بەيجيڭدە ۇلىستىڭ ۇلى كۇنىنە ارنالعان ساۋىق كەش وتكىزىلدى

2016.03.22 10:18   كەلۋ قاينارى : حالىق تورابى

　　حالىق تورابى، 22 – ناۋرىز، بەيجيڭ. ۇلىستىڭ ۇلى كۇنى ــ ناۋرىز مەرەكەسىنە ارنالعان 2016 - جىلعى «بەيجيڭدە ناۋرىز» ساۋىق كەشى 21 – ناۋرىز كۇنى جۇڭگو وسىزامان ادەبيەت سارايىندا وتكىزىلدى.

　　مەرەكەلىك ساۋىق كەش باستالار الدىندا مەملەكەتتىك ساياسي كەڭەس مۇشەسى، ايگىلى جازۋشى اكبار ءماجيت ۇلى، تارباعاتاي ايماقتىق ساياسي كەڭەس ءتوراعاسىنىڭ ورىنباسارى كارىم دۇيسەنباي ۇلى سوزگە شىعىپ، ناۋرىز مەرەكەسىنە ارناپ قۇتتىقتاۋ ءسوزىن سويلەدى.

　　تارباعاتاي ايماعىنداعى قاتىستى ورىنداردىڭ قولداۋىمەن بۇل جولعى ساۋىق كەشكە الىستان ات ارىتىپ ارنايى كەلگەن تارباعاتاي ايماقتىق ويىن – ساۋىق ۇيىرمەسىنىڭ ونەرپازدارى تالعامدى دا تارتىمدى ويىن نومەرلەرىن كورسەتىپ، اسقاق ءان، كۇمبىرلى كۇي، كۇلكى سيلار كومەديامەن ساۋىق كەشتىڭ سالتاناتىن اسىرسا، ىلە وبلىسىنا توتە قاراستى ورىندار، بۇراتالا وبلىسى قاتارلى جەرلەردەن كەلىپ، بەيجيڭدە ءبىلىم اسىرىپ جۇرگەن ونەرپازدار مەرەكەلىك كەشتىڭ مەرەيىن ونان ارى اسىردى، ورتالىق ۇلتتار ۋنيۆەرسيتەتى مۋزيكا كاسىبىنىڭ وقۋشىلارى ءوز ونەرلەرىن ەل ورتاسىنا سالىپ، حالىقتىڭ القاۋىنا بولەندى.

　　ءاز ناۋرىز ــ جىل باسى، حالقىمىزدىڭ ناۋرىز مەرەكەسىنە بولعان تۇسىنىگى مەن ونى تويلاۋ جولدارى دا وزگە ەلدەن بولەكشە. تاريح قاتپارىنان تەرەڭ تامىر تارتقان اتا – بابا ءداستۇرى ۇمىتىلماي، ناۋرىز مەرەكەسىندە جەر – جەردە كونسەرت قويۋدان سىرت، كونەلەر جول سالىپ كەتكەن باسقا دا ماعىنالى تويلاۋ تاسىلدەرىن قايتا جاڭعىرتىپ، ۇلىس تويىنىڭ مازمۇنىن ونان ارى بايىتا تۇسسەك نۇر ۇستىنە نۇر بولار ەدى.

　　قادىرلى الەۋمەت، ۇلىس وڭ بولسىن، اق مول بولسىن! تابالدىرىق اتتاعان جاڭا جىل جاقسىلىعى مەن شاتتىعىن سيلاپ، ەل امان، جۇرت تىنىش بولسىن!

　　كەلۋ قاينارى: حالىق تورابى