قورعاس اۋدانىنىڭ 16 - رەتكى اقىندار ايتىسى دابىرالى وتكىزىلدى

2015.10.08 11:03   كەلۋ قاينارى : حالىق تورابى

انالار ايتىس تويىنا شاشۋ شاشۋدا.

　　جاڭا جۇڭگو قۇرىلعاندىعىنىڭ 66 جىلدىعى جانە شينجياڭ ۇيعۇر اۆتونوميالى رايونى قۇرىلعاندىعىنىڭ 60 جىلدىق مەرەيتويى قارساڭىندا، قورعاس اۋدانىنىڭ 16 - رەتكى اقىندار ايتىسى قىركۇيەكتىڭ 29 - كۇنىنەن 30 - كۇنىنە دەيىن قورعاس اۋدانىنىڭ «جۇڭگو قاراورىك (جابايى الشا) مەكەنى» اتالعان اقسۋ اۋىلىنىڭ مەملەكەتتىك AAAA دارەجەلى ساياحات كورىنىس رايونىندا دابىرالى وتكىزىلدى. ايتىستى قورعاس اۋداندىق حالىق ۇكىمەتى ۇيىمداستىردى، اقسۋ اۋىلدىق حالىق ۇكىمەتى، اۋداندىق مادەنيەت، دەنەتاربيە، راديو - كينو - تەلەۆيزيا مەكەمەسى وسى رەتكى جىر سايىسىن وتكىزدى.

　　بۇل جولعى اقىندار ايتىسىنا اۋدانعا قاراستى 5 قالاشىق، 4اۋىل، ءبىر مال فەرماسى جانە ءبىر ساپالى تۇقىم جەتىلدىرۋ ورتالىعىنان 16 ايتىس اقىنى جانە كۇنەس اۋدانى، نىلقى اۋدانى قاتارلى 4 اۋداننان شاقىرىلعان 8 ايتىس اقىنى ۇسىنىسپەن قاتىناسىپ ونەر كورسەتتى. جىر سايىسىنا قاتىناسۋعا تاڭدالعان اقىندارعا ارىپتەس قويۋ مەن ساحناعا شىعۋ كەزەگى الدىن الا جەرەبە تارتۋ ارقىلى بەلگىلەندى.

　　ايتىستىڭ باستالۋ سالتىندا ىلە قازاق اۆتونوميالى وبلىستىق ويىن - ساۋىق ۇيىرمەسىنىڭ ونەرپازدارى ايتىسقا ارناۋلى دايىنداعان ويىن نومىرلەرىن ورىنداسا، اۋدان ىشىندەگى ونەرپازدار دا تەرمە، كۇي، ءبي قاتارلى ءداستۇرلى ۇلتتىق ونەرلەردەن ونەر كورسەتىپ، ونەرگە سۋساعان حالىققا رۋحاني قۋات باعىشتاپ، قالىڭ ونەرسۇيەر قاۋىمنىڭ القاۋىنا بولەندى. ارناۋلى شاقىرۋمەن كەلگەن شينجياڭ تەلەۆيزياسى 3 – ارناسى «جولاۋشى» باعدارلاماسىنىڭ تىلشىلەرى ايتىستان ارناۋلى باعدارلاما جاسادى.

　　قىركۇيەكتىڭ 30 - كۇنى اقىندار ايتىسىنىڭ شەشۋشى جارىسىندا ايتۋعان مۇقامەتجان ۇلى باس بايگەنى، سارسەنگۇل مولدابەك قىزى مەن نۇرزيا بولاتقان قىزى 2 - دارەجەلى جۇلدەنى، ەردان ءماجيت ۇلى، سارسەنباي ەرلان ۇلى، قيسا شاۋكەن ۇلى 3 - دارەجەلى سيلىقتى، اۋباكىر ساداي ۇلى، گۇلنۇر كارىمجان قىزى قاتارلى 10 اقىن شابىتتاندىرۋ سيلىعىن الدى. تەرمە ،كۇي جانە ءبي ونەرلەرىن كورسەتكەن ونەرپازداردان بايقالي نۇرمۇقان ۇلى قاتارلى 10 ونەرپاز 500 يۋان شابىتتتاندىرۋ سيلىعىن ەنشىلەدى.

　　كەلۋ قاينارى: حالىق تورابى