا جاسالىپ، كوجەلەرىنەن ءدام تاتتىم، اينا قاتەسىز باياعى ءدامدى تىلەۋ كوجە، قاڭسىعان كەڭسىرىكتى اشىتىپ، بالا-شاعالاردىڭ سىباعاسىنا دەيىن ءىشىلدى.

  تاماق اراسىنداعى اڭگىمەدەن ءبىلدىم. تىلەۋ كوجەنى بالالار ۇيلەرىنەن ارناۋلى قاتىق الدىرىپ، وزدەرى جاساپتى، ال قازىرگى جاستاردان بۇرىن ۇلكەندەرىڭ كوبى بىلە بەرمەيتىن تاباق تارتۋ جول-جورالعىلارىن كىشكەنە كەزدەرىنەن حانزۋشا مەكتەپ وقىعان وسى بالالار بىلەتىن بولىپ شىقتى، اۋىل ءيسى مۇڭكىپ تۇرعان اقسارى قىزدان «قىزىم كىمنىڭ بالاسىسىڭ؟ مىناۋ ءسۇرى ۇيدەن الدىردىڭدار ما؟ وسىنداي قيمىلداردى ارناۋلى وتكىزىپ، سەندەردىڭ جۇمىستارىڭا جەتەكشىلىك ەتەتىن، مەكەمە ورىن بولماسا جەكە ادامدار بار ما؟» دەپ ءجون-جوسىنىن بىلەيىن دەپ سۇراۋ سۇراپ ەدىم، يباسى مەن ىزەتى بەتىنىڭ شۇڭقىرىنا تۇنعانداي بولعان جىلى ءجۇزدى قىزىم: «اتا ءۇيىم ۇرىمجى دە، اكەم اتى ەركىن دۇيسەباي، مىناۋ ەتتەردى سول كىسى جىبەرىپ بەردى. جىلدا وسىنداي قيمىل وتكىزەتىنىمىزدى ەستىگەن وسىنداعى بالالاردىڭ وتباسىلارى كەزەگىمەن جىل سايىن ءبىزدىڭ قاجەتىمىزدەن شىعىپ كەلەدى. ال وسىندا سىرتقى ەكونوميكا-ساۋدا ۋنيۆەرسيتەتىندە وقىپ، وقىتۋشى بولىپ قالعان ريزا رايىمبەك قىزى بىزگە ۇيىنەن كوجە جاساپ، بىزگە ۇيرەتىپ جول كورسەتىپ ءجۇر، ءبىر جاعىنان ۇيرەنىپ، ءبىر جاعىنان ارتتاعى سىڭلدەرىمىزگە ۇيرەتىپ كەلەمىز. ەتتى دە ۇل ساباقتاستار وزدەرى پىسىرىپ، تاباق جاسايدى، ونى دا بىزدەن بۇرىنعى كىلاستاعى تاجىريبەلى اعالارىمىز وسىنداي ونەگە قىلعان» دەدى.

  ساعات ەكى دە باستالعان ويىن نومىرلەرى ءۇش ساعاتقا جالعاسىپ ءوز مارەسىنە جەتتى. وسى اراعا تاماققا كەلگەن باسقا ۇلتتىڭ قوناقتارى كۇمبىرلەتىپ تارتىلعان دومبىرا كۇيىنە، اسقاقتاتىپ سالعان ءان اۋەنىنە، باتىستىڭ قيىندىق ورەسى جوعارى بيلەرى مەن سەرىك ويىندارىنا، قارا جورعا سەكىلدى ۇلتتىق ءداستۇرلى بيلەرگە قاراپ، تامسانىپ تاماشالاپ، ريزا بوپ دۋماندانىپ جاتتى.

  ەت جەپ، كوجە ءىشىپ، ناۋرىز تويلاپ، يبالى مىنەزدەرى مەن جاراسىمدى ىنتىماقتى اسىل قاسيەتتەرىن بويلارىنا القا قىلىپ تاققان، ەلدى تامساندىرعان قىلقتى قىزدارىم مەن ۇجداندى ۇلدارىما قاراپ، قاي ءبىر جىلدارداعى ستۋدەنتتەر ءبىر قولىنا قالام السا ءبىر قولىندا شاراپ الاتىن، قوعامنىڭ كەراناۋ قىلقتارىنان بۇگىنگى بالالار بىرتىندەپ ايىعىپ، ناعىز سانالى ءبىلىمدى ستۋدەنتتەر كوبەيسە دەگەن ارمان ارقالاپ قايتتم.

  ناۋرىز ايى − جىلدىڭ باسى، جەتى دامنەن قۇرام تاپقان ءدامدى كوجەنىڭ ءمانى دە كوپشىلىكتى بەرەكەگە، جاقسىلىققا، اق نيەت پەن اق تىلككە شاقىرادى. ناۋرىزدا ايتىلاتىن تىلەكتەردە اق بولادى. ۇرپاقتارىمىزعا اشىق سانا، بەرەكە-بىرلىك باعىشتاعان ۇلىستىڭ ۇلى كۇنى ۇلى وتانىمىزعا حالقىمىزعا تىنىش-بەيبىت ءومىر سيلاسىن، ۇلىس وڭ بولسىن!

  كەلۋ قاينارى: حالىق تورابى

【1】 【2】 【3】 【4】 
جاۋاپتى رەداكتورى : مۇحيت امانتاي ۇلى

 سۋرەت