بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>مادەنيەت

قازاق جاس وسپىرىمدەرىنىڭ 2 - كەزەكتى اقىندار ايتىسى اقساي اۋدانىندا وتكىزىلدى

2014.08.12 08:55   كەلۋ قاينارى : حالىق تورابى



  ەرىكتى ءتىلشى مارالبەك ابدىكارىم ۇلى حابارلايدى. شينجياڭ ۇيعۇر اۆتونوميالى رايوندىق ادەبيەت - كوركەمونەرشىلەر بىرلەستىگى مەن گانسۋ ولكەسى اقساي قازاق اۆتونوميالى اۋداندىق ۇكىمەت ۇيىمداستىرعان، شينجياڭ «مۇرا» جۋرنالى مەكەمەسى مەن اقساي اۋداندىق پارتكوم ۇگىت ءبولىمى وتكىزگەن 2 - كەزەكتى قازاق جاس ءوسپىرىم اقىندار ايتىسى تامىزدىڭ 7 - كۇنىنەن 9 - كۇنىنە دەيىن اقساي اۋدانىندا وتكىزىلدى. باستالۋ مۇراسىمىندە شينجياڭ ۇيعۇر اۆتونوميالى رايوندىق ادەبيەت كوركەمونەرشىلەر بىرلەستىگىنىڭ ورىنباسار ءتوراعاسى ەركەش قۇرمانبەك قىزى ماڭىزدى ءسوز سويلەدى، اقساي قازاق اۆتونوميالى اۋداندىق پارتكومنىڭ تۇراقتى جوراسى، بىرلىكساپ ءبولىمىنىڭ باسىتىعى قاليبەك سولتان ۇلى ارناۋ ءسوزىن سويلەدى. الامان ايتىس اقساي اۋداندىق ورتا مەكتەپ وقۋشىلارىنىڭ «اتا مۇرا» انىمەن شىمىلدىعىن اشتى.

  ءۇش كۇندىك الاقايمەن وتكىزىلگەن الامان ايتىستا قۇلىن تايداي تەبىسكەن بالعىن كوڭىلدى بالا اقىندار كورەرمەندەرىن قىزىقتىرا ايتىسىپ، تاماشا ازىلدەر مەن كوركەم سوزدەرىن توگە كوسىلە جىرلاپ، ايتىس ساحناسىن شاتتىققا بولەدى. كورەرمەندەر تاماشا ازىلمەن، كوركەم جىرمەن ايتىسقا تۇسكەن اقىندارىن لەك - لەك شاپالاق ۇنىمەن ساحنادا «قايتالاي ايتىسسا ەكەن» دەگەن قىزعىندى تىلەكتەرىمەن قارسى الىپ جاتتى.

  بۇل رەتكى ايتىسقا 28 بالا اقىن 10 تەرمەشى قاتىناستى. قۇمىل ايماعىنىڭ باركول اۋدانىنان كەلگەن اقىن راحات بەيبىتقان قىزى باس (ەرەكشە) جۇلدەگەر سيلىعىن جەڭىپ السا، تارباعاتاي ايماعىنان كەلگەن بالا اقىن ەرزات ءارىن ۇلى 1 - دارەجەلى جۇلدەنى جەڭىپ الدى. التاي ايماعىنىڭ اقىنى سەرىك كوشەي ۇلى، ىلە ايماعىنىڭ اقىندارى سامعار ورىنباي ۇلى مەن نۇربول تاشكىلباي ۇلى، تارباعاتاي ايماعىنىڭ اقىنى انارگۇل باقىتبەك قىزى 2 - دارەجەلى جۇلدەنى جەڭىپ الدى. ەرجانات بىرلەسبەك ۇلى قاتارلى 8 اقىن 3 - دارەجەلى جۇلدەگە يە بولدى. 10 جاستاعى بالا اقىن اقبوتا كەنجەقان ۇلى مەن ەرەن دۇيسەنعازى ۇلىنا «بالاپان اقىن» دەگەن اتاق بەرىلدى. تەرمە جارىسىندا بەردىقان مۇراتقان ۇلى 1 - دارەجەلى جۇلدەنى جەڭىپ السا، ءمارينا بولاتبەك قىزى قاتارلى 8 تەرمەشى 2 - دارەجەلى سيلىققا يە بولدى. جارىستا ۇسىنىسپەن قاتىناسقان التاي ايماعىنىڭ تەرمەشىسى ريزا راحات قىزىنا «جاس قانات تەرمەشى» اتاعى بەرىلسە، اقساي اۋدانىنان ايجارىق قايىربەك قىزىنا «جىراۋلار جىرىن ۇزدىك جاتقا ايتۋشى» اتاعى بەرىلدى. بۇل رتكى جارىستا اقساي اۋداندىق پارتكوم ۇگىت ءبولىمى قاتارلى ءتورت ورىنعا «ۇزدىك ۇيىمداستىرۋشى ورىن» دەگەن اتاق بەرىلدى.

  كەلۋ قاينارى: حالىق تورابى



  

【1】 【2】 【3】 【4】 【5】 【6】 【7】 【8】 
جاۋاپتى رەداكتورى : نۇرعيسا قۇرمانجان ۇلى

 سۋرەت