گۇل كۇنەستە كۇمبىرلى كۇي دوداسى

حابارىن جازىپ، سۋرەتتەرىن تۇسىرگەن باقىبەك ءجۇمادىل ۇلى

2015.02.27 14:03   كەلۋ قاينارى : حالىق تورابى

　　جارىس ساحناسى، ءاشىم اتانىڭ سۋرەتى مەن جارىستىڭ اتى كوركەم قيىستىرىپ جوبالانىپ، شەرتپە كۇيدىڭ شەبەرى ءاشىم اتانىڭ وبرازىن ونان ارى ايشىقتاپ تۇر.

　　ىلە قازاق اۆتونوميالى وبلىستىق مادەنيەت - كوركەمونەر زەرتتەۋ كەڭسەسى، كۇنەس اۋداندىق مادەنيەت – دەنە تاربيە، راديو – كينو - تەلەۆيزيا مەكەمەسى، كۇنەس اۋداندىق ءاشىم كۇي مادەنيەتىن زەرتتەۋ قوعامى بىرلەسىپ ۇيىمداستىرعان «ءاشىم اتىنداعى تۇڭعىش كەزەكتى شەرتپە كۇي جارىسى» كۇنەس اۋدانىندا بولىپ ءوتتى.

　　ىلە وبلىسىنىڭ 9 - كەزەكتى قار - مۇز ساياحات - مادەنيەت مەرەكەسىنىڭ ماڭىزدى ءبىر مادەني قيمىلى رەتىندە ۇيىمداستىرىلعان وسى رەتكى كۇي جارىسى اقپاننىڭ 15 - كۇنى اۋداننىڭ كينو- تەاتر زالىندا دۇيىم كۇنەس ساحاراسىن دۇرىلدەتكەندەي كۇي كۇمبىرىمەن باستالدى. كۇي الامانىنىڭ حابارىن قۇلاعى شالعان كۇنەستىڭ باس – اياعىنان جەتكەن كورەرمەندەر مەن ارىسى قازاقستان ەلىنەن، بەرىسى اۆتونوميالى رايون، وبلىستىڭ ءار سالاسىنان شاقىرىلعان سيلى قوناقتار، مادەنيەت كوركەمونەر زەرتتەرمەندەرى، اقپارات تىلشىلەرى جارىس الاڭىندا باس قوستى.

　　وسى كۇنى تۇستەن بۇرىن الىس - جاقىننان كەلگەن ماماندار، اقىن - جازۋشى، جۋرناليستەر سالىنۋ ۇستىندەگى ءاشىم اتا قابىرى باسىنداعى كۇمبەزدى، تاڭجارىق پەن ءاشىمنىڭ مۇراجايىن ەكسكۋرسيالاپ، ءاشمنىڭ مۇرالارىن جيناۋ جانە ونىڭ ءومىرى مەن ونەر ورەسىن زەرتتەۋ، وعان مۇراگەرلىك ەتۋگە قاتىستى ءماندى دە ماعنالى كەڭەستەر قۇرىپ، الداعى ىستەلۋگە ءتيىستى ىستەر جونىندە ورامدى ويلار مەن ۇسىنىس - پىكىرلەردى ورتاعا سالدى.

　　جارىس باستالعاندا الدىمەن ءاشىمنىڭ ءتول شاكىرتى، ءاشىم ونەرىنە مۇراگەرلىك ەتۋ مەن ونى زەرتتەۋگە بۇكىل ءومىرىن ارناعان، داڭسالى زەرتتەرمەن كامال ماقاي ۇلىنا ءسوز بەرىلدى. كامال ماقاي ۇلى ۇستازى ءاشىمنىڭ ات جالىن تارتىپ مىنگەننەن ءومىرىنىڭ سوڭىنا دەيىن بار ىجداعاتىن حالىقتىق ونەرگە ارناپ، سول تۇستاعى قوڭقاي، مازاق، تىلەمىس، تەرگەۋسىز، اسانالى، اۋەلبەك، ءاتىقان قاتارلى حالىق اراسىنداعى تانىمالى كۇيشىلەردەن ۇلگى الىپ، قازاق حالقىنىڭ ۇشان - تەڭىز كۇي مۇراسىنا مۇراگەر بولىپ، ونى جالعاستىرۋمەن بىرگە، ءداۋىر تىنىسىن، حالىقتىڭ تۇرمىس تىرلىگىن بەينەلەيتىن 300دەن ارتىق كۇي جاراتىپ، ۇرپاققا مول مۇرا قالدىرعانىن، سونىمەن بىرگە شەرتپە، توكپە، تەرمە قاتارلى قالىپتاردا وڭ بۇراۋمەن دە سول بۇراۋمەن دە كۇي شەرتىپ، ءبىر كۇيدى بىرنەشە ادام پارلاپ شەرتۋ، كۇيدى كۇيگە جالعاپ شەرتۋ سياقتى جاڭالىقتار جاراتىپ، وزىنە ءتان كۇيشىلىك سلوبىن قالىپتاستىرىپ، شىعىس قازاقتارىنىڭ دارا كۇي مادەنيەتىنىڭ قالىپتاسۋىنا اسا ۇلكەن ۇلەس قوسقانىن اتاپ ءوتتى. سودان كەيىن كورەرمەن تىقىرشي كۇتكەن كۇي دوداسى باستالىپ كەتتى.

　　كۇي جارىسىنا تۇسكەن ۇمىتكەرلەردىڭ ونەر ورەسىنە ءادىلقازىلار ءاشىم كۇيلەرىنىڭ اۋەلگى ستيلىن ساقتاپ، حالىقتىق سارىن مانەرىن بۇزباي، دۇرىس ورىنداۋ ولشەمى بويىنشا باعا بەرىپ، توعىزتاراۋ اۋدانىنان كەلگەن ونەرپاز قاشاتاي جۇمانالى ۇلىنا باس جۇلدەنى؛ كۇنەس اۋدانىنان ەرلان زاكىر ۇلىنا ءبىرىنشى دارەجەلى جۇلدەنى؛ كۇنەس اۋدانىنان دارمەن داۋلەتقان ۇلى، قۇلجا قالاسىنان ادال قاۋتان ۇلى، توعىزتاراۋ اۋدانىنان كەلگەن سۇيەر ءانۋارقان قىزى مەن ءالميات تۇرسىن ۇلى قاتارلىلارعا ەكىنشى دارەجەلى سيلىقتى بەردى. بۇدان سىرت 7 ونەرپازعا ءۇشىنشى دارەجەلى سىيلىق، 18 كۇيشىگە ۇزدىك ورىنداۋ سيلىعى بەرىلدى. تەكەستەن كەلگەن اكيما دوسمىرزا ۇلى مەن قۇلجا اۋدانىنان كەلگەن جاقسىلىق قاسەن ۇلى سياقتى سارتابان كۇيشىلەرگە وسى جولعى جارىستىڭ قۇرمەت سيلىعى ۇسىنىلدى.

　　گۇل كۇنەستىڭ ورتالىعىن دۇرىلدەتىپ، ءدۇبىرى دۇنيەگە لەزدە تاراعان بۇل جولعى كۇي جارىسىنىڭ باس اياعى مەن قالىڭ حالىقتىڭ وسى اتالى ونەرگە دەگەن ىقىلاسىنان - اق زەرتتەرمەن ماماندار ءاشىمنىڭ كۇي ونەرىنىڭ حالىقتىق نەگىزىنىڭ وتە مىعىم ەكەنىن، ونىڭ ءار ءبىر كۇيىنىڭ حالىق جۇرەگىنەن ورىن العانىن تاعى ءبىر قىرىنان تانىعانداي بولدى.

　　اۆتوردىڭ جۇمىس ورنى: ىلە حالىق راديو ستانسياسى

　　كەلۋ قاينارى: حالىق تورابى