استانا كومانداسى اتلەتيكو مادريدپەن تەڭ ءتۇستى

2015.11.04 09:53   كەلۋ قاينارى : حالىق تورابى

　　حالىق تورابى، 4 – قاراشا، بەيجيڭ. (نۇرعيسا) تۇڭعىش رەت ەۆروپا چەمپيوندار ليگاسىنىڭ توپتىق كەزەڭىنە وتكەن استانا كومانداسى كەشە (3 – قاراشا) كۇنى بەيجيڭ ۋاقىتى 23:00تە ءوز الاڭىندا وسى جولعى توپتىق كەزەڭدەگى ەڭ مىقتى قارسىلاسى، يسپانيانىڭ ايگىلى اتلەتيكو مادريد كومانداسىمەن كەزدەسىپ، اتاعى الاتاۋداي قارىمدى قارسىلاسپەن 0 : 0 ۇپايمەن تەڭ ءتۇستى. ەستەرىڭىزگە سالا كەتسەك، اتلەتيكو مادريد كومانداسى ەۆروپا چەمپيوندار ليگاسىندا ءبىر رەت ەكىنشى ورىنعا يە بولسا، يسپانيا ءبىرىنشى دارەجەلى ليگاسىندا اعا جۇلدەگەر بولعان.

　　وتكەندە العاشقى كەزدەسۋدە اتلەتيكو مادريد كومانداسىنىڭ الاڭىندا استانا كومانداسى 4 : 0 ۇپايمەن وڭباي جەڭىلگەن بولاتىن، سوندىقتان دا فۋتبول جانكۇيەرلەرى بۇل جولعى كەزدەسۋدىڭ ناتيجەسىن الدىن – الا «بولجاپ» قويعان. ءبىراق، جانكۇيەرلەردىڭ مەدەت بەرۋى ناتيجەسىن كورسەتتى مە، بولماسا ۇشاقپەن 6 ~ 7 ساعات ۇشىپ استاناعا جەتكەن ارىپتەستەردىڭ ارىپ – شارشاعانىنان با، جارىس بارىسى اتلەتيكو مادريد كومانداسىنىڭ جانكۇيەرلەرى ويلاعانداي بولماي شىقتى.

　　جارىس ناتيجەسى عانا ەمەس، جارىستىڭ ساندى مالىمەتتەرىنەن دە اتلەتيكو مادريدتىڭ الدىڭعى جارىستاي باسىم بولماعانىن كورۋگە بولادى. ەكى كوماندانىڭ دوپ مەڭگەرۋ مەن قاقپاعا سوققى باعىتتاۋ ساندى مالىمەتتەرىنەن ونشالىقتى زور پارىق بايقالمادى. كەرىسىنشە، جارىس بارىسىندا استانا كومانداسىنىڭ باسىم ءتۇسىپ، ارىپتەسىن ساستىرعان مەزەتتەرى دە كوپ بولدى. استانا كومانداسىنىڭ جانكۇيەرلەرى دە ءوز كوماندالارىنا مەدەت بەرىپ، ولار دوپ الىپ شابۋىلعا وتكەن سايىن بۇكىل الاڭ بولىپ قايراتتاندىرىپ وتىردى.

　　ەۆروپا چەمپيوندار ليگاسىنىڭ توپتىق كەزەڭىندە تۇركيانىڭ گالاتاساراي كومانداسى مەن يسپانيانىڭ اتلەتيكو مادريد كومانداسى سىندى جارىستا جان الىپ، جان بەرىپ وينايتىن قارىمدى كوماندالارمەن تەڭ ءتۇسىپ، 2 نومىرگە يە بولۋ استانا كومانداسى ءۇشىن، ءتىپتى، قازاقستان فۋتبولى ءۇشىن تاريحي كەزەڭدىك جەڭىس ەسەپتەلەدى. تەرريتورياسىنىڭ ءبىر بولەگى ەۆروپادا جاتاتىن قازاقستان وسىدان 13 جىل ىلگەرى فۋتبول سالاسىندا «ازيادان شەگىنىپ، ەۆروپاعا بەت بۇرعان» بولاتىن. بۇل شەشىم جونىندە سودان بەرى تالاس تۋىلىپ كەلە جاتسا دا، ەۆروپاداعى مىقتى كوماندالارمەن بەلدەسۋ ناتيجەسىندە قازاقستان فۋتبولى جىلدام ەسەيىپ كەلە جاتقانىن بايقاۋ قيىن ەمەس.

　　ايگىلى فۋتبول توراپتارى جاريالاعان ەڭ جاڭا ساندى مالىمەتتەرگە قاراعاندا، استانا كومانداسى گۋاڭجوۋ حىڭدا كومانداسىنان 126 ورىن تومەن، تىزىمدىكتە گۋاڭجوۋ حىڭدا كومانداسى استانا كومانداسىنان وق بويى وزىق تۇرعانىمەن، استانا كومانداسىنىڭ گالاتاساراي مەن اتلەتيكو مادريد سىندى كوماندالارمەن تەڭ تۇسكەنىنە قاراعاندا، بۇل تىزىمدىكتەگى قاتار فۋتبول كوماندالارىنىڭ شىنايى قۋاتىن كورسەتە المايتىن سياقتانادى.

　　الدا، استانا كومانداسى ءوز الاڭىندا پورتۋگاليانىڭ بەنفيكا كومانداسىمەن، ارىپتەس الاڭىندا تۇركيانىڭ گالاتاساراي كومانداسىمەن كەزەكتى جارىستارىن وتكىزەدى، ءوز الاڭىندا بەنفيكامەن وتكىزىلەتىن جارىستا استانانىڭ تەڭەسىپ قالۋ مۇمكىنشىلىگى بار دەسەك، گالاتاسارايدىڭ الاڭىندا بۇل مۇمكىندىكتىڭ جولى ءسال قيىنداۋ بولارى داۋسىز. ەگەر وسى جولعى توپتىق كەزەڭدە 3 نومىرمەن ساپارلارىن اياقتاتسا دا، استانانىڭ زور جەڭىسكە جەتكەنى ەسەپتەلەدى.

　　كەلۋ قاينارى: حالىق تورابى