اباي قۇنانباي ۇلىنىڭ دۇنيەگە كەلگەندىگىنىڭ 170 جىلدىق مەرەي تويى بەيجيڭدە وتكىزىلدى

2015.11.10 15:37  

　　حالىق تورابى، 10 - قاراشا، بەيجيڭ. (مانەپ ەربول ۇلى) ءبىر ۇلتتىڭ ۇلىلىعى سول ۇلتتىڭ تامىرىن تەرەڭگە تارتقان تاريحى مەن عاسىرلار بويى قايماعى بۇزىلماعان سالت – داستۇرىنەن باستاۋ الىپ جاتادى. ال وسىنداي ۇلىلىق بار جەردە عانا ۇلاعاتتى ۇرپاق وسەتىنى بەلگىلى. قازاقتىڭ ۇلتتىق قاسيەتى مەن ۇلىلىعىن بويىنا ءسىڭىرىپ، ءوز داۋىرىنەن اسا تۋعان، كۇللى قازاق دالاسى قاستەرلەگەن ۇلى تۇلعالارىمىز قانشاما، سولاردىڭ ءبىرى، كۇللى قازاق دالاسى عانا ەمەس، ادامزاتتىڭ ماقتانىشىنا اينالعان اباي قۇنانباي ۇلىنىڭ دۇنيەگە كەلگەندىگىنە بيىل 170 جىل بولدى.

　　ۇلتىمىزدىڭ رۋحاني كوسەمى، ويشىلى، اعارتۋشى، اقىن، فيلوسوف، كومپوزيتور اباي قۇنانباي ۇلىنىڭ دۇنيەگە كەلگەندىگىنىڭ 170 جىلدىعىن قۇتتىقتاۋ بايلانىسىمەن جۇڭگو قازاق ستۋدەنتتەر بىرلەستىگىنىڭ بەيجيڭدەگى بولىمشەسى 7 – قاراشا كۇنى بەيجيڭ ۇلتتار مۇراجايىندا كونسەرت كەشىن ۇيىمداستىردى.

　　كونسەرت بارىسىندا مەملەكەتتىك ساياسي كەڭەستىڭ مۇشەسى، جۇڭگو جازۋشىلار قوعامىنىڭ ورىنباسار مەڭگەرۋشىسى، ايگىلى جازۋشى اكپار ءماجيت ۇلى اباي شىعارمالارى جانە ونىڭ اۋدارىلۋى تۋرالى ماڭىزدى ءسوز سويلەدى. كەلەسى كۇن ءتارتىبى بويىنشا ورتالىق حالىق راديو ستانسياسنىڭ اعا ديكتورى اقىن بالاپان راباتوۆ، ەلءىشى – سىرتىنا تانىمالى جاس ءانشى اراي ايدارقان ۇلى قاتارلى ارنايى شاقىرىلعان قوناقتار ابايدىڭ اندەرىن اسقاقتاتا شىرقادى. ابايدىڭ ءار ءسوزىن جانىندا تۇمارداي ساقتاعان ستۋدەنتتەر قاۋىمى ابايدىڭ ولەڭدەرى مەن قارا سوزىندەرىن مانەرىنە كەلتىرە جاتقا وقىدى. كونسەرت ارالىعىندا جۇرگىزۋشىلەر كورەرمەن قاۋىمنان اباي تۋرالى سۇراقتار سۇراپ، تويدىڭ مازمۇنىن بايىتىپ، قىزىعىن اسىردى. ەكى ساعاتتىق كونسەرتتىڭ تاماشا مازمۇندارى كورەرمەندەردى ءبىر جەلپىنتىپ تاستادى. اسىرەسە، مىناۋ ريتىمى تەز تاس قالادا تىرلىك ءۇشىن تىربىنىپ جۇرگەن جاستارىمىز اباي قۇنانباي ۇلىنىڭ تاعىلىمدارى مەن ايشىقتى ولەڭدەرىن ونەرپازدار اۋزىنان ەستىپ ءبىر جەلپىنپ قالدى. كونسەرت سوڭىندا، جۇڭگو قازاق ستۋدەنتتەر بىرلەستىگىنىڭ نەگىزىن قالاۋشىلاردىڭ ءبىرى نۇرداۋلەت بوكەيقان ۇلى وسى جولعى قيمىلعا جاقىننان جاردەمشى بولعان ورىندارمەن السىتان ات تەرلەتىپ كەلگەن قوناقتارعا ۇلكەن العىس ءبىلدىردى.

　　وسى جولعى قيمىلدىڭ نەگىزى ۇيىمداستىرۋشىسى ــ جۇڭگو قازاق ستۋدەنتتەر بىرلەستىگىن تانىستىرا كەتپەكشىمىز: جۇڭگو قازاق ستۋدەنتتەر بىرلەستىگى 2011 – جىلى 1 – قازان كۇنى مەملەكەت مەرەكەسى قارساڭىندا «كاسىپتەنۋ جانە جاڭالىق جاراتۋدى» نەگىزگى ماقسات ەتە وتىرىپ، استانامىز بەيجيڭدە قۇرىلعان. قازىر بىرلەستىكتە 24 بولىمشە بار. ءار بولىمشە ءوزى تۇرعان وڭىردەگى قازاق جاستارىنىڭ كاسىپتەنۋ جانە جاڭالىق جاراتۋىنا عىلمي تۇرعىدان جول كورسەتىپ، ستۋدەنتتەر اراسىندا ءتۇرلى مازمۇنداعى قيمىلداردى ۇيىمداستىرىپ كەلەدى. اتالعان بىرلەستىكتىڭ قازىرگە دەيىن ۇيىمداستىرعان قيمىلدارى دا جەتەرلىك. قوعامداعى كوپتەگەن كاسىپورىندارمەن بىرلەسە وتىرىپ، جىلىنا ءبىر رەت وتكىزەتىن «كاسىپتەنۋ جانە جاڭالىق جاراتۋ» اتىنداعى تالقى جيىنى وقۋ ءبىتىرۋ الدىنداعى ستۋدەنتتەرگە كاسىپتەنۋ جاعىنان بولسىن، ءوز الدىنا جاڭالىق جاراتۋ جاعىنان بولسىن، ۇلكەن سەپتىگىن تيگىزىپ كەلەدى. ءتۇرلى فورماداعى مەيىر باعىشتاۋ قيمىلى جۇڭگو قازاق ستۋدەنتتەر بىرلەستىگىنىڭ قوعام ءۇشىن ىستەگەن يگى جۇمىستارىنىڭ ءبىرى ەسەپتەلەدى. بۇدان سىرت، جۇڭگو قازاق ستۋدەنتتەر بىرلەستىگى بيىل مامىر ايىندا نانجيڭ قالاسىندا ەلىمىزدىڭ جاپون باسقىنشىلارىنا قارسى سوعىس جەڭىسىنىڭ 70 جىلدىعىن قۇتتىقتاۋ بايلانىسىمەن تاريحتى ۇمتىپاۋدى باستى تاقىرىپ ەتە وتىرىپ، ءمانى مەن ماعىناسى دا وزگەشە قيمىل وتكىزدى. وسى جولعى اباي قۇنانباي ۇلىنىڭ دۇنيەگە كەلگەندىگنىڭ 170 جىلدىعىن قۇتتقتاۋ مەرەي تويى بولسا بىرلەستىك مۇشەلەرىنىڭ ۇزاق ۋاقىت دايىندالۋى مەن بەيجيڭ، تيانجين، شاڭحاي قاتارلى قالالاردا ءبىر ۋاقىتتا وتكىزىلدى.

　　ءسوز سوڭىندا، اسقاق ارماننىڭ جەتەگىندە، تۋعان جەردەن الىستاپ ءبىلىم قۋىپ جۇرگەن قازاقتىڭ قارا كوز قىزدارى مەن قارا دومالاق ۇلدارىنىڭ قايماعى بۇزىلماعان بەرەكەمىزدىڭ كۋاسىنداي «ءبىر جەڭنەن قول، ءبىر جاعادان باس» شىعارا وتىرىپ، ءوز مانىندە وتكىزگەن قيمىلىنا ەرەكشە ۇلكەن قۇرمەتىمىزدى بىلدىرەمىز. جۇڭگو قازاق ستۋدەنتتەر بىرلەستىگىنىڭ بۇدان كەيىنگى ساپارىنا ساتتىلىك تىلەيمىز.

　　كەلۋ قاينارى: حالىق تورابى