اقسايداعى «التىن قالام»

2015.11.03 14:10   كەلۋ قاينارى : حالىق تورابى

　　ءومىرجان سەيسەنقۇل ۇلى حابارلايدى. ىشكى ولكەدەگى قازاقتار دەسە كوپ ەلدىڭ ەسىنە الدىمەن گانسۋ ولكەسىندەگى اقساي قازاقتارى ەسكە تۇسەدى، تارعالاڭ تاريحي داۋىرلەردى باسىنان وتكىزگەن اقساي قازاق اۆتونوميالى اۋدانى بۇل كۇندەرى اتاعى الىس جاقىنعا ايگىلەنىپ، ۇلتتىق مۇرانى قاستەرلەۋ، بەيزاتتىق مۇرالاردى قورعاۋ جاعىندا ءسات سايىن ەلدى جالت قاراتىپ كەلەدى. ۇستەگى جىلى عانا دابىرالى وتكەن «اقساي قازاق ادەبيەت سيلىعى» مىنە وسىنىڭ كۋاسى.

　　ورتالىقتىڭ ءۇنىن تومەنگە جەتكىزۋگە ءۇن قوسقان بەيجيڭدەگى ورتالىق ۇلتتار باسپاسىنىڭ تاعى ءبىر قىزمەت وتەۋ تەكشەسى كەشە عانا اقسايدا ءوزىنىڭ قىزمەت وتەۋ ورنىن قۇرىپ، اقساي حالقىنىڭ ۇلتتىق ءتىل – جازۋ جاعىنداعى كىتاپ جەتىسپەۋ سىندى اقتاڭلاعىن تولتىردى.

　　اقسايعا 80 - جىلداردا قازاقشا كىتاپتار تام - تۇمداپ باراتىن، وندا دا كوبىنە اۋدارما كىتاپتار ەدى. كەيىندەپ ءتۇرلى جاعدايلاردىڭ سەبەبىنەن ۇلتتىق تىلدەگى كىتاپتاردىڭ تابىلۋى دا قيىن بولعان. وسى جولى اقسايداعى ۇلت قامىن جەگەن ىرىسجان اپايدىڭ باس بولۋىمەن باستالعان ءىس - شارا قازاننان باستاپ قولعا الىنعان بولسا دا، ءتۇرلى قيىنشىلىقتار سەبەبىنەن قاراشانىڭ 2 - كۇنىندە عانا «التىن قالام» اتىنداعى ۋنيۋەرسال كىتاپ دۇكەنىنىڭ شاڭىراعىن كوتەردى.

　　بۇل كىتاپ دۇكەنىندە ۇلتتار باسپاسىنان شىققان 70كە جۋىق كىتاپ ءتۇرى بار بولۋمەن قاتار، وقۋشىلاردىڭ ۇيرەنۋ وقۋلىقتارى جانە وقىتۋ ماتەريالدارى دا بار بولىپ، جاستار مەن وقۋشىلاردىڭ ەڭ جاقسى كورەتىن قاستەرلى جەرىنە اينالدى. كۇنىنە ادام اياعى ۇزىلمەيتىن وسى كىتاپ دۇكەنىنىڭ اشىلۋ سالتىنا ورتالىق ۇلتتار باسپاسى قازاق رەداكسياسى باستىعىنىڭ ورىنباسارى بەك دوكەي مىرزا ءوز قولىمەن «ورتالىق ۇلتتار باسپاسىنىڭ قىزمەت وتەۋ ورتالىعى» دەگەن بەلگىنى تارتۋ ەتتى.

　　بۇل اقسايداعى قازاق باۋىرلارعا تۇڭعىش رەت اشىلعان ۇلتتىق ءتىل - جازۋداعى كىتاپتاردان سۋسىنداۋ ورنى بولىپ قالماستان، ورتالىق ۇلتتار باسپاسىنىڭ ىشكى ولكەدە تۇڭعىش رەت اشقان قىزمەت وتەۋ تەكشەسى بولىپ سانالادى. وسىنداي ماڭىزدى ءىس شارالاردى اقساي اۋدانىنداعى اتقا مىنەر ازاماتتار مەن قاتىستى ورىنداردىڭ جالعاستى قولداپ قۋاتتايتىنىنا، اقسايداعى جاڭالىقتاردى اسىعا كۇتكەن جۇرتقا تاعى دا قۋانىشتى جاڭالىقتار بەرەتىنىنە سەنىمىمىز كامىل.

　　كەلۋ قاينارى: حالىق تورابى