كوركەمدىك الەمىنە كوپىر سالىپ

تۇرسىنجان جاناتاي ۇلى

2014.08.04 15:09   كەلۋ قاينارى : حالىق تورابى

　　فوتو ونەرى - تاڭعاجايىپ تابيعات دۇنيەسىندەگى مىلقاۋعا ءتىل، جانسىزعا جان بىتىرەتىن، كورگەن كولدەنەڭ كوزدى كوركەمدىك الەمىنە باستايتىن، ءتىل جەتكىسىز كوركەمدىگىمەن جۇرەكتى جاۋلاپ الىپ، ادامنىڭ جۇيكە - جۇيكەسىن شىمىرلاتىپ، شەكسىز ەستەتيكالىق ءلاززات باعىشتايتىن ءتىلسىم دە قۇدىرەتتى ونەر. ۇلتىمىزدا وسى ونەردىڭ دامۋى الىدە باياۋ ەكەندىگى كوپكە ايان. ءبىز ۇلتىمىزدان وسى ونەرگە جان - تانىمەن عاشىق بولىپ، ءوزىنىڭ زور قۇلشىنىسىنىڭ ارقاسىندا فوتونىڭ بالزامىنان سۋسىنداپ، جان سەبىل جاپاكەشتىگىمەن فوتو ونەرى سىندى الىپ تەڭىزدىڭ تۇبىنەن گاۋھار تەرىپ، وزگە ۇلت فوتوگراپتارىمەن ۇزەڭگى سوعىستىرىپ كەلە جاتقان ءبىر توپ ۇزدىك فوتوگراپتارىمىزبەن قۋانباي تۇرا المايمىز. سونىمەن قاتار فوتو ونەرى ساحىناسىنا ارنايى ات باسىن بۇرعان جاس فوتوشىلارمەن فوتو اۋەسكەرلەرىنىڭ كۇن سايىن كوبەيىپ كەلە جاتقانى ءبىزدى تىپتى دە مارقايتىپ تاستايدى.

　　«تالىقپايتىن ادام تابىسقا، ارىمايتىن ادام ارمانىنا جەتەدى» ارينە، فوتوشى بولسام، وسى سالاعا كىرپىش بولىپ قالانسام - دەپ ىنتالانىپ جۇرگەن جاس فوتوشىلار مەن فوتو اۋەسكەرلەرىنىڭ جىگەرىنە قامشى باسىپ، دۇرىس باعدار كورسەتىپ كەلە جاتقان ۇلت جاندى اعامىز، مەملەكەتتىك ەتنوگرافيالىق (سالت-سانا) فوتو سۋرەتشىلەر قوعامىنىڭ ماگىستىرى، اۆتونوميالى رايوندىق فوتو سۋرەتشىلەر قوعامىنىڭ مۇشەسى، التاي ايماقتىق فوتو سۋرەتشىلەر قوعامىنىڭ ورىنباسار ءتوراعاسى، كورنەكتى فوتوگراب سەرىك مۇقىش ۇلىن ەرەكشە اتاپ وتەر ەدىك. سەكەڭ باستاماشى بولىپ قۇرعان «قازاق فوتو سۋرەتشىلەر قوعامىنىڭ» 3 جىلدان بەرى قاناتى ۇشتالىپ، قوسىنى كۇن سايىن مولايىپ كەلەدى. ءار جىلى ءتۇرلى قيمىلدار وتكىزىپ، ۇلتىمىزدىڭ مايەكتى مادەنيەتىن ءار قىرىنان بەينەلەيتىن مايدانعا ياكي كورىكتى جايلاۋ توسىندە، اقىندار ايتىسىندا فوتوگرابتاردىڭ ءبىلىمىن مولىقتىرىپ، تارتىمدى شىعارما تۋىنداتۋىنا وراي جاراتىپ وتىردى. ال بيىل ات باسىن اۋىل - قىستاق مادەنيەت اپتالىق قيمىلىنا بۇردى. ءسوزىمىزگە دالەل 19 - شىلدە التاي قالاسى الاعاق اۋىلىنىڭ مالشىلار مادەنيەت اپتالىق قيمىلى تاماشا تابيعاتىمەن تامام جۇرتتى ءتانتى ەتكەن تورعايتى جايلاۋىندا بولىپ ءوتتى. الاعاق اۋىلدىق پارتكومنىڭ مۇشەسى، فوتو جانكۇيەرى، بەلگىلى فوتوشى ەرجان مۇقامەت ۇلى اتالعان قيمىلعا قازاق فوتوشىلارىن ارنايى شاقىرىپ، تورعايتىنىڭ تامىلجىعان تاماشا تابيعاتىنان سۋسىنداپ، كوركەم تابيعاتتى فوتو كوزى ارقىلى كوپكە ۇگىتتەۋگە ۇسىنىس ەتتى. فوتشىلاردىڭ قاتارىندا مەندە ءمانى بولەك وسى قيمىلعا قاتىناسىپ، تەرەڭ اسەر الىپ قايتتىم. قيمىل سوڭىندا ۇلتىمىزدىڭ ءتۇرلى ات ويىندارى مەن ءداستۇرلى دەنە تاربيە قيمىلدارىنداعى جۇلدەگەرلەرمەن قاتار فوتوگرابتاردىڭ شىعارماسىنادا ناق مايداندا باعا بەرىلىپ، ماراپاتتاۋ الىپ بارىلدى. بۇل تىڭ باستاما راسىندا قول سوعىپ قۇتتىقتاۋعا، ءوزگەلەردىڭ ۇيرەنىپ ۇلگى الۋىنا تاتيدى دەپ سەنەمىز. «ونەردى ۇيرەنۋ ءۇشىن دە ونەر كەرەك». دەمەك، ارقانداي ءبىر ونەردىڭ ءتىلىن مەڭگەرىپ، تەرەڭىنە بويلاۋ ءۇشىن تاباندى تالپىنىس پەن تالعام، قايىسپاس قاجىرلىلىق كەرەك ەكەندىگى ايقىن شىندىق. وسىعان وراي فوتو ونەرىن تەزگە سالىپ زەردەلەيتىن، ءوزارا سىرلاسىپ، سىندارلى وي تۇيەتىن «قازاق فوتو سۋرەتشىلەر قوعامىن» قۇرعان ازاماتتارعا العىستان باسقا ايتارىمىز جوق. الايدا ءتۇرلى اقپارات تاراۋلارى ۇلتىمىزداعى وسى كەنجە ونەرگە ات ۇستى قاراپ، كوڭىل بولمەي كەلە جاتقانىن جاسىرا المايمىز.

　　ۇلتىمىزدىڭ ۇشان تەڭىز مادەنيەتىن جالعاستىرۋ ءارى دامىتۋ، اتا مەكەننىڭ كوركەم تابيعاتىن فوتو كوزىمەن ايشىقتى كەستەلەۋ ءۇشىن قازاق فوتوگرابتارىنىڭ كوتەرەر جۇگى تىپتى دە اۋىر دەپ ويلايمىن. ءيا، جابىلا كوتەرگەن جۇك جەڭىل ارينە، الداعى جەردە قازاق فوتوگرابتارىنا جول بولسىن ايتامىز. ەندى قالعانىن تورعايتى جايلاۋىندا تۇسىرىلگەن كوركەم سۋرەتتەر سويلەسىن. سۋرەتتە: تورعايتى جايلاۋىندا تۇسىرىلگەن كوركەم كورىنىستەر.

　　كەلۋ قاينارى: حالىق تورابى