ەرتىس قاينارىنداعى ەركە بۇلاقتار

2015.06.02 14:38   كەلۋ قاينارى : حالىق تورابى

　　سەرىك يمامشاپيىق ۇلى حابارلايدى. مامىردىڭ 29 - جۇلدىزى كيەلى مەكەن كوكتوعايدىڭ كوركەم تاڭى تاعى دا ءبىر ءتاتتى جىردى ۇكىلى بەسىگىندە تەربەتىپ، ورىمدەي وركەندەرىن اتا - ءداستۇردىڭ اسىل قاسيەتتەرىنە باستادى.

　　جاسىل جاحۇتىمەن اسىل احىتىمەن اڭىزعا اينالعان ابىز دالادا، ارلان جۇرەك باتىرلار ارعىماعىن سۋارعان ەسىل ەرتىستىڭ جاعاسىندا ەلدىڭ ەرتەڭى بولاشاق بالا اقىندار وسىناۋ ارقالى ەلدەگى ونەردىڭ التىن ارقاۋىنىڭ ماڭگى ۇزىلمەيتىنىن تاعى دا ءبىر ايگىلەپ وتكەندەي بولدى.

　　كوكتوعاي اۋدانى «جاستاردى ءداۋىر مادەنيەتىمەن قاۋىشتىرۋ» اتىنداعى 2 - كەزەكتى ءوسپىرىم اقىندار ايتىسى جانە ءداستۇرلى ۇلتتىق ويىندار جارىسى دەپ اتالعان بۇل قيمىل شينجياڭ ۇيعۇر اۆتونوميالى رايونى قۇرىلعاندىعىنىڭ 60 جىلدىق مەرەي تويى كەلۋ قارساڭىندا كوكتوعاي اۋداندىق حالىق ۇكىمەتىنىڭ ەرەكشە قولداپ - قۋاتتاۋىمەن، اۋداندىق ادەبيەت - كوركەمونەرشىلەر بىرلەستىگى ۇستىنە الىپ وتكىزگەن، جاس وسپىرىمدەردىڭ ونەرىن ايگىلەپ، يراداسىن شىڭداۋعا ارنايى ۇيىمداستىرىلعان مازمۇنى باي ونەر مايدانى ەدى.

　　قيمىلدىڭ باستالۋ سالتى كوكتوعاي اۋدانىنىڭ ورىنباسار اكىمى دوكەن قۇماش ۇلىنىڭ ىستىق ىقىلاسقا تولى ارناۋ سوزىمەن باستالدى. كوكتوعاي اۋدانىنىڭ اكىمى ەرجان كازىم ۇلى باستاعان ەل اعالارى باستان - اقىر تاماشالادى. بۇل رەتكى وسپىرىمدەر ايتىسىن حالىقارالىق جىر ءمۇشايرالارىنىڭ جۇيرىگى، اقساي ادەبيەت سيلىعىنىڭ باس جۇلدەگەرى جاس اقىن ەرلان نۇردىقان ۇلى، اقىن جۇماقان تەنتەكقارا ۇلى، اقىن التاي نۇرعاميت ۇلى، جۇلدەلى ايتىس اقىندارى ۇلاربەك ميناتقان ۇلى، نۇرگۇل اندەستان قىزى قاتارلىلار باعالادى. اۋەلدە بالدىرعانداردان قۇرالعان وركەستىردىڭ ورىنداۋىنداعى كۇمبىرلى كۇيمەن شىمىلدىعىن اشقان شىرايلى قيمىل جانارىنان ەلىنىڭ نۇرلى كەلەشەگى ۇشقىنداعان بالاپان اقىنداردىڭ بال ءتىلدى ايتىسىنا ۇلاستى.

　　پەرىشتەدەي پەيىلمەن، بالالىق پاك سەزىممەن ساحناعا كوتەرىلگەن جەتكىنشەك اقىندار وزدەرىنە عانا ءتان ءتاتتى تۇيسىكتەرىمەن ەش بوياماسىز ەركە جىرلارىن تايسالماي توگىپ، كورەرمەندەر كوڭىلىنە ءرياسىز كوركەمدىك سيلادى. ايتىس ارالىعىندا ءار مەكتەپتەن سارالانىپ كەلگەن وسپىرىمدەر ورىنداعان ءان - كۇيلەر ەرتىستىڭ تولقىنىنا قوسىلعان تۇمانىڭ تۇنىق سىڭعىرىن ەلەستەتتى.

　　جاس بولسا دا باس بولارلىق وي ايتىپ، بىلايعى جۇرتقا وزدەرىنىڭ ۇجداندى تالانتىن بايقاتقان ءماۋلىتقان مەن تىلەكتىڭ ايتىسى كوپ كوڭىلىن جاڭا ءبىر جارقىن تەبىرەنىسپەن تولقىتتى. سوڭىندا قازىلار القاسىنىڭ شەشىمىمەن ءماۋلىتقان وسى رەتكى ءوسپىرىم اقىندار ايتىسىنىڭ باس بايگەسىن ەنشىلەدى. جىر كومبەسىنە جارىسا جەتكەن بارلىق ءوسپىرىم اقىندار ءار دارەجە بويىنشا ءوز باسىرەسىن الىپ، ەل اعالارىنىڭ ەرەكشە ىقىلاسىمەن جۇزدەرىنەن شاتتىق لەبى ەستى.

　　اتالعان قيمىلدىڭ جالعاسى تۇستەن كەيىن بالالاردىڭ ۇلتتىق ويىندار جارىسىنا ۇلاستى. ۇلتتىق ويىن تۇرلەرى توعىز قۇمالاق ويىنى، اسىق ويىنى بولىپ ارناۋلى الاڭداردا باپكەرلەردىڭ جەتەكشىلىگىندە جۇيەلى تارتىپپەن وتكىزىلدى. ۇلتتىق ويىننىڭ بۇل تۇرلەرىنە وزگەشە ىنتا تانىتقان جەتكىنشەكتەردىڭ قۇلشىنستارىنىڭ ناتيجەسىندە توعىز قۇمالاق ويىننان كوكتوعاي قالاشىعىنان بەردىبەك سەرىك ۇلى؛ اسىق اتۋ ويىننان تەمەكى اۋىلىنان ەسەنبول ميراسبەك ۇلى باس جۇلدەنى جەڭىپ الدى.

　　باسقا ۇلتتىق ويىن ونەرپازدارى ءار دارەجە بويىنشا سيلىق تورىنەن كورىنىپ كەلەسى جارىستاردا مۇنان دا ەرەن تابىستارعا جەتۋگە بەرىك يرادا قالادى.

　　وسلايشا تاماشالاۋشىلاردى ۇلتتىق بوگەنايىمەن تامسانتقان دابىرالى دۋمان ءوز مارەسىنە جەتتى.

　　ءيلايىم، ارىدان كەلە جاتقان اتا مادەنيەتىمىزدىڭ ارقاۋى ۇزىلمەگەي!

　　كوكتوعاي اۋداندىق راديو - تەلەۆيزيا مەكەمەسى

　　كەلۋ قاينارى: حالىق تورابى