ەۆروپا دوستىق جارىسى: جۇڭگو وليمپيادا فۋتبول قۇراماسى 4:0 ۇپايمەن ارمەنيا قۇراماسىن جەڭدى

ەرجەت قۇراما كاپيتانى رەتىندە جارىستى ءساتتى اياقتاتتى

2015.01.27 14:30   كەلۋ قاينارى : حالىق تورابى

　　حالىق تورابى، 27 – قاڭتار، بەيجيڭ. (مۇحيت) جاقىندا تۇركيادا جاتتىعۋدا جۇرگەن جۇڭگو وليمپيادا فۋتبول قۇراماسى ارمانيانىڭ 21 جاستاعى ۇلتتىق قۇراماسىمەن دوستىق جارىس وتكىزدى. سوڭىندا جۇڭگو وليمپيادا فۋتبول قۇراماسى 4:0 ۇپايمەن قارسىلاسىن ويسىراتا جەڭىپ، ەۆروپاداعى دوستىق جارىسىنىڭ جەڭىس پەردەسىن اشتى.

　　ءبىز ءۇشىن قۋانارلىق ءجايت ــ قاقپاشى ەرجەتتىڭ بۇل جارىسقا ءوز ۇلەسىن قوسۋى بولدى. ەرجەت نەگىزگى قاقپاشى رەتىندە باستان – اياق بۇل جەڭىستىڭ كۋاگەرى بولدى ءارى جارىس بارىسىندا ءوز قايراتىن وزگەشە كورسەتتى. قارسىلاسىنىڭ قاقپاعا ۇرعان كوپتەگەن دوپتارى مەن جەكپە – جەك كەلگەن ورايلارىنىڭ ءبارىن توسىپ، قارسىلاسىنىڭ ساعىن سىندىردى.

　　ەرجەت قازىر پورتۋگاليانىڭ گوندومار قۇراماسىندا ونەر كورسەتىپ ءجۇر. گوندومار قۇراماسى 1921-جىلى قۇرىلعان، اتى ەۆروپا كلۋبتارىنا تانىمالى فۋتبول قۇراماسى، ول پورتۋگاليانىڭ پورتۋ ايماعىنداعى گوندومار قالاسىنا ورنالاسقان، قۇراما ءبىرقانشا جىلدان بەرى پورتۋگاليانىڭ A دارەجەلى ليگاسىندا ۇزدىك ويىندار كورسەتكەنى سەبەپتى پورتۋگاليالىقتاردىڭ سۇيىكتى قۇراماسىنا اينالىپ ۇلگىرگەن.

　　قازىرگى كۇنى الا دوپتىڭ الەمدىك ارەنادا كوش باستاپ تۇرعان كريستيانو رونالدونىڭ ەلىندە باعىن سىناپ جۇرگەن بەتكە باسار ۇلىمىز جاپالى ماشىق پەن تاتىمدى تاربيەگە قاتار جۇگەن سالىپ جارىم جىلدا پورتۋگاليالىق فۋتبول سۇيەر قاۋىمنىڭ جاقسى باعاسىنا يە بولدى. ءارقانداي سىناقتان سۇرىنبەي ءوتىپ، گوندوماردىڭ ابىرويىن اسقاقتاتقانىنا قاباعات رازى بولعان كلۋب قوجايىندارى وعان بەرەتىن سي اقىنى جوعارىلاتىپ، قۇراما قاقپاسىن جانە دە ءبىر جىل قورعاپ بەرۋىن ءوتىنىپ، مامىر ايىنىڭ اياعىندا كەلىسىم شارتتىڭ ۋاقىتىن كەلەر جىلعى ماۋسىمعا دەيىن ۇزارتتى. بۇل ەسىل ازاماتتىڭ وزگە قۇرىلىقتا جۇرسەدە، نامىستى جاتقا بەرمەي، قازاق اتىن حالىقاراعا تانىتۋعا قۇلشىنعانىنىڭ جەمىسى. تەك الداعى ۋاقىتتاردا جاس جەتكىنشەكتىڭ جولى اشىلا بەرگەي دەيمىز.

　　كەلۋ قاينارى: حالىق تورابى