حالىق ونەرپازى، حاتكەر تۇرسىنبەك قياش ۇلىنىڭ حاتكەرلىك كورگىزبەسى نىلقى اۋدانىندا اشىلدى

گۇليا ورالبەك قىزى

2015.12.04 15:39   كەلۋ قاينارى : حالىق تورابى

　　اسەمپاز بولما ءار نەگە،

　　ونەرپاز بولساڭ ارقالان.

　　سەندە ءبىر كەرپىش دۇنيەگە،

　　كەتىگىن تاپ تا بارقالان، - دەپ اباي اتامىز ايتقانداي، جەتپىس جاسقا كەلسە دە، ونەر بىلىم جولىندا ءالى جالىقپاي ەڭبەكتەنىپ، كەۋدەسىندە شەجىرەلى جىر جاتتاپ، حاتكەرلىك ونەر جولىندا ىزدەنىس جاساپ كەلگەن، نىلقى اۋدانى ورمان مەكەمەسىنەن پەنسياعا شىققان تۇرسىنبەك قياش ۇلى كەزىندە ۇكىمەت قىزمەتىن ادالدىقپەن اتقارۋمەن بىرگە، قولىنان قالامىن تاستاماي شەجىرە جازىپ، حالىق مۇرالارىن جيناپ، قازاق حاتكەرلىك مادەنيەتىنىڭ بەينەلى جازۋ ونەرىمەن ەڭبەكتەندى، حالقىن سۇبەلى كوركەم جازۋلارىمەن سۋسىنداتىپ، قازاق حاتكەرلىگىنىڭ كوركەمدىگىن وزگەشە بىر قىرىنان بەينەلەپ، ەل باسشىلارىنىڭ دانا سوزدەرىن ايشىقتاپ كوركەمدەپ جازۋمەن بىرگە، بەينەلى باس سۋرەتىن اينىتپاي سىزىپ، كوركەم جازۋ مەن بەينەلى وبىرازدى سايكەستىرە وزگەشە كوركەمدىك قالىپتاستىرا ءبىلدى.

　　تۇرسىنبەك اقساقالدىڭ مازمۇنى جۇرت جۇرەگىندە قالارلىقتاي اقىليا سوزدەردى، پارتيانىڭ ۇگىت - تاربيە ۇراندارىن، زاڭ - جارلىقتاردى، ەل باسشىلارىنىڭ داۋىرلىك سيپات العان ماڭىزدى سوزدەرىن نەگىز ەتكەن 3000 دانا اينالاسىنداعى حۇسنيحات تۋىندىلارىندا، ءوزىنىڭ پارتيا مەن ۇكىمەتكە دەگەن ىستىق ماحاباتى، حالقىنا دەگەن قۇرمەتى كوركەم قالامىمەن ايشىقتالدى، 3 - جەلتوقسان كۇنى نىلقى اۋداندىق ۇكىمەت، پارتكوم ۇگىت ءبولىمنىڭ باس بولۋىمەن، نىلقى اۋداندىق مادەنيەت، راديو - تەلەۆيزيا، دەنە تاربيە مەكەمەسىنىڭ ۇستىنە الۋىمەن، نىلقى اۋدانىنىڭ مادەنيەت ورتالىعىندا تۇرسىنبەك اقساقالدىڭ جەكە حاتكەرلىك كورگىزبەسى دابىرالى وتكىزىلدى.

　　كورگىزبەنى مەكتەپتەگى وقۋشى - وقىتۋشىلار، ءار سالا، ءار كاسىپتەگى قىزمەتكەرلەر مەن بۇقارا كەلىپ تاماشالادى، كورگىزبەنىڭ اشىلۋ سالتىندا اۋداندىق مادەنيەت مەكەمەسىنىڭ ورىنباسار باستىعى جاميلا تاماشالاۋشىلارعا حاتكەر قارتىمىزدىڭ ەڭبەكتەرىن تانىستىردى. ەلەش مۇراتبەك ۇلى، شاتىرباي يزاتبەك ۇلى ءسوز سويلەپ، ولەڭ جىردان شاشۋ شاشتى.

　　تۇرسىنبەك اقساقال وبلىس دارەجەلى قازاقى حاتكەرلىك ونەرىنىڭ مۇراگەرى ءارى وبلستىق حاتكەرلىك قوعامىنىڭ مۇشەسى. حۇسنيحات تۋىندىلارى «ىلە گازەتى»، «ىلە كەشى»، «ىلە جاستارى جۋرنالى» سياقتى باسىلىمداردا ارت - ارتىنان جاريالانىپ، جۇرتشىلىقتىڭ جاقسى باعاسىن العان، اۋدان وبلىس كولەمىىندەگى جارىستارعا قاتىناسىپ، جۇلدەگە سان مارتە يە بولعان، 2013 - جىلى بەيجىڭ قالاسىندا وتكىزىلگەن ءار ۇلت حالقىنىڭ قولونەر تۋىندىلارى كورگىزبەسىنە قاتىناسىپ، ۇزدىك تۋىندى سيلىعىن ەنشىلگەن، قازىرگە دەيىن ءتورت كىتاپ جازعان. سول كىتاپتاردىڭ ىشىندە «اق قاينار قازاق حاتكەرلىگى» اتتى كىتابى 2015 - جىلى باسپادان جارىق كورگەن، بۇل كىتاپ تۇرسىنبەك قارتتىڭ شينجياڭ ۇيعۇر اۆتونوميالى رايون قۇرىلعاندىعىنىڭ 60 جىلدىعىن قۇتتىقتاۋ بايلانىسىمەن ءوز سەمياسىندا وتكىزگەن كورگىزبەدە تاماشالاۋشىلارعا تاراتىلىپ، ولاردىڭ جوعارى باعاسىنا يە بولعان.

　　جاس كەزىندە جاپالى ەڭبەكتەنە ءجۇرىپ، وتباسىندا بالالارىن جاقسى تاربيەلەپ، وقىتىپ، قاتارعا قوستى، قوعامداعى قىزمەتىن اقساتپاي، وعان قوسا حاتكەرلىك ونەرىن دامىتتى.

　　مىنە جاپالى ەڭبەكتەرىنىڭ جەمىسىن كورگەن قارت بۇل كۇندەرى وزىنىڭ جايدارلى دا جاعىمدى، كوپشىل مىنەزىمەن حالقىنىڭ ىزەت - قۇرمەتىنە بولەندى، اۋىلداستارى ول كىسىنىڭ پارتياعا ادال، ۇلتتار ىنتىماعىن ايالايتىن وسىنداي تاماشا رۋحىن وزدەرىنە ۇلگى ەتەتىندەرىن ايتىستى ءارى الدا اۋدان كولەمىندە قازاق حاتكەرلىگىنە قىزىعاتىن وقۋشىلاردى تاربيەلەيتىن ارناۋلى كلاس اشىپ، ۇرپاقتار كوكەيىنە

　　حاتكەرلىك ونەرىن ۇيالاتاتىن ۇستازدىق ەڭبەگىنە زور قولداۋشىلىق كورسەتەتىندىكتەرىن ايتىسىپ، ەڭبەگىن باعالاپ، اۋىلداستارى ات مىنگىزىپ، شاپان جاپتى.

　　تۇرسىنبەك قارتىمىزدىڭ الداعى ىسىنە ءسات تىلەپ، يلايىم، جانىنا دەرت بەرمەسىن دەمەكشىمىز.

　　كەلۋ قاينارى: حالىق تورابى