بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

كوكتوعاي اۋدانىنىڭ كوكەناي اتىنداعى ەكىنشى كەزەكتى قازاق كۇرەسى جارىسى كوزدەگەن ماقساتىنا جەتتى

2014.05.16 10:36   كەلۋ قاينارى : حالىق تورابى



  ەرىكتى ءتىلشى مۇقامادي ءشارىپ ۇلى، باقىتقان اسەت ۇلى حابارلايدى.

  كوكتوعاي اۋدانى 12-مامىردا اۋداندىق سپورت زالىندا كوكەناي اتىنداعى ەكىنشى كەزەكتى قازاق كۇرەسى جارىسىن وتكىزدى. وسى رەت قازاق كۇرەسىمەن بىرگە بۇقا تارتىس، قول باسىسۋ جارىستارى بىرگە وتكىزىلدى. اۋدانعا قاراستى بەس اۋىل، بەس قالاشىقتان كەلگەن بالۋاندار مەن سپورتشىلار جارىسقا قاتىناسىپ، ءوز ونەرلەرىن ايگىلەدى. جارىستىڭ باستالۋ سالتىن اۋداندىق پارتكومنىڭ ورىنباسار شۋجيى، اۋداندىق ۇكىمەتتىڭ اكىمى ەرجان كازىم ۇلى باسقاردى.

  قازاق كۇرەسى قازاق ۇلتىنىڭ اتام زاماننان بەرى جالعاسىپ كەلە جاتقان ازاماتتاردىڭ ەركىن شىڭداپ، ەرلىك جىگەرىن سومدايتىن، ەل نامىسىن قورعاۋشىلاردان بولۋعا تاربيەلەيتىن ءداستۇرلى سپورت قيمىلى بولىپ، كەڭ بۇقارالىق نەگىزى بار. وتكەندە كوكتوعاي اۋدانىنان شىعىپ، اتى اڭىزعا اينالعان قايسا، كوكەناي، قاناتاي، شەرديمان، جاپپار، مەيرانبەك، تۇرسىن قاتارلى اعا بۋىن بالۋاندار ەل ءىشى-سىرتىنداعى تالاي رەتكى بايراقتى ارىستارعا قاتىناسىپ، كورنەكتى ناتيجەلەر جاراتىپ، ەل نامىسىن قورعاپ، اۋداننىڭ سونداي-اق التاي ايماعىنىڭ، اۆتونوميالى رايوننىڭ سپورت ىستەرىن دامىتۋعا ەسەلى ۇلەس قوسسا، سولاردىڭ ءىزىن باسقان جاس پالۋاندار مەن باسقا سپورت تۇرىمەن شۇعىلداناتىن ساڭلاقتار تالاي رەتكى جارىستاردا اۋداننىڭ داڭقىن اسىردى. قازاق كۇرەسى ءوزىنىڭ بوگەنايى بولەك ەرەكشەلىگى، دەنە شىنىقتىرۋ، يرادانى شىڭاۋداعى ەرەكشە رولى، ەرەجە قاعيدالارىنداعى عىلىميلىعىمەن بۇگىنگى كۇندە قازاق حالقى عانا ەمەس، دۇنيە جۇزىندەگى كوپتەگەن حالىق ءسۇيىپ شۇعىلداناتىن، قىزىعىپ كورەتىن سپورت تۇرىنە اينالىپ، ىقپالى مەن بەدەلى بارعان سايىن جوعارىلاپ بارادى.

  «ەلۋ ەردىڭ جاسى» دەگەن اتالى ءسوزىمىزدى سول كۇنگى جارىستا قايرات اۋدىعان ۇلى ايتقىزباي-اق ءتۇسىندىرىپ كەتتى. ەلۋدىڭ تابالدىرىعىن اتتاسا دا ادۋىن كۇشىنەن ايىرىلماعان بالۋان وڭكەي ءبىر «سەن تۇر، مەن اتايىن» دەيتىن بالعىن جاستارمەن بەلدەسسە دە ەنتىگىپ، القىنباستان جامباستارىن جەر يىسكەتتىرىپ كەتتى. كلۋب تولى كورەرمەن قاس پەن كوزدىڭ اراسىندا بۇرىق ەتە تۇسكەن جاس بالۋانعا دا قايراتتىڭ جولىن بەرسىن دەپ تىلەك تىلەدى. ەسكەرتە كەتەر بولساق، قايرات مەملەكەتتىك، رايوندىق، ايماقتىق تالاي رەتكى جارىستىڭ جەڭىمپازى اتالىپ جۇرگەن بەتكە ۇستار ونەر ساڭلاقتارىنىڭ ءبىرى. ءالى جيىرماعا تولماعانءوسپىرىم بالۋان تىلەكتىڭ بوز كىلەمنىڭ ۇستىندەگى شيراق قيمىلى دا كورەرمەنىن رازى ەتتى.

  قازاقتىڭ قايراتىن ايگىلەيتىن ونەر تۇرلەرىنىڭ تاعى ءبىر ءتۇرى بۇقا تارتىس. بۋرا سان، بۇقا مويىن، باقان ساۋساق الىپ ازاماتتار «ءاۋپ» دەپ ايعايلاپ جىبەرىپ، تۇقىرا سۇيرەگەندە كوپ كورەرمەننىڭ اۋزى اڭقيىپ، تاڭعالا، تاڭىرقاسىپ قالدى. قول باسىسۋ ــ بۇل دا قازاق كۇشىن، اسىرەسە، بىلەك كۇشىن ايگىلەيتىن ونەردىڭ تاماشا ءبىر سالاسى. قاجىمۇقان قايراتتى، سولتىكەن بىلەكتى ازاماتتار بۇل جارىستا دا ءوز ونەرلەرىن ايگىلەدى.

  جارىس ناتيجەسىندە كوكتوعاي اۋدانى قۋەرتىس قالاشىعى كوللەكتيۆ ءبىرىنشى بولسا، قايرات اۋدىعان ۇلى قاتارلى ءار سالماقتىڭ بەس بالۋانى باس جۇلدەنى قانجىعاسىنا بايلاندى. كوكتەمنىڭ ءوندىرىسى ەندى - ەندى سايابىرلاپ كەلە جاتقان كەزەڭدە كوكتوعايداعى ءار ۇلت حالقى وسىلايشا شاتتىققا شومىپ، مارە - سارە بولىستى.

  كەلۋ قاينارى: حالىق تورابى

【1】 【2】 【3】 【4】 
جاۋاپتى رەداكتورى : نۇرعيسا قۇرمانجان ۇلى

 سۋرەت