«شينجياڭ مۇسىلماندارى» جۋرنالىن تاراتۋ سالتى وتكىزىلدى

شينجياڭ مۇسىلماندارى تورابى رەسمي ىسكە قوسىلدى

2015.12.23 13:33   كەلۋ قاينارى : حالىق تورابى

　　حالىق تورابى، 23 – جەلتوقسان، بەيجيڭ. ءتاڭىرتاۋ تورابىنىڭ حابارلاۋىنشا، «شينجياڭ مۇسىلماندارى» قوس ايلىق جۋرنالىن تۇڭعىش رەت تاراتۋ سالتى مەن شينجياڭ مۇسىلماندارى تورابىن رەسمي ىسكە قوسۋ سالتى 22 – جەلتوقسان تۇستەن بۇرىن وتكىزىلدى.

　　اۆتونوميالى رايوندىق پارتكومنىڭ تۇراقتى مۇشەسى شاۋكەت يمين، اۆتونوميالى رايون ءتوراعاسىنىڭ ورىنباسارى جاروللا يسامدىن، اۆتونوميالى رايوندىق ساياسي كەڭەس ءتوراعاسىنىڭ ورىنباسارى، اۆتونوميالى رايوندىق پارتكوم بىرلىكساپ ءبولىمىنىڭ باستىعى چىڭ چىنشان قاتارلىلار سالتقا قاتىناستى.

　　ۇعىسۋعا قاراعاندا، بيىل ءساۋىر ايىنان بەرى اۆتونوميالى رايوندىق پارتكوم مەن حالىق ۇكىمەتىنىڭ ءمان بەرۋى مەن قامقورلىعىندا اۆتونوميالى رايوندىق ۇلتتىق ىستەر كوميتەتى (ءدىن ىستەرى مەكەمەسى) جەتەكشىلىك ەتىپ، اۆتونوميالى رايوندىق ءىسلام ءدىنى قوعامى مەن شينجياڭ ءىسلام ينيستيتۋتىن ۇيىمداستىرۋ ارقىلى، «شينجياڭ مۇسىلماندارى» جۋرنالىن شىعارۋ مەن شينجياڭ مۇسىلماندارى تورابىن اشۋ قىزمەتىن كۇنتارتىبىنە ەنگىزگەن بولاتىن. جۋىردا «شينجياڭ مۇسىلماندارى» جۋرنال رەداكسياسى مەن شينجياڭ مۇسىلماندارى تورابىن باسقارۋ ورتالىعىنا اۆتونوميالى رايوندىق ۇلتتىق ىستەر كوميتەتى (ءدىن ىستەرى مەكەمەسى) رەسمي ۋيۆەسكا ءىلدى.

　　ۇعىسۋعا قاراعاندا، «شينجياڭ مۇسىلماندارى» جۋرنالى تەگىن، ىشكى جاقتا تاراتىلاتىن جۋرنال (قوس ايلىق) بولىپ، ۇيعۇرشا، حانزۋشا، قازاقشا ءۇش ءتىل – جازۋدا شىعارىلادى. شينجياڭداعى ءىسلام ءدىنى سالاسىنداعى قايراتكەرلەرگە، مەشىتتەرگە، مۇسىلمان بۇقاراسىنا جانە ءار دارەجەلى بىرلىكساپ، ۇلت – ءدىن ىستەرىن باسقاراتىن ورىندارعا، ءىسلام قوعامى، ءدىن وقۋى كلاستارىنا (تۇيىندەرىنە)، سونداي – اق، ۇلت – ءدىن ىستەرىنە قاتىستى تاراۋلارعا تاراتىلادى. قازىرشە ءار سانىنان ۇيعۇرشا 60 مىڭ دانا، حانزۋشا 10 مىڭ دانا، قازاقشا 10 مىڭ دانا تاراتىلادى. اتالعان جۋرنالدا 10 ايدارشا بولىپ، مۇنىڭ جەتەۋى تۇراقتى ايدارشا، ۇشەۋى وزگەرمەلى ايدارشا.

　　شينجياڭ مۇسىلماندارى تورابىنىڭ ۇيعۇرشا، حانزۋشا بەتتەرى اشىلادى، توراپ ءادىرىسى «www.xjmuslim.com). توراپتا 10 ايداراشا اشىلادى، ايدارشالاردىڭ مازمۇنى: «اقپارات ورتالىعى»، «ساياسات جانە زاڭ – ءتۇزىم»، «مۇسىلماندار تۇرمىسى»، «مادەنيەت – كوركەمونەر»، «ءىسلام ءدىنى بىلىمدەرى»، «شاريعات»، «قيراعات» «قاجىلىق ىستەرى» «ارناۋلى حابارلار»، «شينجياڭ مۇسىلماندارى» جۋرنالىنىڭ ەلەكتروندىق نۇسقاسى قاتارلىلار.

　　كەلۋ قاينارى: حالىق تورابى