بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

ۇلتتار باسپاسى «قازاق بالا» كلۋبىنداعى بالدىرعاندارعا بازارلىق ۇسىندى

2015.06.01 10:20   كەلۋ قاينارى : حالىق تورابى



  حالىق تورابى، 1- ماۋسىم، بەيجيڭ. (نۇرعيسا قۇرمانجان ۇلى) 1 – ماۋسىم حالىقارالىق بالالار مەرەكەسىن قارسى الۋ بايلانىسىمەن ۇلتتار باسپاسى بەيجيڭدەگى «قازاق بالا» كلۋبىنىڭ بالدىرعاندارىنا بالالارعا ارنالعان قازاق تىلىندەگى كىتاپتاردان بازارلىق ۇسىندى.

  كلۋبتاعى بالالاردىڭ اتا – انالارى مەرەكە بايلانىسىمەن قالا سىرتىنداعى دەمالىس ورىندارىنىڭ بىرىندە بالالارعا ارناپ مەرەكەلىك قيمىل ۇيىمداستىرعان بولاتىن. بالالار ۇلتتىق ويىنداردان سىرت، فۋتبول، ارقان تارتۋ قاتارلى قىزىقتى باسەكەلەرگە قاتىناستى، ۇلتتار باسپاسىنىڭ بالالارعا كىتاپ ۇسىنۋ سالتى بۇل يگى ءىستىڭ مازمۇنىن بايىتىپ، ءمانىن ارتتىرا ءتۇستى.

  بۇل جولى ۇلتتار باسپاسى قازاق بالالار ەرتەگىلەرىنەن قىستىرما سۋرەتتى كىتاپشالاردى بالالارعا ۇسىندى، مۇنىڭ ىشىندە «نان باتىر» «اقىلدى بالا» «دومبىراشى تەكە» «قاڭباق شال» قاتارلى تاربيەلىك رولى جوعارى ەرتەگىلەر قامتىلعان، بالالارعا بەرەتىن ءتالىمى مول بۇل كىتاپشالاردى شينجياڭ وقۋ – اعارتۋ ۋنيۆەرسيتەتى وقۋعا دەيىنگى تاربيە ينيستيتۋتىنىڭ مۇعالىمى گۇلنۇر قۇرمانبەك قىزى قۇراستىرىپ شىققان، قىستىرما سۋرەتتەردى اۆتوردىڭ جۇبايى جاۋدات قايسا ۇلى سىزعان.

  كىتاپ تاراتۋ سالتىنا ۇلتتار باسپاسى باس رەداكتورىنىڭ كومەكشىسى مۇناي ءابىلباي ۇلى، ۇلتتار باسپاسى قازاق رەداكسياسىنىڭ مەڭگەرۋشىسى باقىتبەك توقتاسىن ۇلى، كىتاپتىڭ قۇراستىرۋشىسى گۇلنۇر قۇرمانبەك قىزى، «قازاق بالا» كلۋبىنىڭ قۇرۋشىسى جانار ىسلامبەك قىزى جانە بالالار مەن اتا – انالار قاتىناستى. ەرتەگى كىتاپتاردى قۇراستىرعان گۇلنۇر قۇرمانبەك قىزى بالالارعا ءوز قولىمەن كىتاپتاردى تارتۋ ەتتى.

  ەستەرىڭىزگە سالا كەتسەك، بيىل ناۋرىز ايىندا بەيجيڭدەگى «قازاق بالا» كلۋبى قۇرىلعاندىعىنىڭ ءبىر جىلدىعى تويلانعان بولاتىن. بالالاردىڭ انا ءتىلىن ۇيرەنىپ، ۇلتتىق سالت – سانادان سۋسىنداۋىنا وراي جاراتۋ ءۇشىن، بەيجيڭدەگى اتا – انالار جانار ىسلامبەك قىزىنىڭ باستاماشىلدىعىندا وزدىكتەرىنەن ۇيىمداسىپ قۇرعان بۇل كلۋبتا اپتا سوڭىندا بالالارعا ارناۋلى ۇسىنىس ەتىلگەن مۇعالىم قازاق تىلىنەن ساباق بەرەدى.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 
جاۋاپتى رەداكتورى : نۇرعيسا قۇرمانجان ۇلى

 سۋرەت