تەكەستە ءتاڭىرتاۋ مادەنيەت - ساياحات مەرەكەسى باستالدى

باقىتبەك ءجۇمادىل ۇلى

2015.08.13 14:58   كەلۋ قاينارى : حالىق تورابى

　　جۇڭگو تەكەس «ءتاڭىرتاۋ مادەنيەت – ساياحات فەستيۆالى» اياسىنداعى جەلىلەس قيمىلدار مەن تەكەس اۋدانىنىڭ 22 – كەزەكتى اقىندار ايتىسى 8 – تامىزدان 10 – تامىزعا دەيىن دابىرالى وتكىزىلدى.

　　اۆتونوميالى رايون قۇرىلعاندىعىنىڭ 60 جىلدىعىن قۇتتىقتاۋ قارساڭىندا تەكەس اۋدانى مىعىم دايىندىقپەن ۇيىمداستىرعان ۇلتتىق ەرەكشەلىگى ايقىن مادەني قيمىلدار مەن بازارعا سالعان الۋان ءتۇرلى قولونەر تۋىندىلارى توڭىرەكتىڭ ءتورت بۇرىشىنان كەلگەن ساياحاتشىلاردى تامساندىرىپ، اۋداننىڭ ساياحات ىستەرىنىڭ دامۋىن جەبەپ، تەكەس حالقىنىڭ اقىل - پاراساتىن، جاسامپازدىعىن ايگىلەدى.

　　قيمىلدىڭ اشىلۋ سالتىندا الاڭعا ورنالاستىرىلعان كەستەشىلەر توبى، سىرماقشى جەڭگەيلەر، ۇرشىقشى اجەلەر توبى، اعاش ويما شەبەرلەرى مەن ورىمشىلەر توبى جانە قىرعىز ۇلتىنىڭ قولونەرشىلەر توبى سىندى ونەرپازدار توبى ءوز ونەرلەرىن كورسەتىپ، توڭىرەكتىڭ ءتورت بۇرىشىنان تەكەسكە جينالعان ءار ەل ساياحاتشىلارىن ءتانتى ەتىپ، ساحارا مادەنيەتىنىڭ وشپەس جاۋھارلارى وزدەرىنىڭ قوس قولدارىمەن جالعاسىن تاۋىپ جاتقانىن ماقتانىش ەتتى.

　　تەكەس اۋداندىق پارتكومنىڭ شۋجيى ليۋ لي قيمىلدىڭ باستالۋ سالتىنداعى سوزىندە وسى رەتكى مەرەكەنىڭ ماڭىزىن تۇيىندەپ: «بۇل ۇلان - اسىر مەرەكەدەگى جەلىلەس قيمىلداردى اۆتونوميالى رايون قۇرىلعاندىعىنىڭ 60 جىلدىعىن قىزۋ قۇتتىقتاۋعا شاشۋ رەتىندە ۇيىمداستىردىق، ءبىز ەكولوگيالىق ورتاسى تاماشا، تىرشىلىك ورتاسى جاراسىمدى، مادەنيەتى ايشىقتى بولۋدى تياناق ەتە وتىرىپ، تەكەستى كۇللى الەمگە بەت الدىرۋ ءۇشىن ۇگىت جاسايمىز»، - دەدى.

　　وسى رەتكى قيمىلدا اۋداننىڭ «جىبەك جولى قولونەر سارايىنىڭ» اشىلۋ سالتى وتكىزىلىپ، ەڭبەگى ەلەۋلى قولونەر شەبەرلەرى سيلاندى. تۇڭعىش رەتكى اۋا شارىمەن كوككە كوتەرىلىپ، سەگىز ءمۇيىستى قالاشىقتىڭ كوركىن تاماشالاۋ قيمىلى، ۆەلەسيپەدپەن ىلەنى اينالۋ جارىسى باستالدى. جانە كەدەرگىلى جولدا دالالىق اۆتوموبيل جۇرگىزۋ شەبەرلىك جارىسى سىندى جارىس تۇرلەرى وتكىزىلىپ، ءدامدى تاعامدار جايماسى مەن سىرا مەرەكەسى سياقتى قوسالقى قيمىلدار مەرەكەنىڭ سالتاناتىن اسىرا ءتۇستى. مەرەكەنىڭ ماڭىزدى قيمىلدارىنىڭ تاعى ءبىرى 4 - رەتكى جوۋ - ي مادەنيەتىن زەرتتەۋ تالقى مىنبەسى اشىلىپ، 4 - كەزەكتى جۇڭگو تەكەس حالىقارالىق فوتوسۋرەت باسەكەسىندە جۇلدە العان ۇزدىك فوتو تۋىندىلار سيلاندى. ەلىمىز ءىشى - سىرتىنداعى ايگىلى فوتوسۋرەتشىلەردىڭ سارا تۋىندىلارى شينجياڭداعى وزگەرىستەر مەن تەكەس اۋدانىنىڭ قاتپارى قالىڭ تاريحىن جانە مادەنيەتىن، بوياۋى قانىق ۇلتتىق سالت - ساناسىن، دارالىق ەرەكشەلىككە يە كوركەم تابيعات كورىنىستەرىن فوتو تىلىمەن بەينەلەدى.

　　9 -، 10 - تامىز كۇندەرى ايگىلى قاراجون جايلاۋىندا وتكىزىلگەن اۋداننىڭ 22 - كەزەكتى اقىندار ايتىسى مەن ءداستۇرلى ات ءۇستى سپورت تۇرلەرى ويداعى دابىرالى تويدى قىرعا جالعاپ، ساحارا حالقىن ءبىر جىرعاتىپ تاستادى.

　　اۋداننىڭ مادەنيەت الاڭىندا وتكىزىلگەن باستالۋ سالتىنداعى كولەمدى ويىن - ساۋىقتا جانە قاراجونداعى ايتىستىڭ الدىنداعى ساحارا ساحناسىنداعى قويىلىمدا ءانشى – ءبيشى، ارتيستەر ءۇيسىن مادەنيەتى مەن سەگىز ءمۇيىستى قالاشىقتاعى بالناما مادەنيەتىن كوركەم ءبي نومىرلەرىنە سىڭىرە بەينەلەپ، اسەم انمەن كورەرمەننىڭ قۇلاق قۇرىشىن قاندىردى. مىنە وسىنداي ساحارانىڭ دارقان تويىن كورگەن ەل ءىشى - سىرتىنان كەلگەن ساياحاتشىلار سەگىز ءمۇيىستى قالاشىق مادەنيەتىنە ءتانتى بولىپ، كوركەم شينجياڭنىڭ بوياۋى قانىق ۇلتتىق مادەنيەتىن اۋىز جاپپاي ماقتاستى.

　　«ءبىر كۇنگى ولەڭنىڭ ءۇش كۇن جەلىگى باسىلماس» دەگەندەي، تەكەس اۋدانى وسى رەتكى مەرەكەنى باستاۋ ەتىپ، الەمدىك مۇراعاتتار تىزىمدىگىنە ەنگەن ايگىلى قاس سۇلۋ جايلاۋ ــ قاراجونعا ساياحاتتاۋ، ۇلتتىق سالت - سانا باقشاسى سپەتتى اقتەرەك، اتشابىس قىستاقتارىنا ەكولوگيالىق سەرۋەن جاساۋ جانە اۋا شارىمەن كوككە كوتەرىلىپ، سەگىز ءمۇيىستى قالاشىقتىڭ كوركىن تاماشالاۋ سياقتى ساياحات تۇرلەرىن ۇدايىلىققا اينالدىرىپ، ساياحاتشىلاردى قاشان كەلسە دە قارسى الىپ، وسى ۇلان اسىر مەرەكەنى باياندى جالعاستىرماقشى ەكەن.

　　اۆتوردىڭ قىزمەت ورنى: ىلە حالىق راديو ستانسياسى

　　كەلۋ قاينارى: حالىق تورابى