تانىمالى ايتىس اقىنى جاميعا داۋلەت قىزىمەن اڭگىمە

2015.03.25 15:40  

　　ءتىلشى: اقىندىق ونەردىڭ جولىندا جۇرگەن سوڭ، بۇرىنعى ادۋىندى ايتىسكەرلەردىڭ ءسوز سايىسىنا دا دەن قوياتىن بولارسىز. بۇرىنعىنىڭ ايتىسى مەن بۇگىنگىنىڭ ايتىسىندا قانداي پارىق بار؟

　　جاميعا: مەنىڭ بايقاۋىمشا، بۇرىنعى ايتىس پەن بۇگىنگى ايتىس ۇيقاسى، اۋەنى جاعىنان پارىقتى بولىپ كەلەدى. بۇرىنعى اقىندار نەگىزىنەن قارا ولەڭ ۇيقاسىمەن ءار كۋبليت ولەڭدى ءتورت تارماقتان كەلتىرىپ ايتاتىن. ايتىس ونەرىنىڭ اتادان بالاعا جالعاسىپ دامۋىندا، بۇگىنگى ايتىستا ءبىر ۇيقاستى قۋالاپ ۇزاق ايتاتىن شۇبىرتپا ۇيقاس تا كوپتەپ قولدانىلادى. بۇل بەلگىلى دەڭگەيدەن العاندا، اۋەندەگى وزگەرىستەن، ەندى ءبىر جاعىنان، اقىنداردىڭ وي ورەسىنىڭ وسكەندىگىنەن دە شىعار. بۇرىنعى اقىندار باياۋ، قوڭىر اۋەنمەن كەلەتىن حالىقتىق سارىندا ولەڭ ايتاتىن، تىڭداعان كىسىنىڭ جۇرەگىنە جىلى ءتيىپ، وزگەشە اسەر سيلايتىن.

　　بۇرىنعى ايتىس اقىندارى جۇيەدەن جىبەرمەيتىن. بۇگىنگى ايتىس اقىندارىنىڭ اۋزىنان ءىنجۋ – مارجان توگىلىپ، سىرلاپ قويعانداي، لاعىل – مونشاقتاي ادەمى سوزدەر ايتىلعانىمەن، ونىڭ ىشىندە ماعىناسىز ءسوز كوپ. بۇرىنعى ايتىس اقىندارى وي قۋالاپ، ءسوزدىڭ جۇيەسىمەن ايتىساتىن، ال بۇگىنگى جاس اقىندار ءسوز قۋالاپ ايتىسادى.

　　ارينە، بۇگىنگى ايتىستىڭ دامۋى ەرەكشە، بۇرىنعىمەن سالىستىرعاندا، ايتىس مادەنيەتىمىزدىڭ تالاي بەلەستى باعىندىرعانى بارشاعا ايان، بۇگىن ءار اقىن ءوز سلوبىمەن، ءوز دەڭگەيىندە ونەر كورسەتىپ، ايتىس ونەرىمىزگە وزىندىك دارالىقپەن ءوڭ بەرىپ ءجۇر. مۇنى دا ايتىس ونەرىنىڭ دامۋى دەپ تۇسىنۋگە بولاتىن سياقتى.

　　ەندى ءبىر جايت، جۇڭگوداعى جانە قازاقستانداعى ايتىس اقىندارىندا اۋەن جاعىندا تاپشىلىق بار، بارلىعىمىزدا جاڭا اۋەن جوق، اينالاسى بىرنەشە اۋەندى بارلىعىمىز پايدالانىپ ءجۇرمىز، بۇرىنعىنىڭ اقىندارىندا وزىنە ءتان اۋەندەرى بولادى، كەيىنگىگە پالەن اقىننىڭ اۋەنى دەپ قالىپ وتىرعان، بۇل قازىرگى اقىنداردا ساقتالىپ وتىرعان ولقىلىق دەپ ويلايمىن.

　　ءتىلشى: قازاقتا «ءسوزدىڭ جۇيەسى» دەگەن تىركەس بار، الامان ايتىستا اقىن قايتارار ءسوز تاپپاعانىمەن ەمەس، جۇيەلى ءسوز ايتپاعاندىقتان جەڭىلەدى. بۇگىنگى ايتىستاردى باعالاۋدا وسى ءسوز جۇيەسىنە دەرلىكتەي بويلاپ كەتە المايتىن كەزدەرىمىز كوپ سياقتى، سىزشە قالاي؟

　　جاميعا: جامالقان اپامىز «ايتىس اقىنى ساحناعا شىعۋدان نەنى ايتۋ كەرەك دەگەندى ەمەس، نەنى ايتپاۋ كەرەك دەگەندى كوبىرەك ويلانعانى ءجون» دەگەندى ۇنەمى ايتاتىن، قازىر كەي جاس اقىندارىمىز ساحناعا شىققاندا نەنى ايتۋ، نەنى ايتپاۋدى ويلانۋ ەمەس، ارىپتەسىنىڭ نەنى ايتىپ جاتقانىن تۇسىنبەيدى. ايتقان ءسوزىڭنىڭ استارىنا ۇڭىلمەي، ايدالاعا شاۋىپ، ايتىستىڭ ءارىن كەتىرەدى. سونداي كەزدە كورەرمەننىڭ دە قۇر دۇرمەككە ىلەسىپ، قول سوعىپ، قوشامەتتەپ كەتەتىن كەزى بولادى. ايتىس ۇستىندە قىزدى – قىزدىمەن بىلىنبەي كەتكەنىمەن، مۇنداي ايتىس قاعازعا تۇسكەن سوڭ ءنارى كەتىپ، ونەردىڭ قۇتىن قاشىرادى.كەشەگى قۇرەكەڭدەردىڭ ءتورت اياعىن تىك باسقان ايتىسى قانداي شىركىن، بەرەكە تۋرالى ايتىلعان ولەڭىندە قۇرمانبەك اتامىز:

　　ــ «قايىڭنىڭ قايناپ بىتكەن ۇيىلىندەي،

　　ۇلاردىڭ ۇيا بۇزباس ۇيىرىندەي»، - دەيدى. وسى ەكى – اق اۋىز ولەڭ ءبىر اۋىلدىڭ بەرەكەسى مەن ىنتىماعىن سۋرەتتەۋگە جەتىپ جاتىر.

　　ەركىن اعامىز ءبىر ايتىسىندا:

　　ــ ىشىندە كۇركىرەگەن نار قامىستىڭ،

　　ماۋلەنى دەپ ءجۇرۋشى ەم جولبارىستىڭ.

　　ەكپىنىنەن سونشالىق ساسقانىڭ نە،

　　شالعىسى بۋرىل تارتقان اردا قۇستىڭ، - دەيدى. بۇل ارادا ەركىن اعامىز ءوزىنىڭ جاسىنىڭ ۇلعايىپ قالعانىن، ەكپىنىنىڭ بۇرىنعىدان قايتىپ قالعانىن جەتكىزىپ وتىرعانىمەن، وسى ءبىر اۋىز ولەڭگە دالا تابيعاتىن ءوز بوياۋىمەن سىڭىرگەن.

　　ايتىستا قالىپتاسقان فورمۋلا بولماعاندىقتان، بىلاي ايتۋ كەرەك دەپ اقىل كورسەتۋ دە قيىن. ءبىراق، بۇگىنگى اقىنداردا ءسوزدىڭ جۇيەسىمەن ايتىسۋدىڭ كەمشىل ەكەنى ايان، ونىڭ ىشىندە ءوزىم دە بارمىن. مىڭ جەردەن مارجان ءسوزدى توگىلدىرگەنمەن، ايتىس تۇسىنەتىن جۇرتقا جۇيەسىن تاپقان ءبىر اۋىز سوزدەي قايدان بولسىن.

　　ءتىلشى: ۇرىمجىدە وتكىزگەن كەشىڭىزدە قازاقستان ەلىنىڭ اقىندارىن شاقىرتتىڭىز، سوندا وسى عالامتوردا «جاميعا قازاقستان اقىندارىنان جەڭىلدى» دەگەن جەل ءسوز كەزىپ ءجۇردى، سول كەزدە شىن جەڭىلدىم دەپ ويلايسىز با؟

　　جاميعا: ۇرىمجىدە ايتىس كەشىن وتكىزگەن كۇننىڭ ەرتەڭىندە «ءتاڭىرتاۋ» سايتى سۇحباتقا شاقىردى، جاڭاعى ءسوزدى مەن سوندا ءوزىم ايتتىم، ول ءسوزدى ەل ايتقان جوق، ەشقانداي كەزىپ كەتكەن جەل ءسوز دە بولعان جوق.

　　سول كۇنى ناعىمانمەن تاماشا ايتىس وتكىزدىم، ناعىمان مەنەن باسىم ءتۇستى، اقىن ءۇشىن شىن ارىپتەسكە جولىعىپ كوسىلە شاۋىپ، شەشىلە ولەڭ ايتۋ ول ايتىستاعى جەڭىستەن دە عانيبەت ءىس.

　　بەكارىس جانە جانداربەك ەكەۋىمەن دە جاقسى ايتىس وتكىزدىم، ولاردىڭ مەنى سوزدەن ۇتقان جەرلەرى بولدى، ءبىراق ورەلى ايتىس بولدى دەپ ايتا المايمىن.

　　ەرتەسى «ءتاڭىرتاۋ» سايتىندا سۇحباتتا بولعاندا ءوزىم وسى كەشكە باعا بەرىپ، جاڭاعى نىسايداعى اڭگىمەلەردى ايتقانمىن، بالكىم، سول ءسوز شىعار ەلدىڭ اۋزىندا جۇرگەن.

　　ءتىلشى: «جاڭىلمايتىن جاق، سۇرىنبەيتىن تۇياق جوق» دەيدى قازاق، ءسىزدىڭ دە سۇرىنگەن كەزدەرىڭىز بولعان شىعار؟

　　جاميعا: جەڭۋ بار جەردە جەڭىلۋ دە بار، جەڭگەن دە جەڭىلگەن دە اقىن. اقىن ءۇشىن ەلدىڭ ەسىندە قالاتىن، ۇرپاققا ونەگە بولاتىن ءارلى ايتىس وتكىزۋ ايتىستىڭ جەڭىسىنەن الدە قايدا قىمباتتى. ۇيتكەنى، اقىننىڭ ارتىندا قالاتىن مۇراسى ــ ونىڭ ءنارلى ولەڭى.

　　اقىن ءبىر سوزدەن جەڭىپ، ءبىر سوزدەن جەڭىلەدى. كەزىندە تاتۋ دەگەن اكىمىمىز باستاپ، موري، باركول، اقساي سىندى ءۇش قازاق اۆتونوميالى اۋدانعا مادەني اۋىس – كۇيىس ماقساتىمەن ساپاردا بولعاندا، باركولدىڭ ەركەبەك دەگەن اقىنىمەن داستارقان باسىندا ايتىسىپ وتىرىپ، ەكى – اق اۋىز سوزدەن جەڭىلگەنىم ەسىمنەن كەتپەيدى.

　　ەركەبەك: «اتا جۇرتىمىز التايدان كەلدىڭىزدەر، باتىر ەلسىزدەر» دەپ ماقتاۋ ايتقاندا مەن «التايدىڭ اۋىپ كەتكەن ارقارى ەدىڭىزدەر، التايدا ەل باسىنا كۇن تۋعاندا باتىرلار تۋعان جەرىن قورعاۋ ءۇشىن قالىپ قويعان» دەپ ولەڭ ايتتىم، سوندا ەركەبەك «كول تولقىسا كوبىگى بەتكە شىعادى، ەل تولقىسا تەنتەگى شەتكە شىعادى» دەگەن قازاقتىڭ ءبىر اۋىز اتالى سوزىمەن مەنى جەڭىپ كەتتى، ءسوزدىڭ جۇيەسى دەگەن مىنە وسى.

　　ءتىلشى: جالپى شينجياڭ قازاعىندا اقىندىق ونەردە نەندەي ولقىلىقتار بار؟ كوڭىل تولىپ، ماقتانارلىق تۇستارىمىز قايسى؟

　　جاميعا: شينجياڭ قازاعىنىڭ ءتىلى شۇرايلى. مايلى، سۇبەلى، سۇيەكتى سوزدەر بىزدەن ءالى جوعالعان جوق، اقىندارىمىز الامان بايگەدە قايماعى بۇزىلماعان، ءوڭدى دە ءسولدى، سۇلۋ ءسوزدى توگىلدىرىپ ايتادى.

　　«ءتورت تۇرمانى ساي» اقىن بولۋ، ارينە، وتە قيىن. ءبىزدىڭ كوپ اقىندارىمىزدىڭ ءبىلىم ورەسى ءسال تومەندەۋ، كوبىمىز «قويىن قۇرتتاپ، ايرانىن ۇرتتاعان» مالشىنىڭ، «نەسىبەسىن جەردەن تىلەگەن» ديقاننىڭ بالاسىمىز، اۋىل اراسىنان ۇزاپ ارنايى ءبىلىم الا المادىق. جەمە ـ جەمدە ەكى اۋىز ءسوزدىڭ باسىن قۇراپ، ءسوز مارجانىن ساپىرعانمەن، ايتىس دەيتىن ۇزاق ساپاردا ءبىلىم دەڭگەيمىزدىڭ تومەندىگى اياققا ورالعى بولىپ، تايازدىعىمىز ءبىلىنىپ قالادى. «ارىق اتقا قامشى اۋىر» دەمەكشى، ايتىستىڭ سالماعىن، جۇگىن كەز كەلگەن اقىن كوتەرە المايدى. ءبىزدىڭ اقىندارىمىزدىڭ كەيدە ءبىر شيىردان شىعا الماي قالاتىنى دا وسىدان بولار.

　　بۇگىنگى اقىندارعا بىرنەشە تالاپ قويىلۋ كەرەك دەپ ويلايمىن:

　　بىرىنشىدەن، اقىندارىمىز دومبىرانى ساۋاتتى شەرتۋدى ۇيرەنۋى كەرەك. بۇرىنعى اقىندار دومبىرا بىلسە دە، بىلمەسە دە ايتىسقا تۇسە بەرەتىن، بۇگىنگى اقىنعا بۇل جاراسپايدى. اقىن دەگەن «سەگىز قىرلى» بولۋى كەرەك.

　　ەكىنشى، اقىندارىمىز ءداستۇرلى اندەردى ناشىنا كەلتىرىپ ورىنداۋدى ۇيرەنۋى كەرەك. قازاقستان اقىندارى ايتىسىپ وتىرىپ، ادەمى اۋەندەرگە سالىپ اندەتىپ كەتەدى. اۋەنى قانداي، دومبىراسى قالاي سايكەسەدى! تىڭداعان ادامنىڭ جۇرەگىنەن جول تاۋىپ، وزىنە باۋراپ الادى.

　　ءۇشىنشى، اقىندار سانگەر بولۋى كەرەك. ءوز كيىمىن ءوزى تاڭداپ، ساحناعا شىققاندا جاراسىمدى كيىنە الۋى كەرەك. رەتتى دە جاراسىمدى كيىنۋ دە مادەنيەت، اۋزىنان القا – مونشاق توگىلگەنمەن، ساحنادا ولپى – سولپى وتىرسا، كورگەن جانعا جايلى اسەر بەرە قويماۋى مۇمكىن.

　　ونان سوڭ، اقىن ادام گريمشى بولۋى كەرەك. ءبىزدىڭ ايتىس قالادا دا قىردا دا وتكىزىلە بەرەدى، ايتىس بولىپ جاتقان جەردە كەز كەلگەن ۋاقىتتا گريمدەيتىن ادام تابىلا بەرمەيدى. سونداي جاعدايدا، ءوزىنىڭ ءوڭ - رەتىن ساحناعا سايكەستىرىپ، بەلگىلى گريم جاساي الاتىن ونەرى بولسا، بۇل دا كورەرمەنگە جاعىمدى اسەر بەرەتىنى داۋسىز.

　　ەكى اۋىز ولەڭ قۇراعاننىڭ بارلىعى اقىن ەمەس، اقىن جان – جاعىنان تولىق كەمەلدەنگەن، «بەس قارۋى ساي» بولعاندا عانا ونىڭ جۇرت كوڭىلىندەگى ورنى بيىكتەپ، ەل الدىندا ورەلى ايتىس جاساي الادى.

　　ءتىلشى: «اكىمى اقىنىن ىزدەگەن ەل باقىتتى» دەيدى ەكەن، اقىندارىمىزدىڭ ءوز ونەرلەرىن ۇشتاۋىنا قاجەتتى دەڭگەيدە جاعداي جاسالىپ جاتىر ما؟

　　جاميعا: ساياساتقا ساي ۇلتتىق ونەردى ۇلىقتاپ جاتقان ساتتە، مادەنيەتىمىزدىڭ مايەگى بولعان بوگەنايى بولەك ايتىس ونەرىنە ۇكىمەت جاعىنان بەلگىلى دەڭگەيدە قولداۋ كورسەتىلىپ، ءبىر توپ اقىنعا ۇكىمەت جاعىنان قىزمەت بەرىلدى. بۇل، ارينە، پارتيا مەن ۇكىمەتتىڭ قولداپ – قۋاتتاۋىنىڭ ارقاسى. دەسەدە، بارلىق اقىنداردىڭ قيىنشىلىعى شەشىلىپ، ايتىس ونەرىنە ەرەكشە شارت – جاعداي جاسالىپ كەتتى دەپ ايتا المايمىن. ءىشىنارا اقىندارعا ۇكىمەت جاعىنان قىزمەت بەرىلدى، كەيبىرەۋى بەلگىلى دەڭگەيدە تۇرمىستىق قيىنشىلىعىن شەشەتىن توقتاممەن ايلىق الىپ وتىر، اقىندار نەگىزىنەن مادەنيەت ۇيلەرىندە قىزمەتتە. باسقا سالاعا اپارعانمەن بەلگىلى ماماندىقتى مەڭگەرمەگەندىكتەن، قىزمەتتىڭ بابىنان شىعا قويۋى ەكىتالاي.

　　قىزمەتتەگى اقىندار تالاي رەتكى الامان بايگەدە جۇلدەلى بولىپ ورالسا دا، بۇل ولاردىڭ ناتيجەسىنە جازىلمايدى. مەكەمەگە، جەرگىلىكتى ورىنعا اكەلگەن اتاق – داڭقى ەسەپكە الىنبايدى. مىسالى: قاناتبەك اقىن ەكەۋمىز قازاقستاننان، موڭعۇليادان حالىقارالىق ايتىستاردىڭ جۇلدەسىن دە اكەلدىك، ءبىراق بۇل ءبىزدىڭ ەڭبەگىمىزگە جازىلىپ كورگەن جوق.

　　قازىر ءانشى، كۇيشى، جازۋشىلاردىڭ مەملەكەتتىك، رايوندىق اتاقتارى بار، ىستەگەن ىسىنە، ەڭبەگىنە قاراي ەڭبەكاقىلارى ءوسىپ وتىرادى. مەملەكەتتىك بەيزاتتىق مادەنيەت مۇراسى بولىپ ۇلىقتالىپ جاتقان ايتىستىڭ مۇراگەرلەرى ــ اقىنداردىڭ ونەرىنە، ناتيجەلەرىنە قاراي مەملەكەت جانە رايون جاعىنان اتاق - دارەجە بەرىلىپ، سول دارەجەلەرىنە قاراي اقىنداردىڭ ەڭبەگى ەلەنىپ وتىرسا، بۇل اقىندارعا عانا ەمەس، ايتىس ونەرىنە دەگەن قۇرمەت پەن قولداۋ بولار ەدى. اقىنداردىڭ اۆتونوميالى رايوننىڭ 5 جىلدا، وبلىستىڭ 3 جىلدا، ايماقتىڭ ءبىر جىلدا وتكىزگەن ايتىسىنان العان جۇلدەسى ولاردىڭ قيىنشىلىعىن شەشە المايدى. ول تەك اقىندارعا شابىتتاندىرۋ، ەڭبەگىنىڭ جەمىسى عانا، ونىمەن ەش اقىننىڭ قالتاسى قامپايىپ كەتپەيدى.

　　اقىنداردىڭ الامان بايگەدەن العان جۇلدەلەرى ولاردىڭ ەڭبەگىنە جازىلماسا، توككەن تەرلەرى كورىنبەسە، بۇل ايتىستىڭ دامۋىنا ىقپال ەتەدى. اقىننىڭ ەڭبەگى باعالانسا، ول اقىنداردىڭ ايتىسقا دەگەن ىزدەنىسىن ارتتىرادى. بۇل مەنىڭ عانا ەمەس، بارلىق اقىنداردىڭ كوكەيىندە جۇرگەن كوكەيتەستى ارماندارى.

　　قىزمەتتەگى اقىندار كەيدە ايتىسقا كەتسە، ولاردىڭ الىپ وتىرعان ەڭبەكاقىسىنان اقشا تارتىلادى، «ايتىسقا بارىپ اۋدانعا، مەكەمەگە ابىروي الىپ بەردىڭ» دەپ جاتقان ەشكىم جوق، كەيدە، مەكەمەنىڭ قىزمەتىن اقساتتىڭ دەپ الىپ وتىرعان ەڭبەكاقىڭنان تارتادى. اقىن دەگەن ۇلكەن – كىشى تويدا ءسوز سايىسىندا ءجۇرىپ جەتىلەدى، 8 ساعات قىزمەت ۇستەلىندە وتىرعان اقىننان قانداي جاقسى ايتىس شىعادى؟

　　مۇنان سىرت، اقىنداردى ۇكىمەت جاعىنان ءۇش ~ ءتورت جىل وقىتۋ كەرەك، تەك اقىندىق ونەردى ەمەس، ولاردىڭ ءبىر ماماندىقتى تاۋىسىپ، كوز اياسىن كەڭەيتۋىنە كومەكتەسسە قۇبا – قۇپ. سوندا اقىندار ءبىر جۇمىستى تاۋىپ تۇرمىسىن قامتاماسىزداندىرعاننان كەيىن، اقىندىعىن ءوز الدىنا جالعاستىرا بەرەر ەدى. «قىزمەتىن بەردىك، قالعانىن وزىنە تاستادىق» دەگەن دۇرىس ەمەس، ەكى ءسوزدىڭ باسىن قوسقان ادام اقىن بولا بەرمەيدى، جۇيەلى تاربيەدەن وتكىزۋ كەرەك.

　　ءتىلشى: ءبىر وتباسىنىڭ كۇندەلىكتى كۇيبەڭىنەن ۋاقىت شىعارىپ، ساحنا تورىنە ەر ازاماتتارمەن تەڭ كوتەرىلىپ، ولەڭ اڭساعان حالىق كوڭىلىن تابۋ وڭاي – وسپاق ءىس ەمەس، تۇرمىس پەن ونەردى قالاي ۇشتاستىرىپ ءجۇرسىز.

　　جاميعا: وتباسىلى بولعاننان كەيىن ايەل ادامنىڭ تۇرمىستىق جاقتاعى قيىنشىلىقتاردى جەڭىپ، ايتىس ساحناسىنا كوتەرىلۋى ايتقانعا وڭاي بولعانمەن، وتە ماشاحاتتى جۇمىس. قازىر ەكى بالانىڭ اناسىمىن، وتاعاسىنىڭ جارىمىن، اتا – ەنەگە كەلىنمىن، حالىققا اقىنمىن.

　　بالامنىڭ ۇلكەنى التى ايلىق بولعاندا، بالامدى ارقالاي ءجۇرىپ، ەنەم مەن كۇيەۋىمدى ەرتىپ الىپ ايتىسقا باردىق. ەكىنشى بالام قىرقىنان شىعا سالا ايتىسقا كەتتىم. شيكى وكپە بالا اۋرادى، ونىڭ ازابىن تارتاتىن ءوزىم، بارلىق انالار ءبىزدى وسىلاي جەتكىزدى، مۇنى ءبارىڭىز تۇسىنەسىز. بۇل وتباسىلى ادامعا وڭاي ەمەس، قاراپايىم مالشى – ديقان قىستىڭ قامىن جازدا ويلايدى. اتا – ەنەم مەن جولداسىمنىڭ قولداۋىندا وسىنداي جاعدايلاردا دا ايتىسقا بارىپ ءجۇرمىن.

　　ايەل ادام ءۇشىن اقىندىق وتە اۋىر جۇمىس، وتباسىندا كوزگە كورىنبەيتىن كۇيبەڭ تىرلىك، كىشكەنە بالا بار، قىزمەتتى دە اقساتپاۋ كەرەك، اراسىندا قوناقتى كۇتىپ ۇلگىرۋ دە قاجەت، كەيدە اي بويى كىتاپ بەتىن اشا المايسىڭ.

　　كەيدە جالىعىپ شارشايمىن، نە ءۇشىن وسىنشالىق ازاپ اۋىر ايتىس جولىن تاڭداپ الدىم دەپ. وتباسىنداعى جاپالى دا قينشىلىققا تولى ساتتارىمدە ونەردى قولپاشتاپ وتىرعان حالىق ساحنا ارتىندا قانشالىق بوداۋ بەرىپ كەلىپ وتىرعانىمىزدى ۇعا بەرمەيدى.

　　ارينە ايتىستى سۇيگەننەن كەيىن، ايتىس جولىن تاڭداعاننان كەيىن اللا تاعالا تاڭدايعا تارىداي باق بەرگەننەن كەيىن، ءبىر كۇن بولسا دا جۇرتتىڭ جۇرەگىنەن ورىن الىپ، جاقسى ايتىس جاساي بەرۋ ايتىس اقىنى ءۇشىن ەڭ ۇلكە جۇلدە.

　　تۋىس – تۋعان، اتا – ەنە، جولداس – جورالارىمنىڭ قولداۋىمەن ايتىستى جالعاستىرىپ كەلەمىن. تالاي – تالاي مىقتى اقىن اپايلارىمىز جارىق ەتىپ ايتىس ساحناسىنان كورىنىپ، تۇرمىستىڭ قيىنشىلىعىن جەڭە الماي ساحنادان شەگىنىپ كەتتى، ايەل ادامنىڭ جولى جىڭىشكە. تۋىس – تۋعاننىڭ قولداۋى بولماسا، جالعىز ءوزىم بۇل قيىنشىلىقتى ەڭسەرە الماس ەدىم، دەنساۋلىعىمىز مىقتى، شاڭىراعىمىز بيىك تۇرسا حالىق الدىندا ءالى تالاي ونەر كورسەتەمىز دەپ ويلايمىن.

　　ءتىلشى: سۇحبات بەرگەنىڭىزگە راحىمەت

　　كەلۋ قاينارى: حالى تورابى