ەلىمىزدىڭ ءۇش ارميا قۇرمەت قاراۋىلىنداعى 112 سارباز موسكۆا قىزىل الاڭىندا وتكىزىلگەن سالتانات شەرۋىنە قاتىناستى

بۇل ەلىمىز ءۇش ارميا قۇرمەت قاراۋىلى ساربازدارىنىڭ شەتەلدەگى سالتانات شەرۋىنە 5 – رەت قاتىناسۋى بولماق

2015.05.11 17:23   كەلۋ قاينارى : حالىق تورابى

　　موسكۆا قىزىل الاڭى اسپانىن مامىردىڭ 9 – كۇنى تۇستەن بۇرىن كەرنەي – بارابان ءۇنى كەرنەپ، رەسەيدىڭ ۇلى وتان سوعىسىنىڭ 70 جىلدىعىن ەسكە ءتۇسىرۋ سالتانات شەرۋى وتكىزىلدى.

　　جۇڭگو حالىق ازاتتىق ارمياسى ءۇش ارميا قۇرمەت قاراۋىلىنداعى ساربازدار كوزگە وتتاي باسىلاتىن بەس جۇلدىزدى قىزىل تۋدى بيىك كوتەرىپ، ارىندى دا سالماقتى قاداممەن، ەڭسەلەرىن تىك ۇستاپ شەرۋ مايدانىنا كىردى. جۇزدەن استام ساربازدىڭ شاحماتتىڭ تاسىنداي تىزىلگەن سابىنا قاي قىرىنان قاراسا دا ءمىن تابۋ قيىن - دى!بۇل ەلىمىز ءۇش ارميا قۇرمەت قاراۋىلى اترەتىنىڭ تۇڭعىش رەت رەسەي جەرىندەگى اسكەري سالتانات شەرۋىنە قاتىناسۋى بولسا، ءۇش ارميا قۇرمەت قاراۋىلى اترەتىنىڭ شەتەلدەگى اسكەري پارادقا 5 – رەت قاتىناسۋى بولدى.

　　ءۇش ارميا قۇرمەت قاراۋىلىنىڭ الەمدىك ساحنالاردا بوي كورسەتۋى ەلىمىز جاساقتارىنىڭ ايبىنىن كورسەتۋدەن تىس، بەيبىتشىلىكتىڭ قىزعىشتارى دا بولا الاتىندىعىن دالەلدەدى، ەڭ ماڭىزدىسى، ءبىر مەملەكەتتىڭ وركەنيەتى مەن داڭقىن ايگىلەپ كورسەتتى. وتان بارىنەن ۇلى – شەكارا اتتاپ شەتەل بارعاندا ۋاكىلدىك ەتەتىنى قۇدىرەتتى وتان.

　　قۇرمەت قاراۋىلىنىڭ ساربازدىعىنا تاڭدالۋدى «جۇزدەن شىققان جۇيرىك» ساناساق، شەتەلدەگى سالتانات شەرۋىنە قاتىناساتىن ساربازدىڭ قاتارىندا بولۋدى «مىڭنان ىرىكتەلگەن تۇلپار» ساناتىنا قوسار ەدىك. ويتكەنى، شەتەلدەگى سالتانات شەرۋىنە قاتىناساتىن ساربازداردىڭ بارلىعى سول مەملەكەتتىڭ كوزايىم ايناسى سانالارى حاق. ولاردىڭ ءاربىر قادامى وتانعا ۋاكىلدىك ەتىپ، يىعىندا پارتيا مەن حالىق تاپسىرعان قاسيەتتى بورىش بار.

　　ءۇش ارميا قۇرمەت قاراۋىلى اترەتىنىڭ كوميسسارى ليۋ حايميڭ تانىستىرىپ بىلاي دەدى: شەتەلدەگى سالتانات شەرۋىنە قاتىناساتىن ساربازداردىڭ بارلىعى مىڭنىڭ ىشىنەن ەكشەلىپ شىققاندار، ساياسي ساپا وتكەلىنەن، قاتاڭ ساياسي باعالاۋ ىرىكتەۋىنەن وتكەن، ساياسي – يدەيالىق بەينەسى كورنەكتى پارتيا مۇشەلەرى نەمەسە جاستار وداعى مۇشەلەرى الدىمەن تاڭدالدى. وسى نەگىزدە قۇرمەت قاراۋىلىنىڭ ارناۋلى تەحنيكالىق جاتتىعۋى مەن باعالاۋىنا قاتىناستىرىلىپ، قيمىل – ارەكەتى قاعىلەز، تاجىريبەسى مول، ماڭىزدى، ءىرى قۇرمەت قاراۋىلى شەرۋلەرىنە قاتىناسقان كەلبەتتى سارباز، تاستۇلەك جاۋىنگەرلەر تاڭدالدى.

　　كەلۋ قاينارى: حالىق تورابى