حاتكەرلەردىڭ تالقى قيمىلى وتكىزىلدى

2016.02.04 09:12   كەلۋ قاينارى : حالىق تورابى

　　ءتىلشىمىز سەنبەك اۋەسقان ۇلى حابارلايدى. حاتكەرلىك ونەرىنىڭ دامۋىنا دەم بەرۋ، اعا بۋىن حاتكەرلەر مەن جاس بۋىن حاتكەرلەر اراسىندا تاجىريبە الماستىرۋ ماقساتىنداعى وبلىسقا توتە قاراستى اۋدان، قالالارداعى حاتكەرلەردىڭ تالقى قيمىلى قاڭتاردىڭ 30 - كۇنى قۇلجا قالاسىندا وتكىزىلدى.

　　قيمىلدى ىلە وبلىستىق بۇقارالىق كوركەمونەر سارايىنىڭ بۇرىنعى ورىنباسار باستىعى، ايگىلى حاتكەر، سۋرەتشى ءابدىماجيت ەرتۋعان ۇلى، ىلە جاستار - ورەندەر گازەت - جۋرنال مەكەمەسىنىڭ رەداكتورى، تانىمال حاتكەر قاناعات ەستەمەس ۇلى، ىلە پەداگوگيكا ينستيتۋتىنىڭ كىتاپحانا قىزمەتكەرى، تانىمال حاتكەر ءابىش بايعازى ۇلى ۇيىمداستىردى. وبلىسقا توتە قاراستى اۋدان، قالالاردان جيىرماعا جۋىق حاتكەر باس قوسىپ، ەڭ اۋەلى ءبىر ساعات مولشەرىندە ناق مايداندا حۇسنيحات جازىپ ونەر كورسەتىپ، ودان سوڭ شاعىن تالقى جيىنى اشىلدى. تالقى جيىنىندا ءابدىماجيت ەرتۋعان ۇلى وسى رەتكى قيمىلدىڭ ماقساتى، ءمان - ماڭىزى جونىندە توقتالىپ، ىلەدەگى حاتكەرلىك ونەرىنىڭ دامۋ تاريحىنان قىسقاشا سىر شەرتىپ، جۇڭگو قازاق حاتكەرلىگىنىڭ عىلمي جۇيەگە تۇسۋىندە ەرەن ەڭبەك كورسەتكەن مىركامال جالەلقان ۇلى، ءجۇنىسقان باقاي قاتارلى اعا بۋىنداردىڭ ەڭبەگىنە ماداق جاۋدىرىپ، قازىرگى كەزدە حاتكەرلىك ونەرىندە ورىن تەۋىپ وتىرعان باستى ماسەلەلەردى اتاپ ءوتىپ، حۇسنيحات نۇسقالارى، ءارىپ ەلەمەنتتەرى، ەملە ماسەلەلەرى جاعىندا بىرلىككە كەلۋ ماسەلەسىن دارىپتەدى. حاتكەر قاناعات ەستەمەس ۇلى ناق مايداندا جازىلعان جازۋلاردى سارالاپ، ونداعى ماسەلەلەردى اتاپ كورسەتتى، حاتكەرلەردىڭ كوبىنىڭ وقىتۋشى ەكەنىنە قاراتا وسى جولداستاردىڭ حاتكەرلىك ونەرىنىڭ مەكتەپتەردە جالپىلاسۋىنا، شاكىرت تاربيەلەۋگە دەن قويىپ، ەلەۋسىز قالىپ بارا جاتقان وسى ونەردىڭ نەگىزىنىڭ بەكەمدەلە تۇسۋىنە تىلەك ءبىلدىردى.

　　تالقى بارىسىندا كوپشىلىك ساقا حاتكەر تۇرسىنبەك قياش ۇلىنىڭ ءوزى تۇراتىن نىلقى اۋدانىندا قاتىستى باسشىلاردىڭ قولداپ، مادەنيەت سارايىنان ساباقحانا ازىرلەپ بەرۋىمەن ارناۋلى تاربيەلەۋ كۋرسىن اشىپ، باستاۋىش مەكتەپتىڭ 60 تان استام وقۋشىسىنا قازاق الىپپەسى، حاتكەرلىك نەگىزى ساباعىن ءوتىپ كەلە جاتقانىنان حاباردار بولىپ، ول كىسىنىڭ قاجىرلى ەڭبەگىنە العىس ايتىپ، ءسۇيىنىش ءبىلدىردى.

　　حاتكەرلەر حاتكەرلىكتە پايدالانىلاتىن قاعاز، سيا، حاتكەرلىك ءۇنحات تەكشەسى سياقتى تۇيىندەرگە دەيىن نازار اۋدارىپ، پىكىر الماستىرىپ، بۇدان كەيىن اراب حاتكەرلىگىنىڭ ۇلگىسى نەگىزىندە قازاق حاتكەرلىگىن جاڭا بەلەسكە كوتەرۋگە قۇلشىنۋ كەرەكتىگىن دارىپتەدى. سونداي - اق مۇمكىندىك جار بەرگەن جاعدايدا اۋدان، وبلىس كولەمىندە حاتكەرلىك كورمەلەرىن ۇيىمداستىرىپ، حاتكەرلىك ونەرىنىڭ ىقپالىن كەڭەيتىپ، ءىزباسالاردى مولىنان باۋلۋ قاجەت ەكەنىن بۇكپەسىز ورتاعا سالدى. قيمىل سوڭىندا كەلەسى جولعى تالقى قيمىلى نىلقى اۋدانىندا وتكىزىلەتىن بولىپ تۇراقتاندىرىلدى.

　　كەلۋ قاينارى: حالىق تورابى