بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

سۋرەتتەر سويلەيدى

 تۇرسىنجان جاناتاي ۇلى حابارلايدى

2015.07.24 16:23   كەلۋ قاينارى : حالىق تورابى



  قازاق فوتوگرافتارى بىرنەشە جىلدان بەرى باس قوسىپ، قيمىلدار وتكىزىپ كەلەدى. ۇستەگى جىلعى قازاق فوتوگرافتارى اسىعا كۇتكەن «سۋرەتتەر سويلەيدى» فوتو كەڭەسىنىڭ 2 - كەزەگى 18-، 19 - شىلدە كۇندەرى كوكتوعاي اۋداندىق پارتكومنىڭ ورىنباسار شۋجيى، اۋدان اكىمى ەرجان كازىم ۇلىنىڭ قولداۋى مەن باقىتقان اسەت ۇلى باستاعان فوتوگراف ازاماتتاردىڭ مۇقيات ۇيىمداستىرۋىندا كوكتوعاي اۋدانىنىڭ كورىكتى سايقىنبۇلاق جايلاۋىندا وتكىزىلدى.

  قيمىلعا ءۇرىمجى، سانجى، تارباعاتاي جانە التاي ايماعىنىڭ ءارقايسى اۋداندارىنان كەلگەن 23 فوتوگراف وزدەرىنىڭ تاڭداۋلى فوتو تۋىندىلارىنا تانىستىرۋ جاساپ، سۋرەتتەرىن سويلەتتى. ازاماتتاردىڭ ءار تاقىرىپتا تارتقان فوتو سۋرەتتەرىنىڭ ارتىقشىلعى مەن جەتپەي جاتقان تۇستارىنا قاراتا مەملەكەتتىك ەتنوگرافيالىق (سالت-سانا) فوتو سۋرەتشىلەر قوعامىنىڭ ماگىسترى، اۆتونوميالى رايوندىق فوتو سۋرەتشىلەر قوعامىنىڭ مۇشەسى، قازاقستان فوتو ونەر قوعامدىق بىرلەستىگىنىڭ مۇشەسى، التاي ايماقتىق فوتو سۋرەتشىلەر قوعامىنىڭ ورىنباسار ءتوراعاسى، كورنەكتى فوتوگراف سەرىك مۇقىش ۇلى؛ شينجياڭ سۋرەتتى جۋرنالىنىڭ ورىنباسار باس رەداكتورى، قازاقستان فوتو ونەر قوعامدىق بىرلەستىگىنىڭ مۇشەسى، تانىمالى فوتوگراف سەرىك نۇردىباي ۇلى؛ شينجياڭ ۇيعۇر اۆتونوميالى رايوندىق فوتو سۋرەتشىلەر قوعامىنىڭ، ىلە قازاق اۆتونوميالى وبىلىستىق فوتو سۋرەتشىلەر قوعامىنىڭ مۇشەسى، تارباعاتاي ايماقتىق فوتو سۋرەتشىلەر قوعامىنىڭ ورىنباسار ءتوراعاسى، ءدوربىلجىن اۋداندىق فوتو سۋرەتشىلەر قوعامىنىڭ ورىنباسار ءتوراعاسى، تانىمالى فوتوگراف اكبار ۇركىنباي ۇلى قاتارلى ماماندار قۇندى ۇسىنىس - پىكىر بەرىپ، جىگىتتەردىڭ جىگەرىنە قامشى باسىپ، جەتەرسىزدىكتەرىنە جول كورسەتتى ءارى فوتوگرافتارعا ناق مايداندا فوتو سۋرت تارتۋدىڭ تەحنيكالىق ولشەمدەرى مەن ءادىسىن ۇيرەتىپ، جەتەكشىلىك ىستەدى.

  «ۇستازى جاقسىنىڭ ۇستامى جاقسى» قاشاندا، اتالعان قيمىلدىڭ جۇرگىزىلۋىنە ءوزىنىڭ اششى تەرىن توگىپ، قازاق فوتو جانكۇيەرلەرىن قاناتىنىڭ استىنا الىپ، ونەرلەرىنىڭ ۇشتالۋىنا جول كورسەتىپ كەلە جاتقان سەرىك مۇقىش ۇلىنىڭ ءتالىمىن العان جىگىتتەردىڭ فوتوشىلىق ونەرى كۇن سايىن دامىپ، توپشىسىنىڭ قاتايىپ كەلە جاتقانىنا كوز جۇمۋعا بولماس. مەملەكەت، اۆتونوميالى رايون جانە ايماق جاعىنان وتكىزىلگەن تۇرلى فوتو سۋرەت بايقاۋلارىندا شاشالارىنا شاڭ جۇقتىرماي، ماراپات تورىنەن كورىنگەن باقىتقان اسەت ۇلى، قاپەز شاعبان ۇلى، ادىلبەك قۇرمانعالي ۇلى، ماقۇلبەك سۇلەيمەن ۇلى قاتارلى فوتوگرافتار بۇنىڭ ايقىن دالەلى. قولىمىزعا فوتو اپپارات الىپ گازەت جانە توراپتاردا حابار - ماقالا جازىپ جۇرگەنىمىز بولماسا، كوركەم فوتو سۋرەت پەن اقپاراتتىق سۋرەتتىڭ ارا پارقىن تولىق اجىراتىپ كەتپەيتىنبىز، الايدا وسى فوتو قيمىلىنا قاتىناسقان بىرقانشا جىلدان بەرى وزىمدە كوپتەگەن ىلگەرلەۋشىلىكتەر بولعاندىعىنا اماليات بارىسىندا كوز جەتكىزدىم. فوتو ونەرى ماعان تىڭ شابىت، ورەلى وي سيلاپ، فوتو ونەرىنە دەگەن تۇسىنىگىمىز، اۋەستىگىمىز تىپتى دە تەرەڭدەي ءتۇستى. «شاكىرتسىز ۇستاز تۇل»- دەمەكشى، ۇستازىمىز سەكەڭە ايتار العىسىمىز ەرەكشە.

  اتالعان قيمىل بارلىق كۇن تارتىبىن ءساتتى اقىرلاستىرىپ، كەلەر جىلى وتەتىن قيمىلدىڭ بەلگىسىن سالقىن ساۋىردان كەلگەن جەمەنەي اۋداندىق ۇگىت ءبولىمىنىڭ ورىنباسارى، اۋداندىق مادەنيەت - كوركەمونەر بىرلەستىگىنىڭ ءتوراعاسى جاڭالان قاليبەك ۇلى تاپسىرىپ الىپ، قيمىلدى ماڭىزدى كۇن ءتارتىپكە ەنگىزىپ، ءماندى وتكىزىپ بەرەتىندىگىنە سەنىم بىلدىردى. سايقىنبۇلاقتاعى ءساتتى ساپارلارىن اقىرلاستىرعان ازاماتتار قيماستىقپەن قوش ايتىسىپ كەلەر جىلعا قانداي دايارلىقپەن كەلۋگە جۇكتى بولىپ قايتتى.

  ءيا، وسى فوتو كوشىنىڭ باعدارى بارعان سايىن ايقىندالىپ، مارتەبەسى تىپتى دە بيىكتەپ، قولداۋشىلاردىڭ قوسىنى كوبەيىپ، ۇدىرە العا تارتا بەرەتىنىنە سەنىمىمىز كامىل. جاپاسى مەن قىزىعى قاتار جۇرەتىن فوتو ونەرى سىندى الىپ تەڭىزدىڭ تەرەڭىنە سۇڭگىپ، تەبەن ءىزدەۋ تەك قاجىرلى دا قايسار جانداردىڭ قولىنان كەلەتىندىگىن ءبىرىمىز بىلسەك ءبىرىمىز بىلە بەرمەيمىز. كوركى كوز تارتاتىن ءبىر پارشا فوتو سۋرەتتىڭ قالتارىسىندا قانشاما جاپالى ەڭبەكتىڭ جاتاتىنىن زەردەڭىزگە سالىپ كورىڭىز. نەمەسە اشتى كۇننىڭ اپتابى مەن قىستىڭ قىسپاعىنا شىداپ، تاڭنىڭ اتىسى، كۇننىڭ باتىسى، قارىننىڭ اشتىعىن قايىرىپ قويىپ، سول سۋرەتتىڭ گەرويىمەن مايدانعا بىرگە بارار بولساڭىز، اشتى ەڭبەكتىڭ ءتاتتى جەمىسىنە كۋا بولار ەدىڭىز. ءبىزدىڭ ۇستانعان جولىمىز فوتو ونەرىنە ازدا بولسا تامشى بولىپ تامىپ، قازاق فوتوشىلارىنىڭ قوسىنىن بەرىك بەكەمدەپ، ونەرىمىزدى وزگەگە تانىتۋ بولماق. سىزدە فوتو ونەرىنە قىزىقساڭىز، قوسىنىمىزعا قوسىلىپ، كوركەمدىكتەن ورتاق ەستەتيكالىق ءلاززات الىڭىز. «سۋرەتتەر سويلەيدى» فوتو كەڭەسى ءسىزدى قارسى الادى. ءبىزبەن كەڭەسىڭىز، ورتاق وي بولىسىڭىز. ونەرلىنىڭ ءورىسى كەڭ ءارقاشان.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 【10】 
جاۋاپتى رەداكتورى : مۇحيت امانتاي ۇلى

 سۋرەت