قۇلجاداعى ەركىن بوكس سايىسى اسا دابىرالى وتكىزىلدى

«جىن ۋ-حۇن» اتىنداعى ەركىن بوكس حالىقارالىق 8 – كەزەكتى جارىسى قۇلجا قالاسىندا وتكىزىلدى

2015.11.24 14:06   كەلۋ قاينارى : حالىق تورابى

　　جاڭىلقان قوجا قىزى حابارلايدى. قاراشانىڭ 21 - كۇنى تۇستەن كەيىن بەيجيڭ ۋاقىتى 8دە قۇلجا قالاسىنداعىلار بۇرىندارى تەك تەلەۆيزوردان عانا كورەتىن ەركىن بوكس شولپاندارىنىڭ «جىن ۋ -حۇن» اتىنداعى حالىقارالىق 8 – كەزەكتى ناق مايدان جارىسىن قۇلجا قالالىق حالىقارالىق دەنە تاربيە سارايىندا تاماشالادى.

　　بۇل جارىس جۇڭگو، رەسەي، قازاقستان، تايلاند، ا ق ش، ۋكراينا، برازايليا، شۆەتسيادان كەلگەن ەركىن بوكسشىلاردىڭ قيان – كەسكى جارىسى. كورەرمەندەر قۇلجا قالاسىنان عانا ەمەس، ىلە وبلىسىنا قاراستى ايماق، اۋدانداردان جانە شينجياڭنىڭ جەر – جەرىنەن كەلىپ، ناق مايداندا بوكسشىلارعا دەم بەرىپ، ءار جولعى جارىس بىتكەنشە، ورىندارىنان ءبىر تۇرىپ، ءبىر وتىرىپ، بوكسشىلاردىڭ اتىن اتاپ ايقايلاپ، دەمەپ وتىردى. ءتىپتى وزدەرىنە ۇستاز تۇتقان بوكس شولپاندارىنا بىرەر جۇدىرىق دارىپ كەتسە كوزدەرىنە جاس العاندارىن ناق مايداننان كوردىك. اسىرەسە، سپورتشىلاردىڭ اكە – شەشەسى، باۋىر - تۋىستارى ولاردىڭ جەڭىسىن ناق مايدان ساحناسىنا شىعىپ، قۇشاقتاپ، بەتىنەن ءسۇيىپ قۇتتىقتاعاندا كورەرمەندەر دە ورىندارىنان تۇرىپ قول سوقتى.

　　جارىس چيڭحاي جاساندى سەرىك تەلەۆيزياسىندا ۇستىنەن تاراتىلدى. بۇل كۇنگى 11 مايدان جارىستىڭ ءبىر مايدانى دايىندىق جارىس تا، قالعان ون مايدان جارىس ءار ەلدەن كەلگەن ەركىن بوكس شەبەرلەرىنىڭ جارىسى بولدى. ون مايدان جارىستىڭ قالعان تورتەۋى دۇنيە جۇزىلىك التىن بەلدىككە سايىس جاريالاۋ؛ ەڭ سوڭعى جارىس دۇنيە جۇزىندە اتى بار ەركىن بوكس شولپانى برازايليالىق سانتوس پەن ىلەنىڭ ءتول تۋماسى جۇمابەكتەي ۇعلاننىڭ جارىسى؛ حالىقارادا «ابجىلان» اتانعان، ءومىرىنىڭ كوپ ءبولىمىن ەركىن بوكس ساحناسىندا وتكىزگەن، تالاي – تالاي دۇنيە جۇزىندەگى مەن – مەن دەگەن شولپاندارمەن تىرەسىپ جۇرگەن سانتوس پەن «ءتاڭىرتاۋ قابىلانى» اتانىپ، ون جىلدان بەرى جۇڭگو جانە دۇنيە ساحناسىندا ءوزىنىڭ ەركىن بوكستەگى ەگەيلىگىن كورسەتكەن جۇمابەك سياقتى جويقىن كۇش يەلەرىنىڭ دوداسى؛ ءبىر – بىرىنىڭ لەزدىك ءساتىن ءداپ باسىپ قاربىپ قالۋعا بار كۇشىن سالعان ەركىن بوكىس شولپاندارى جۇمابەك پەن سانتوس 66 كيلو سالماقتاعىلار بويىنشا دودادا ءوز الىمدىلىقتارىن كورسەتتى. جۇمابەك سانتوستىڭ شويىنداي جۇدىرىعىن اسپاندا قالقىتتى جانە الىپ تا، شالىپ تا جىعاتىن ءداستۇرلى ۇلتتىق ءتاسىل بويىنشا قارسى جاقتىڭ جاۋىرىنىن جەرگە نەشە مارتە تيگىزدى، استىنا باسىپ جۇمارلادى. الايدا، جاۋىرىنى جەرگە تيسە جەڭىلىس تاباتىن قازاقى كۇرەس ەمەس قوي بۇل. سانتوس تا ءوزىنىڭ السىزدىگىن بىلدىرگىسى كەلمەي، الىپ كۇشتىڭ يەسى ەكەندىگىن كورسەتىپ، ۇزاق جىلدىق تاجىريبەسىنە نەگىزدەلىپ، ءار ءتۇرلى تاسىلدەردى قولدانىپ جۇمابەكپەن تىرەستى. ەڭ ۇلكەن حالىقارالىق قيان – كەسكى جارىستا ەكى ارىستىڭ ۇپايلارى تەك ءتۇستى. ەڭ سوڭعى التىن بەلدىك قازىرشە جۇمابەكتىڭ دە، سانتوستىڭ دا قانجىعاسىنا بايلانبادى. ءوزىنىڭ تۋىپ ءوسىپ، كىندىك قانى تامعان اتا مەكەنىندە حالىقارالىق جارىس وتكىزۋگە سەبەپ بولعان جۇمابەك كەيىنگى جەتكىنشەكتەرگە ۇلگى بولدى. جارىس ءبىتىپ جۇرتشىلىق شولپاندارمەن سۋرەتكە تۇسۋگە ۇمتىلىپ جاتقاندا ون جاستار شاماسىنداعى ەكى بالانىڭ «مەن جۇمابەكپىن»، «سەن سانتوسسىڭ» دەپ كۇرەسىپ جاتقانى جۇرتشىلىقتى اسەرلەندىردى.

　　«جاقسىدان شاراپات» دەگەندەي وزىنەن كەيىنگى جەتكىنشەكتەردى تاربيەلەۋ ماقساتىندا، قۇلجا قالاسىنان جۇمابەك اتىنداعى ەركىن بوكس كلۋبىنىڭ ىرگە تاسىن قالاپ، وندا ۇرپاقتاردى تاربيەلەيمىن دەپ وتىرعان جۇمابەكتىڭ بولاشاق شاكىرتتەرى ناق مايداننىڭ وزىندە - اق تابىلا باستادى؛ جۇمابەكپەن بولعان العاشقى سۇحپاتىمىزدا ايتقان جۇمابەكتىڭ: «شاكىرت تاربيەلەيمىن، مەنەن كەيىنگى ەركىن بوكسشىلارعا جىگەر بەرەمىن» دەگەنىندەي جۇمابەكتىڭ ناق مايدان جارىسىن جاقىننان كورگەن «كەلەشەك جۇمابەكتەردىڭ» وزدىگىنەن تاربيەلەنۋىنە جاندى مەكتەپ بولعانى بىردەن اڭعارىلدى.

　　جۇمابەك تۇرسىن ۇلى بىلاي دەدى:

　　ــ قارسىلاسىم الەم چەمپيونى، وسىدان بۇرىن امەريكالىق چەمپيوندى جەڭگەن، مەن بۇگىن تەڭ ءتۇستىم، بۇل رەتكى سايىسقا رازىمىن، بۇگىنگى كوڭىل كۇيىم جاقسى، دايىندىعىم قىسقالاۋ بولىپ قالدى. ءار رەتكى مايداندا ۇپايدان جەڭىپ وتىردىم. مۇنى ناق مايداننان حالقىم دا كوردى. مەنى وسىنشا قولداعان تۋعان جەرىمدەگى حالقىما راحىمەت! بۇگىن ارتىمنان ەرگەن شاكىرتتەرىمنىڭ ءبارى دە جاقسى ناتيجەگە جەتتى. بۇل جولى سانتوسپەن تەڭ ءتۇستىم. تاعى دا سانتوسپەن كەزدەسەمىن، كەلەسى جولى كەزدەسسەم بۇل بەلدىكتى نە ءۇشىن مەن تاقپاسقا!

　　قازاقستاندىق چەمپيون، وسى جولعى التىن بەلدىكتىڭ يەگەرى، امەريكالىق اليدۇنمەن دوداعا تۇسكەن قۋات حاميتوۆ بىلاي دەدى:

　　ــ وسى جولعى حالىقارالىق جارىس وتە جوعارى دەڭگەيدە ءوتتى. حالىقارالىق جارىستى وتكىزىپ وتىرعان جۇڭگوعا راحىمەتىمدى ايتامىن، كەلەشەكتە جۇمابەك ەكەۋىمىز الەمدى مويىنداتامىز دەگەن ويدامىز، سونداي – اق، جىن – ۋ- حۇننىڭ WBK باس ديرەكتورى ليۋ شۋەۋىنگە دە راقىمەت ايتامىن.

　　جۇمابەكتىڭ جۇبايى جاڭ جىنليڭ بىلاي دەدى:

　　ــ جۇمابەك سياقتى حالىقارالىق دەڭگەيدەگى ەركىن بوكس شەبەرى بولۋ راسىندا وڭاي ەمەس، ونىڭ كۇندەلىكتى ۋاقىتى وتە تىعىز، ءار كۇنىنىڭ كوپ ءبولىمى شىنىعۋمەن وتەدى. شىنىعۋى ادەتتەگى شىنىعۋعا ۇقسامايدى. ادەتتەگى ادامدار ونىڭ ءبىر كۇنىنە دە توزبەيدى دەسەم اسىرا ايتقاندىق بولماس، جۇمابەك ەركىن بوكس شەبەرى اتانىپ جۇرگەنىمەن تۇرمىستا قاراپايىم، اتا – اناسىنا قايىرىمدى بالا، وتباسىمىزدا مەيىرىمدى اكە، قازىر ءبىر جاسقا كەلەيىن دەپ قالعان بەگزات دەگەن ۇلىمىز بار. ەكەۋىمىز سپورت سالاسىندا سەگىز جىل بىرگە بولدىق، ونان سوڭ تاعدىر قوسىپ باس قۇرادىق. جۇمابەك قۇلجا قالاسىنان ەركىن بوكس كلۋبىن اشتى. كوپتەگەن ەركىن بوكسقا جاتتىقتىراتىن كلۋبتار بولعانىمەن ولاردىڭ ەركىن بوكىس جارىستارىنا ادامدارىن جىبەرۋگە مۇمكىندىگى بولا بەرمەيدى، شاكىرتتەر شىنىققانىمەن، بىرەر جارىسقا تۇسە الماسا، ول ادامدى قاجىتادى دا كەيىن قويىپ كەتەدى، بۇل ەڭبەك جاعىنان دا، ۋاقىت جاعىنان دا، ەكونوميكا جاعىنان دا ءبىرشاما ءتيىمسىز بولادى. ال، جۇمابەك ءاردايىم ءوزى كەلىپ، جارىستار ۇيىمداستىرىپ، تاڭداۋلى، ءۇمىتتى بولعان شاكىرتتەرىن ءار ءتۇرلى جارىستارعا قاتىناستىرسام دەگەن ويى بار، بۇعان مۇمكىندىك تە بار.

　　تارباعاتاي ايماعىنىڭ ءدوربىلجىن اۋدانىنان كەلگەن سپورت جانكۇيەرى قۇرمانبەك كاكەن ۇلى بىلاي دەدى: «وسى رەت قۇلجا قالاسىندا وتكىزىلگەن حالىقارالىق جارىستى ناق مايداننان تاماشالاۋ ءۇشىن ءدوربىلجىن مەن تولىدان ءتورت كىسى كەلدىك، جارىس ءبىز ويلاعاننان دا دابىرالى، جوعارى دەڭگەيدە ءوتتى. ايرىقشا تەبىرەندىك، جۇمابەك تۇرسىن ۇلى قاتارلى سپورتشىلارىمىزدىڭ بۇدان دا بيىك بەلەستەردەن كورىنۋىنە تىلەكتەسپىز. (سۋرەتتەردىڭ ءبىر ءبولىمى ىلە اقپارات تورابىنان الىندى)

　　كەلۋ قاينارى: حالىق تورابى