حانبالىقتا قازاق ءانى قالىقتادى

2014.12.15 14:13  

　　حالىق تورابى، 15 – جەلتوقسان، بەيجيڭ. (نۇرعيسا) مادەنيەت مينيسترلىگى، مەملەكەتتىك اقپارات – باسپا ءسوز، راديو – تەلەۆيزيا باس مەكەمەسى مەن بەيجيڭ قالالىق حالىق ۇكىمەتى بىرلىكتە ۇيىمداستىرعان 9 – كەزەكتى جۇڭگو بەيجيڭ حالىقارالىق مادەنيەت – جاڭاشا كاسىپ كورمەسى 11 – جەلتوقساندا جۇڭگو حالىقارالىق كورمە ورتالىعىندا وتكىزىلدى.

　　شينجياڭ ۇيعۇر اۆتونوميالى رايونىنداعى مادەنيەت، راديو – تەلەۆيزيا، اقپارات – باسپا ءسوز قاتارلى تاراۋلار مەن مادەنيەت سالاسىنداعى كاسىپورىنداردان ۇيىمداسقان ۋاكىلدەر ۇيىرمەسى وسىمەن 3 – رەت وسى كورمەگە كەلىپ قاتىناستى.

　　ىلە قازاق اۆتونوميالى وبلىسى تەكەس اۋداندىق ءان – ءبي ۇيىرمەسىنىڭ ونەرپازدارى كورمەدە قازاقتىڭ ءان – بيىنەن ايشىقتى ويىن كورسەتىپ، كورەرمەنگە وزگەشە ءلاززات باعىشتادى، تامىلجىعان ءان اۋەنىنە ەلىتىپ جيىلعان كورەرمەننەن ينە شانشار جەر قالمادى. قازاقتىڭ كەستەلى بۇيىمدارى، ويۋ – ورنەگى، كيىم - كەشەگى اعاشتان ءتۇيىن تۇيگەن شەبەرلەردىڭ قولىنان شىققان ۇلتتىق اعاش ويمالار، ات ابزەلدەرى كورگەن ەلدىڭ كوز جاۋىن الىپ، ەرىكسىز تاڭداي قاقتىردى.

　　شينجياڭعا ۋاكىل رەتىندە كورمەگە قاتىناسقان تەكەس اۋداندىق ءان – ءبي ۇيىرمەسىنىڭ ونەرپازدارى ساحارانىڭ سالتاناتىن ساحنادان كورسەتىپ، قازاقتىڭ زامان كوشىنە ىلەسىپ جاڭارعان قولونەر مادەنيەتىن تانىستىرىپ، بەيجيڭدەگى ءار ۇلت حالقى مەن باسقا جەرلەردەن، شەتەلدەن كەلگەن كورەرمەندەرگە قازاق مادەنيەتىمەن تانىسۋ ورايىن جاراتتى. سۋرەتتەردى تۇسىرگەن: ءومىرجان سەيسەنقۇل ۇلى

　　كەلۋ قاينارى: حالىق تورابى