ساحارا مەرۋەرتتەرى

 ( فوتو شالقىما ) 

باقىتبەك ءجۇمادىل ۇلى 

2015.02.12 15:33  

　　اتا - بابامىزدان تارتىپ كىندىك قانىمىز تاۋدا توگىلىپ، تەگىمىز تاۋلىق بولعاندىقتان با، جوق بالالىق شاعىمنىڭ بالداي ءتاتتى قىزىقتى كەزدەرىنىڭ ءبىراز ءساتىن ساحارادا وتكىزگەندىكتەن بە، قايدا جۇرسەم دە، ءاردايىم جايلاۋدى اڭساپ تۇرامىن.

　　تىربىڭى كوپ تىرشىلىكتە تۇگەمەس، بىتپەس كوپ جۇمىستاردىڭ ارەدىگىندە، اڭساپ جۇرگەن اتا جۇرت ــ تاۋ جاققا بارا قالعاندا، دالا توسىندە شالعايدان مەنمۇندالاپ جامىراي جايىلعان قورالى قوي، سايىن ساحارا تورىنە جومارت قولمەن شاشىلعان مەرۋەرتتەردەي، كوزىمە وتتاي ىستىق باسىلادى.

　　كوكتەمگى كەرىم دالادا كوك قۋعان كوپ قوزىنىڭ ماڭىراعان «سىرناي داۋىسى»؛ كوكتەۋلىكتە كوكجيەككە ۇلاسىپ جاتقان توپانى مول قورالى قوي؛ جازعى جايلاۋ تورىندە اقشا بۇلتپەن ارالاسىپ، كوك بەلدەن ارى اسىپ بارا جاتقان باعلاندار؛ ماڭعاز كۇزدە مامىراجاي دالادا ۇيەزدەپ يىرىلگەن قوڭىر مىنەزدى تۇلىكتەر؛ قاسات قاردان اق كورپە جامىلعان قىستاۋدىڭ شىرشالى كۇنگەيىن شىبارلاپ تەۋىپ جاتقان ساۋلىقتار، ءبارى دە سول سايىن ساحاراعا ءسان بەرىپ، قويلى اۋىلدىڭ قىزۋلى تىرلىك تىنىسى مەن ۇزىلمەس بەرەكەلى ىرىسىن كوز الدىڭا كولدەنەڭ تارتىپ تۇرادى ەمەس پە!

　　اتام زاماندا بابالارىمىز «شوپان اتا» تۇلىگىن ءتورت تۇلىكتىڭ ءبىرى رەتىندە قادىرلەپ باعىپ، تاۋسىلماس ىرىسقا، بازارلى باقىتقا، بايلىق پەن بەيعام تۇرمىسقا كەنەلىپ، «قوي ۇستىنە بوز تورعاي جۇمىرتقالاعان» بەيبىت، بەرەكەلى دە مەرەكەلى زامانداردى كورىپتى. سودان ۇرپاقتارىنا دا سونداي باي- باقىتتى، باياندى تىرلىك تىلەپ، «قوي ۇستىنە بوز تورعاي جۇمىرتقالاعان زامان بولسىن!» دەگەن اق باتا قالتىرىپتى.

　　قادىرمەندى وقىرمان، ايلار اۋناپ، جىلدار جىلجىپ، تاعى ءبىر قوي جىلى كەلىپ جەتتى. وسىنداي ورايلى ساتتە مەن بارشاعا قويداي قوڭىر جاراسىمدىلىق، بەرەكەلى بىرلىك، باياندى تىرلىك تىلەي وتىرىپ، سايىن ساحارا توسىنەن جۋىق جىلداردا فوتواپپارات كوزىنە تۇسىرگەن «ساحارا مەرۋەرتتەرى» اتتى تۋىندىلارىمدى جىل ءشاشۋى ەتىپ ۇسىنىپ وتىرمىن!

　　كەلۋ قاينارى: حالىق تورابى