مالايزيا رۋنيون ارالىنان تابىلعان ۇشاق سىنىقتارىنىڭ MH370 ۇشاعىنىڭ سىنىقتارى ەكەنىن جاريالادى

2015.08.06 13:48   كەلۋ قاينارى : حالىق تورابى

　　مالايزيا پرەمەر – مينيسترى ناجيپ (ورتادا) 6 – تامىز كۇنى مالايزيانىڭ كۋالا – لۋمپۋر قالاسىندا اقپار جاريالاۋ ماجىلىسىنە قاتىناسۋدا. سول كۇنى ول 29 – شىلدەدە فرانسياعا قاراستى رۋنيون ارالىنان تابىلعان ۇشاق سىنىقتارىنىڭ مالايزيا اۆياتسيا سەرىكتىگىنىڭ MH370 جولاۋشىلار ۇشاعىنىڭ سىنىقتارى ەكەنىن جاريالادى. شينحۋا اگەنتتىگى (جاڭ ۋىنزۇڭ فوتوسى)

　　حالىق تورابى، 6 – تامىز، بەيجيڭ. مالايزيانىڭ پرەمەر – مينيسترى ناجيپ 6 – تامىز كۇنى اشىلعان اقپار جاريالاۋ ماجىلىسىندە 29 – شىلدەدە فرانسياعا تاۋەلدى رۋنيون ارالىنان تابىلعان ۇشاق سىنىقتارىنىڭ مالايزيا اۆياتسيا سەرىكتىگىنىڭ MH370 جولاۋشىلا ۇشاعىنىڭ سىنىقتارى ەكەنىن جاريالادى.

　　ناجيپ اقپار جاريالاۋ ماجىلىسىندە: حالىقارالىق ماماندار گرۋپپاسىنىڭ رۋنيون ارالىنان تابىلعان ۇشاق سىنىقتارىنىڭ MH370 ۇشاعىنىڭ سىنىقتارى ەكەنىن تۇراقتاندىرعانىن قايعىلى كوڭىل – كۇيمەن جاريالايمىن، دەرەكتەر MH370 ۇشاعىنىڭ وڭتۇستىك ءۇندى تەڭىزىندە تراگەدياعا ۇشىراعانىن راستادى»، - دەدى.

　　29 – شىلدە كۇنى رۋنيون ارالىنىڭ شىعىسىندا جەرگىلىكتى تۇرعىندار ۇشاق سىنىقتارىن بايقاپ، بۇل ۇشاق سىنىقتارىنىڭ مالايزيانىڭ MH370 ۇشاعىمەن قاتىستى بولۋى مۇمكىن دەپ تۇسپالداعان. ءبىر كۇننەن كەيىن تاعى سول ماڭداعى تەڭىز قايراڭىنان قوڭىرقاي رەڭدى قول سومكە تابىلدى. ۇشاق سىنىعى مەن قول سومكە 1 – تامىزدا فرانسياعا جەتكىزىلدى.

　　كەشە كوپ ەلدىڭ ماماندارى فرانسياعا جينالىپ، جۋىردا فرانسياعا قاراستى رۋنيون ارالىنان تابىلعان ۇشاق سىنىعىنا تەحنيكالىق جاقتان ساراپتاۋ جاسادى. بۇگىن مالايزيانىڭ پرەمەر – مينيسترى ناجيپ بۇل ۇشاق سىنىعىنىڭ مالايزيانىڭ MH370 ۇشاعىنىڭ سىنىعى ەكەنىن جاريالادى.

　　ناجيپ مالايزيا ۇكىمەتىنىڭ ءىستىڭ انىق – قانىعىنا كوز جەتكىزۋ ءۇشىن بارلىق مۇمكىندىكتەردەن پايدالاناتىندىعىن ايتتى.

　　مالايزيانىڭ كۋالا – لۋمپۋر قالاسىنان جۇڭگونىڭ بەيجيڭ قالاسىنا ۇشقان مالايزيا اۆياتسيا سەرىكتىگىنىڭ MH370 كەزەكتى ۇشاعى 2014 – جىلى 8 – تامىزدا دەرەكسىز كەتكەن، ۇشاقتا 239 ادام بار بولاتىن. بيىل 29 – قاڭتاردا مالايزيا حالىقتىق اۆياتسيا مەكەمەسى MH370 جولاۋشىلار ۇشاعىنىڭ قۇلاعانىن جاريالاپ، ۇشاقتاعى بارلىق ادامنىڭ قازا تاپقانىن جورامالداعان. كەزەكتە، اۆستراليا مەن مالايزيا ەكى ەل ۇكىمەتى جالعا العان 4 كەمە اۆستراليانىڭ پەرس قالاسىنىڭ باتىسىنداعى وڭتۇستىك ءۇندى تەڭىزىندە ىزدەۋ مىندەتىن اتقارۋدا.

　　كەلۋ قاينارى: حالىق تورابى