كانادا استاناسىندا وق شىعارۋ وقيعاسى تۋىلىپ، 2 ادام قازا بولىپ، ءبىر ادام جارالاندى

2014.10.23 14:52   كەلۋ قاينارى : حالىق تورابى

　　حالىق تورابى، 22 – قازان، بەيجيڭ. شينحۋا اگەنتتىگىنىڭ حابارلاۋىنشا، كانادا استاناسى وتتاۆاداعى كانادانىڭ پارلامەنت عيماراتىندا، مەملەكەتتىك سوعىس ەسكەرتكىش سارايىندا جانە قالا ورتالىعىنداعى ءبىر ساۋدا ورتالىعىندا 22 – قازان كۇنى تۇستەن كەيىن وق شىعارۋ وقيعاسى تۋىلدى. كانادا ساقشى جاعىنىڭ تۇراقتاندىرۋىنشا، مەملەكەتتىك سوعىس ەسكەرتكىش سارايىندا كۇزەتتە تۇرعان اسكەرگە وق ءتيىپ قازا بولعان، مۇنان سىرت، تاعى ءبىر كۇزەتشى اسكەر جارالانعان، ساقشى جاق وق شىعارۋشىنى اتىپ ولتىرگەن.

　　وقيعانى كوزىمەن كورگەندەردىڭ ايتۋىنشا، قارۋ ۇستاعان ادام الدىمەن مەملەكەتتىك سوعىس ەسكەرتكىش سارايىنىڭ الدىنداعى كۇزەتشى اسكەرگە وق شىعارعان سوڭ، سول ماڭداعى پارلامەنت سارايى جاققا قاراي قاشىپ كەتكەن، ىلە – شالا سول جاقتان بىرنەشە رەت مىلتىق داۋىسى ەستىلگەن.

　　جەرگىلىكتى تەلەۆيزيا تاراتقان كەسكىنگە قاراعاندا، پارلامەنت سارايىنىڭ دالىزىندە وق داۋىسى شىققاننان كەيىن، قارۋ كوتەرگەن كۇزەتشىلەر سولاي قاراي جۇگىرگەن. كانادا ەرەكشە مىندەتتى ساقشى قوسىندارى پارلامەنت سارايىنا ءتىنتۋ جۇرگىزگەن.

　　ساقشى جاقتىڭ راستاۋىنشا، قارۋلى ادام پارلامەنت عيماراتىنىڭ ىشىندە وققا ۇشقان، ولار باسقا كۇماندى ادامنىڭ بار – جوقتىعىن ىزدەستىرۋدە. قازىر كانادا پارلامەنت عيماراتى مەن عيماراتتىڭ ماڭى قۇرساۋلانعان.

　　سول كۇنى تۇستەن كەيىن وتتاۆانىڭ قالا ورتالىعىنداعى ساۋدا ورتالىعىندا دا وق شىعارۋ وقيعاسى تۋىلعان. بۇل وق شىعارۋ وقيعالارىنىڭ ءوزارا قاتىسى بار – جوقتىعى قازىرگە دەيىن انىق ەمەس.

　　كانادا الەۋمەتتىك حاۋىپسىزدىك مينيسترلىگى 21 – قازاندا مالىمدەمە جاريالاپ، ەل ىشىندە لاڭكەستىك حاۋپىنىڭ دارەجەسى بولىمسىز دارەجەدەن جوعارى نەمەسە ورتا دارەجەگە جوعارىلايتىنىن ءبىلدىردى.

　　وسى ايدىڭ 7 – جۇلدىزىندا كانادا فەدەراتسيالىق پارلامەنتى كانادا ۇكىمەتىنە «ءىسلام مەملەكەتى» ۇشقارى ۇيىمىنا اۋەدەن شابۋىل جاساۋعا ۇقىق بەرگەن بولاتىن. كوپ وتپەي «ءىسلام مەملەكەتى» اۋەدەن شابۋىل جاساۋعا قاتىناسقان باتىس ەلدەرىنەن كەك الۋ كەستەسىن جاريالاعان، وسى مالىمدەمەدە كانادا دا قامتىلعان بولاتىن.

　　كەلۋ قاينارى: حالىق تورابى