ءان ناۋرىز اقسايدا

ەرىكتى تىلشىلەر مارالبەك ابدىكارىم ۇلى مەن ماقان قاپاس ۇلى حابارلايدى

2015.03.20 17:09   كەلۋ قاينارى : حالىق تورابى

　　«ناۋرىز ايى تۋعاندا، توي بولۋشى ەدى بۇل ماڭدا» دەگەندەي، ناۋرىز ايى كەلىسىمەن بارشا حالىق قۋانىشقا تولى كوڭىل كۇيمەن مەرەكەنى تويلاۋعا كىرىسەدى. جۇڭگو قازاعىنىڭ شىعىستاعى اق وتاۋى ــ گانسۋ ولكەسىنىڭ اقساي قازاق اۆتونوميالى اۋدانىنداعى تۋىسقاندار دا ناۋرىز تويىن مول كوجەمەن، ءان – كۇيمەن قارسى الدى.

　　اقساي قازاق اۆتونوميالى اۋداندىق پارتكوم مەن ۇكىمەتتىڭ ەرەكشە قولداپ – قۋاتتاۋىندا، اقساي اۋدانىنىڭ تۇڭعىش كەزەكتى ات بايگەسى ۇلىستىڭ ۇلى كۇنىنە ارناپ ناۋرىز ايىندا وتكىزىلدى. ءارقايسى الەۋمەتتىك تۇرعىندار اۋماعى ويىن نومىرلەرىن قويۋ، باس قوسىپ ناۋرىز كوجە ءىشۋ قاتارلى ءتۇرلى فورمالارمەن ناۋرىز مەرەكەسىن قۇتتىقتاۋعا كىرىستى. «ۇلىستىڭ ۇلى كۇنىن» قارسى الۋ ءۇشىن اقساي اۋدانى تاماشا كونسەرت قويىپ، حالىقتىڭ جاقسى باعاسىن الدى.

　　اقساي اۋداندىق حالىق ۇكىمەتىنىڭ باستاماشىلدىق ەتۋىندە، اۋداندىق مادەنيەت، دەنە تاربيە، كينو - تەلەۆيزيا مەكەسى، اۋداندىق بۇقارالىق مادەنيەت سارايى، اۋداندىق ۇلتتىق ءان - ءبي ۇيىرمەسى قاتارلى ورىندار وتكىزگەن اقساي اۋدانىنىڭ 2015 - جىلعى ناۋرىز مەرەكەسىنە ارنالعان «ءان ناۋرىز ــ اقسايدا » اتتى ساۋىق كەش ناۋرىزدىڭ 16 - جۇلدىزى كەشتە اقساي اۋدانىنداعى بارلىق كورەرمەندەرمەن جۇزدەستى.

　　ساحنانى سانگە بولەگەن ساۋىق كەش اقساي اۋدانىنىڭ باي - باقىتتى تۇرمىسىن، ساحارالىق مادەنيەتىن، ۇلتتار ىنتىماعىن، قوعام جاراسىمدىلىعىن جانە اقساي اۋدانىنىڭ جاڭا بەينەسىن جىرلاۋدى باستى تاقىرىپ ەتىپ، ءار ۇلت حالقىن ۇلتتىق سالت - ءداستۇردى ۇلاعاتتاپ، باياندى دامۋعا ۇندەدى.

　　وسى رەتكى كونسەرتتە جوعارى داۋىستى ءانشى ەرعالي نۇرزادا ۇلى، «كۇمىس كومەيدە» تارتىمدى ونەر كورسەتىپ، حالقتىڭ جاقسى باعاسىن العان ءانشى مىرزاتاي بەكسۇلتان ۇلى حالىق اندەرىن اسقاقتاتا شىرقاپ، كونسەرت ساپاسىن ءتىپتى دە جوعارى ورەگە كوتەردى. اقساي اۋدانىنداعى كونە كوز اپالارىمىزدىڭ ورىنداۋىنداعى حالىق اندەرى كورەرمەنىن تاڭ قالدىرسا، اۋداندىق ءان - ءبي ۇيىرمەسىندەگى ونەرپازداردىڭ تاماشا ءان - بيلەرى كورەرمەن كوڭىلىن ءتىپتى دە جەلپىندىرىپ تاستادى.

　　كورەرمەنىن تامساندىرعان ساۋىق كەشتى شينجياڭ تەلەۆيزياسى كەسكىنگە ءتۇسىرىپ، اقساي اۋدانىنىڭ ناۋرىز تويىنا كۋا بولدى. بۇل كونسەرت ناۋرىزدىڭ 24 - جۇلدىزى شينجياڭ تەلەۆيزياسىنىڭ 8 - ارناسىندا تەلە كورەرمەندەرىمەن جۇزدەسەتىن بولادى.

　　كەلۋ قاينارى: حالىق تورابى