اعاجاي التايداعى ازيالىق ارىستان...

ساعىنبەك رابات ۇلى

2015.07.15 15:54   كەلۋ قاينارى : حالىق تورابى

　　شىلدەنىڭ 12-كۇنىنەن 13-كۇنىنە دەيىن التاي قالاسىندا وتكەن قازاق كۇرەسىنىڭ 11-كەزەكتى ازيا جۇلدەسىنە تالاسۋ جارىسىنا قازاقستان، وزبەكستان، قىرعىزستان، يران، يراق، ءۇندىستان، رەسەي قاتارلى 18 مەملەكەت پەن شياڭگاڭ ەرەكشە اكىمشىلىك رايونىنان جيىنى 19 كوماندا قاتىناستى. بۋرا سان، اتان جىلىك بالۋاندار 60، 70، 80، 90 كيلوگرام جانە 90 كيلوگرامنان جوعارى سالماق بويىنشا، سونداي-اق تۇيە بالۋاندىققا تالاسۋ ارىسىنا ءتۇستى. ازيا قازاق كۇرەسى قوعامىنڭ ورنالاستىرۋىنا ساي، بۇل رەتكى جارىسقا حالىقارالىق 8 تورەشى، ەلىمىزدەن 8 تورەشى تورەشىلىك مىندەتىن اتقاردى.

　　سوڭعى ەسەپتە، 60 كيلوگرامدىق سالماقتا قازاقستان رەسپۋبليكاسىنىڭ بالۋانى قۋانىش ىسقاقوۆ، 70 كيلوگرامدىق سالماقتا قازاقستان رەسپۋبليكاسىنىڭ بالۋانى باعداۋلەت ءسابيتوۆ، 80 كيلوگرامدىق سالماقتا ەلىمىز بالۋانى امانجول ۇسەنتاي ۇلى، 90 كيلوگرامدىق سالماقتا قازاقستان رەسپۋبليكاسىنىڭ بالۋانى ماقسات ءمازىبايوۆ، 90 كيلوگرامنان جوعارى سالماقتا قازاقستان رەسپۋبليكاسىنىڭ بالۋانى اسىل بارمانوۆ التىن مەدالعا يە بولسا، وسى رەتكى قازاق كۇرەسىنىڭ «تۇيە بالۋانى» اتاعى قازاقستان رەسپۋبليكاسىنىڭ بالۋانى عاني سادەلبايوۆقا بۇيىردى. قازاقستان كومانداسى 5 التىن، 3 كۇمىس، ءبىر قولا مەدالمەن توپتىق ناتيجەدە ءبىرىنشى ورىندى؛ ەلىمىز كومانداسى ءبىر التىن، 3 كۇمىس، 7 قولا مەدالمەن ەكىنشى ورىندى؛ قىزعىزستان كومانداسى 3 قولا مەدالمەن ءۇشىنشى ورىندى يەلەسە، جەكە-جەكە ءبىر قولا مەدال العان يران، يراق، تاجىكستان كومانداسى ءتورتىنشى ورىندى يەلەدى. التىن مەدال يەگەرلەرىنە 20 مىڭ، كۇمىس مەدال يەگەرلەرىنە 10 مىڭ، ال قولا مەدال يەگەرلەرىنە 5000 يۋاننان سيلىق بەرىلدى.

　　قازاق كۇرەسىنەن ازيالىق جۇلدەگە تالاسۋ جارىسىنىڭ تۇساۋى 2005- جىلى رەسەيدىڭ التاي رەسپۋبليكاسىنداعى قوساعاش ەلدى مەكەنىندە كەسىلدى. 2-كەزەگى موڭعۇليادا، 3-كەزەگى قازاقستاندا، 4-كەزەگى قىرعىزستاندا، 5-، 6-كەزەگى قازاقستاندا، 7-كەزەگى ءۇندىستاندا، 8-كەزەگى قازاقستاندا، 9-كەزەگى گانسۋ ولكەسىنىڭ اقساي قازاق اۆتونوميالى اۋدانىندا، 10-كەزەگى قازاقستاندا وتسە، وسى كەزەگى ياعني 11-كەزەگى مىنە بيىل شينجياڭنىڭ سارا ورتاسى كورىكتى التاي قالاسىندا وتكەنىن ەستەرىڭىزگە سالا كەتسەك ارتىق بولماس.

　　ەندى ءتىلشىنىڭ وسى رەتكى جارىستان تۇسىرگەن كوزايىم ساتتەرىن تاماشالاڭىز.

　　كەلۋ قاينارى: حالىق تورابى