شاڭحايدان ۇرىمجىگە ۇشقان ەكى ۇشاق «بومبا ورنالاستىرىلعان» دەگەن الاڭداۋشىلىققا بايلانىستى لانجوۋ مەن نانجيڭگە قوندىرىلدى

2014.05.23 15:54   كەلۋ قاينارى : حالىق تورابى

　　حالىق تورابى، 22 – مامىر، شاڭحاي. بۇگىن (22 – مامىر) جيشياڭ اۆياتسيا سەرىكتىگىنىڭ شاڭحايدان ۇرىمجىگە ۇشقان جولاۋشىلار ۇشاعى «بومبا ورنالاستىرىلعان» دەگەن الاڭداۋشىلىققا بايلانىستى ورتا جولدا لانجوۋ مەن نانجيڭگە قونعان.

　　جيشياڭ اۆياتسيا سەرىكتىگى جاريالاعان مالىمەتكە قاراعاندا، ۇرىمجىگە باراتىن HO1255 كەزەكتى ۇشاعى شاڭحاي حۇڭچياۋ اۋەجايىنان سول كۇنى ساعات 10نان 18 مينۋت وتكەندە ءساتتى ۇشقان. ساعات 12دەن 16 مينۋت وتكەندە جيشياڭ اۆياتسيا سەرىكتىگى ۇشاق قىزمەتكەرلەرى جولداعان مالىمەتتى تاپسىرىپ العان، ۇشاق لانجوۋدان ءوتىپ بارا جاتقاندا، ۇشاقتاعى ءبىر جولاۋشى ۇشاق قىزمەتكەرلەرىنە قاعازعا جازىلعان ينفورماتسيانى جەتكىزگەن، ول ساپارلاسىنىڭ كەشىگىپ قالعاندىقتان، ۇشاققا ۇلگىرمەي قالعانىن، تەلەفوندا «ۇشاقتى پارتىلاتامىن» دەپ كىجىنگەنىن ايتقان، ساپارلاسىنا كومەكتەسىپ الا شىققان جۇكتەردىڭ اراسىندا كۇماندى زاتتاردىڭ بولۋىنان الاڭداپ، بۇل حاباردى ۇشاق قىزمەتكەرلەرىنە جەتكىزگەن. ۇشاق قىزمەتكەرلەرى جەر بەتىندەگى مەڭگەرۋ ورتالىعىمەن دەرەۋ حابارلاسىپ، شۇعىل جاعدايلارعا توتەپ بەرۋ ءتارتىبىن ىسكە قوسقان، بۇل ۇشاق ساعات 13تەن 29 مينۋت وتكەندە لانجوۋ اۋەجايىنا حاۋىپسىز قونعان، بارلىق جولاۋشىلار ۇشاقتان امان – ەسەن ءتۇسىپ دەمالعان. لانجوۋ اۋەجاي قوعام حاۋىپسىزدىگى مەكەمەسى بۇل ءىستى تەكسەرۋگە كىرىستى.

　　HO1255 كەزەكتى ۇشاقتاعى مالىمەت بەرگەن جولاۋشى ساپارلاسىنىڭ جيشياڭ اۆياتسيا سەرىكتىگىنىڭ ۇرىمجىگە باراتىن HO1229 كەزەكتى ۇشاعىنا وتىرعانىن ايتقان، HO1229 كەزەكتى ۇشاق ساعات 13تەن 15 مينۋت وتكەندە حۇڭچياۋ اۋەجايىنان ۇشقان. حاۋىپسىزدىككە كەپىلدىك ەتۋ ءۇشىن، جيشياڭ اۆياتسيا سەرىكتىگى HO1229 كەەزكتى ۇشاعىنا نانجيڭ اۋەجايىنا قونۋدى ۇقتىرعان، بۇل ۇشاق ساعات 14تەن 22 مينۋت وتكەندە نانجيڭ اۋەجايىنا حاۋىپسىز قونعان. نانجيڭ اۋەجايى قوعام حاۋىپسىزدىگى مەكەمەسى بۇل ءىستى تەكسەرۋگە كىرىستى.

　　كەلۋ قاينارى: حالىق تورابى