ورتالىق تەلەۆيزيانىڭ «شارىقتاسىن ءانىمىز» ونەر باسەكەسىنىڭ قازاق ونەرپازدارىنا ارنالعان ءبولىمى كەسكىنگە ءتۇسىرىلدى

تاياۋدا ورتالىق تەلەۆيزياسىنىڭ مۋزيكا ارناسىندا قويىلادى

2014.08.25 13:44   كەلۋ قاينارى : حالىق تورابى

　　جۇڭگو ورتالىق تەلەۆيزياسى «شارىقتاسىن ءانىمىز» اتىنداعى از ۇلت انشىلەرى ونەر باسەكەسىنىڭ قازاق ونەرپازدارىنا ارنالعان ءبولىمى 24 – تامىزدا بەيجيڭ داشيڭ رايونىنداعى شيڭگۋاڭ تەلەۆيزيا نومىرلەرىن كەسكىنگە ءتۇسىرۋ ورتالىعىندا ءتۇسىرىلدى. تاياۋدا ورتالىق تەلەۆيزيانىڭ مۋزيكا ارناسىندا (15 – ارنا) تاراتىلادى.

　　مەملەكەتتىك اقپارات، باسپا ءسوز، رايو – تەلەۆيزيا باس مەكەمەسىنىڭ ماقۇلداۋىمەن، مەملەكەتتىك ۇلتتىق ىستەر كوميتەتى مادەنيەت – ۇگىت ءبولىمىنىڭ جەتەكشىلىك ەتۋىمەن، ورتالىق تەلەۆيزيانىڭ مۋزيكا ارناسى 2013 – جىلدان باستاپ «شارىقتاسىن ءانىمىز» اتتى ونەر باسەكەسىن كەسكىنگە ءتۇسىرىپ تاراتا باستاعان. بىلتىرعى «شارىقتاسىن ءانىمىز» ونەر باسەكەسىندە (1 – ماۋسىمدىق) ورتالىق تەلەۆيزيانىڭ مۋزيكا ارناسى ىشكى موڭعۇل، شيزاڭ، نيڭشيا، جيلين، سىچۋان جانە گۋاڭشي قاتارلى جەتى ولكە، اۆتونوميالى رايونداعى ۇگىت بولىمدەرى جانە تەلەۆيزيا ستانسيالارىمەن سەلبەسە وتىرىپ، موڭعۇل، زاڭزۋ، ۇيعۇر، حۇيزۋ، چاۋشيان، يزۋ، جۋاڭزۋ قاتارلى 7 از ۇلتتىڭ جۇلدەگەر انشىلەرىنىڭ باسەكەسىن تۇڭعىش رەت ۇيىمداستىرىپ، حالىق اراسىنداعى دارىندى انشىلەرگە ءوز ونەرلەرىن بۇكىل ەل كولەمىندە كورسەتەتىن ساحنا جاراتىپ بەرگەن بولاتىن. تۇڭعىش رەتكى ونەر باسەكەسىنە جۇرتشىلىقتىڭ اڭىسى وتە جاقسى بولدى.

　　2014 – جىلى مۋزيكا ارناسى «شارىقتاسىن ءانىمىز» ونەر باسەكەسىنىڭ 2 – ماۋسىمدىق باعدارلاماسىن جالعاستى كورەرمەن نازارىنا ۇسىنادى، بۇل جولى مۋزيكا ارناسى حۋبەي، حۋنان، يۇننان، گۇيجۋ، ىشكى موڭعۇل جانە شينجياڭ قاتارلى 7 اۆتونوميالى رايون، ولكەدەگى ۇگىت بولىمدەرى جانە تەلەۆيزيا ستانسيالارىمەن سەلبەسە وتىرىپ،قازاق، تۋجيا، مياۋزۋ، دايزۋ، ياۋزۋ، دۇڭزۋ، داعۇر قاتارلى 7 ۇلتتان سارالانعان ونەرپازداردىڭ ونەر باسەكەسىن ۇيىمداستىردى، باسەكە سوڭىندا ءار ۇلتتان بىردەن اعا جۇلدەگەر سارالانىپ شىعادى. شينجياڭ تەلەۆيزياسىنىڭ قىزمەتكەرلەرى دە بۇل جولى ونەرپازداردى سارالاۋدان تارتىپ، ەڭ سوڭىندا ورتالىق تەلەۆيزيادا كەسكىنگە الۋ بارىسىندا دا قيمىلدىڭ باسى – قاسىندا بولىپ، ۇيىمداستىرۋ جانە كەسكىنگە الۋ ىسىنە اتسالىستى. بۇل رەتكى قيمىلدىڭ شينجياڭ جارىس رايونىنداعى ءبولىمىن شينجياڭ تەلەۆيزياسى ۇيىمداستىرىپ، ۇزدىك 20 ءانشىنىڭ ىشىنەن 15 ءانشىنى، 15 انشىدەن 10 ءانشىنى سارالاپ شىعىپ، ەڭ سوڭىندا ونەرى ۇستەم بولعان 10 ءانشىنى ورتالىق تەلەۆيزيانىڭ «شارىقتاسىن ءانىمىز» اتتى قيمىلىنا ۇيىمداستىرىپ اكەلدى. كۇيتۇن قالالىق ءان - ءبي ۇيىرمەسىنىڭ ونەرپازدارى دا بۇل رەتكى قيمىلعا قاتىناستى.

　　بۇل جولى شينجياڭ جارىس رايونىنان سارالانىپ شىققان ءمولدىر، باقىتجامال، جۇلدىز، قايسار، شالقار، ءجاننات، زايت، سەرىكجان، ءادىل، تاڭبول قاتارلى ون ونەرپاز ورتالىق تەلەۆيزيانىڭ كەسكىنگە الۋ بازاسىندا ونەر باسەكەسىنە قاتىناسىپ، باسەكە بارىسى كەسكىنگە ءتۇسىرىلدى. ونەرپازدار قازاق، حانزۋ، اعىلشىن تىلدەرىندە ءان ايتۋدان سىرت، دومبىرامەن جانە قازاقتىڭ باربىت سىندى حالىقتىق مۋزيكا اسپاپتارىمەن ءداستۇرلى جانە ەستىرادالىق اندەردى ناقىشىنا كەلتىرە ورىندادى. ايگىلى ءانشى قازىكەن جانە موڭعۇلدىڭ تانىمالى ءانشىسى سىچينگرىل، ايگىلى ءانشى ساۋ فۋجيا، ايگىلى كومەديك بو لين قاتارلى باعالاۋشىلار ونەرپازداردىڭ ونەرىنە باعا بەردى. قيمىلدى 30عا جۋىق قازاق كورەرمەندەرىنەن سىرت، جۇزگە جۋىق حانزۋ ۇلتىنىڭ وكىلدەرى ناق مايداننان تاماشالادى. بۇل باعدارلاما ورتالىق تەلەۆيزيانىڭ مۋزيكا ارناسىندا جۇما، سەنبى كۇندەرى ساعات 21:15تە بۇكىل ەلگە اشىق تاراتىلادى.

　　كەلۋ قاينارى: حالىق تورابى