مەيىربان انالار مەرەكەلىك كونسەرت وتكىزدى

سۋرەتتەردى تۇسىرگەن باقىتبەك ءجۇمادىل ۇلى

2016.03.08 16:12   كەلۋ قاينارى : حالىق تورابى

　　قۇلجا قالاسىندا 2012 - جىلى ناۋرىز ايىنان باستاپ ۇيىمداسىپ، قوعامعا يگىلىكتى ءىس ىستەپ، جارلى - جاقپايلاردىڭ سۇيەۋشىسى، بەرەكەلى وتباسىن قۇرىپ، جەتەلى ۇرپاق تاربيەلەۋ جانە جەلەكتىلەردىڭ دەنساۋلىعىن قورعاۋ سياقتى جاقتاردان ەرىكتى ۇگىت ورىستەتىپ، كوپتىڭ العىسىن الىپ، ۇكىمەت ورىندارىنىڭ ماداقتاۋىنا يە بولىپ كەلە جاتقان «ىلە قازاق اۆتونوميالى وبلىستىق مەيىربان انالار، ەرىكتىلەر قوعامى» 6 - ناۋرىز كۇنى، ىلە تەلەۆيزياسىنىڭ كانسەرت زالىندا حالقارالىق «8 - ناۋرىز ايەلدەر مەرەكەسىن» قارسى الۋ ءۇشىن «اسىل قاسيەتتەردى ۇلاعاتتاپ، جاراسىمدىلىققا جارشى بولايىق» دەگەن اتپەن ارناۋلى كونسەرت كەشىن وتكىزدى.

　　كونسەرت كەشىندە، وسى مەيىربان انا ەرىكتىلەر توبىنا قاتىناسقان اق سامايلى اجەلەر مەن جاس انالار توپتىق جانە جەكەلەي ءان - ءبي نومىرلەرىن ورىندادى. ونىڭ سىرتىندا وسى توپتاعىلاردىڭ مەيىر شاپاعاتىنا بولەنىپ، وقۋىن جالعاسترىپ جاتقان مۇگەدەك ورەندەر دە ونەر كورسەتتى. كونسەرت كەشىنىڭ باستى تاقىرىبىن توڭىرەكتەپ، كاسىپتىك ورەدە جوبالانعان مەيىرىمدىلىكتى، ۇلى ىنتىماقتى، اسىل ءداستۇردى ارقاۋ ەتكەن ءان، ءبي نومىرلەرى كورەرمەندەردىڭ قىزۋ قارسى الۋىنا يە بولدى. كونسەرت كەشىندە مەيىربان انالار سۇيەمەلدەپ كەلە جاتقان قيىنشىلىعى بار وتباسىلارىنداعى قازاق، ۇيعۇر وقۋشىلاردان 5 بالاعا 10 مىڭ يۋان سۇيەمەل قاراجاتى بەرىلدى.

　　كەلۋ قاينارى: حالىق تورابى