شىمكەنت ىرگەسىندەگى قوشقار اتا وزەنى

2014.09.10 09:52   كەلۋ قاينارى : حالىق تورابى

　　حالىق تورابى، 10 - قىركۇيەك، ءوز ءتىلشىمىز نۇرعيسا قۇرمانجان ۇلىنىڭ 9 - قىركۇيەكتە، شىمكەنت قالاسىنان بەرگەن حابارى. شىمكەنت قالاسى جان سانى جاعىنان قازاقستانداعى 3 – ءىرى قالا، قازاقستاننىڭ ونەركاسىپ، ساۋدا جانە مادەنيەت ورتالىقتارىنىڭ ءبىرى. قالانىڭ ماڭىنان اعىپ وتەتىن قوشقار اتا وزەنىن بۇل اراداعى حالىق اۋليە سۋ ساناپ، بۇل سۋعا قۇيىنۋ ارقىلى پالە – قالادان ارىلۋعا بولادى دەپ قارايدى. قوشقار اتا وزەنى شىنتۋايتىندا كىشكەنە بۇلاق قانا، باستاۋ العان تۇسىنىڭ كەڭدىگى تەك 2 مەتردەي بولسا، تەرەڭدىگى ءبىر مەترگە دە جەتپەيدى. سۋدىڭ تۇنىقتىعىنان تۇبىندەگى تاستارى كورىنىپ جاتادى. قوشقار اتا وزەنىنىڭ سۋى قىستا جىلى بولاتىندىقتان مۇز قاتپايدى.

　　اڭىزعا قۇلاق تۇرسەك، قوشقاراتا، نەگىزىنەن، XI عاسىردا شىمكەنتتە ءومىر سۇرگەن دەلىنەدى. ول كوزى تىرىسىندە كوپتەگەن بۇلاقتاردىڭ كوزىن اشىپ، سۋلاندىرۋمەن اينالىسقان. سۋدان تارىققان حالىققا قىسىلعاندا مەدەۋ بولىپ، ەسىمى ەل اۋزىندا اڭىز بولىپ جاتتالىپ قالعان. بۇگىنگى تاڭدا قوشقار اتا ەسىمىمەن اتالاتىن جەر – سۋ اتتارى وڭتۇستىك قازاقستان وڭىرىنەن كوپتەپ تابىلادى.

　　حابارعا قاراعاندا، قوشقار اتا وزەنىنىڭ ەكى جاعالاۋىن جاسىلداندىرىپ، جانعا جايلى دەمالىس ورنى ەتىپ قۇرىپ شىعۋ ءۇشىن، شىمكەنت قالاسى ارناۋلى قارجى اجىراتقان، قازىر بۇل قۇرىلىس جۇرگىزىلۋ ۇستىندە. جۋىق ارادا شىمكەنت تۇرعىندارى مەن ساياحاتشىلار قوشقار اتا وزەنىنىڭ بويىندا دەمالىستارىن وتكىزە الاتىن بولادى.

　　كەلۋ قاينارى: حالىق تورابى