ورتالىق ۇلتتار ۋنيۆەرسيتەتىندە ءاز ناۋرىز تويلاندى

2016.03.22 14:23   كەلۋ قاينارى : حالىق تورابى

　　اياۋلى حالقىمىزدىڭ: «ۇلىس وڭ بولسىن، اق مول بولسىن، قايدا بارساڭ جول بولسىن، ۇلىس باقتى بولسىن، ءتورت تۇلىك اقتى بولسىن، ۇلىس بەرەكەلى بولسىن، پالە - قالا جەرگە ەنسىن!» - دەپ تىلەك تىلەپ، جاڭا كوتەرىلگەن كۇنگە ءتاۋ ەتىپ قارسى الاتىن، ەسكى كيىمدەردىڭ تۇيمەلەرىن ءۇزىپ شومعا قاداپ، جارىلعان، كەتىلگەن ىدىس - اياقتاردى سىندىرىپ. سودان ارى قاراي ءبىر جەرگە جيىلىسىپ، بۇلاق كوزدەرىن اشىپ، تال ەگىپ، 3 تە 9 كۇنگە جالعاستىراتىن، باردام اۋىلدار مال سويىپ، كادىمگىدەي توي جاساپ، ارى قاراي بالۋان، كوكپار، ات بايگەسى، تەڭگە ءىلۋ سياقتى ۇلتتىق ويىندارعا ۇلاسىپ، ءۇي باس سايىن «كوپ كوجە» ىستەپ، توپتاسىپ ناۋرىزشىلاي ءجۇرىپ، «ۇلىس مۇراتتى بولسىن، كوكتەم شۋاقتى بولسىن، وزەن سۋاتتى بولسىن، ءورىس قۇراقتى بولسىن، القاپ مالعا، ەل ءىشى بەرەكەگە تولسىن!» دەپ باتا بەرىسىپ، كەشتەردە ءبىر جەرگە جينالىپ، «ناۋرىز جىرى»، «ناۋرىز تىلەك»، «ناۋرىز جۇمباق»،« ناۋرىز باتا» ايتىلىپ، سوڭى ءان - كۇيگە ۇلاستىرا وتىرىپ قارسى الاتىن قاسيەتتى ءاز ناۋرىز مەرەكەسى تامىرى نەشە مىڭ جىلعا جالعاسقان ۇلى مەرەكە ەدى. وسى ۇلى مەرەكەنى تۋعان جەردەن نەشە مىڭ شاقىرىم الىس جۇرسە دە، اتا سالتىن جوعالتپاي، ۇلىقتاپ ۇستاعان ورتالىق ۇلتتار ۋنيۆەرسيتەتى قازاق ءتىل – ادەبيەت، فيلولوگيا فاكۋلتەتىنىڭ ۇلاندارى 2016 - جىلى 18 - ناۋرىز كۇنى كەشتە اتالعان ۋنيۆەرسيتەتتىڭ ستۋدەنتتەر قيمىل ورتالىعىندا ناۋرىزدى قارسى الۋ ماقساتىندا اسەم ءان مەن ءتاتتى كۇي، مىڭ بۇرالعان بيلەرمەن دۋمانداتا كونسەرت وتكىزىپ قارسى الدى. كونسەرتكە ورتالىق ۇلتتار ۋنيۆەرسيتەتى قازاق ءتىل – ادەبيەت، فيلولوگيا فاكۋلتەتىنىڭ ستۋدەنىتتەرىنەن باسقا، مۋزىكا ينيستيتۋتىنىڭ، ءبي ينيستيتۋتىنىڭ، دايىندىق ينيستۋتىنىڭ ستۋدەنتتەرى جانە وزگە مەكتەپتەگى ستۋدەنتتەرى مەن استانادا قىزمەت ىستەپ جاتقان قىزمەتكەرلەر دە قاتىناستى.

　　كونسەرت اتالعان ۋنيۆەرسيتەتتىڭ ءبي ينيستيتۋتىنىڭ ارۋلارى ورىنداعان مىڭ بۇرالعان بيمەن باستالدى، قازاق بالاسى وتكىزگەن دۋمان شاشۋسىز بولا ما، قازاق ءتىل – ادەبيەت فيلولوگيا فاكۋلتەتىنىڭ قادىرمەندى ۇستازى مايرا اپاي مەن قازاقستان ەۆرازيا ۇلتتىق ۋنيۆەرسيتەتىنىڭ پروفەسسور ماعىريپا اپاي ەكەۋى بىرلىكتە شاشۋ شاشتى. فاكۋلتەت دەكانىنىڭ ورىنباسارى، اۋدارماشى بولاش شوكەيوۆ مىرزا قۇتتىقتاۋ ءسوزىن سويلەپ، فاكۋلتەت باسشىسى، پارتيا ياچەيكاسىنىڭ باس سەكراتارى، زەرتتەرمەن مۇحتار ءابىلحاق ۇلى باتا بەردى. كونسەرت بارىسى اسا قىزىقتى ءارى توتەنشە دۋماندى ءوتتى. كونسەرتتە مىڭ بۇرالعان ءبي دە، اسەم اۋەنمەن شىرقالعان ءان دە، قۇيقىلجىعان كۇي دە، كورەرمەندەردىڭ ىشەك - سىلەسىن قاتىرعان قىزىقتى كۇلدىرگى كومەديالار دا بولدى.

　　بۇل كونسەرتتىڭ ەڭ اسەرلى كەزەڭدەرىنىڭ ءبىرى الدا وقۋ بىتىرۋگە تاياعان 2011 - جىلدىق ستۋدەنتتەردىڭ توپتىق حورى بولاتىن، بۇل تەك وقۋ بىتىرەتىن ستۋدەنتتەردىڭ توپتىق حورى عانا ەمەس، انا مەكتەپتەرىندە ورىنداعان، فاكۋلتەتكە دەگەن قيماستىق ىستىق سەزىمىن بىلدىرەتىن، ەندى قايتالانبايتىن، قايتالاۋعا دا كەلمەيتىن، ستۋدەنتتىك شاققا شىنىمەن نۇكتە قوياتىنىن مويىنداتتىراتىن ەڭ ءبىر قيماس، اسەرلى شاعى بولاتىن. وسى قاسيەتتى ۇيادان بۇرىن ۇشقان تۇلەكتەر مۇنى كورىپ وتكەن شاعىن ساعىنا ەسكە السا، «شەتكى اۋىل كوشسە ورتاڭعى اۋىل شەت بولار». دەگەندەي، كەلەر جىلى مەكتەپ بىتىرەتىن دە ستۋدەنتتەرگە دە، جاڭا كەلگەن ستۋدەنتتەرگە دە كوپتەگەن ويلار سالاتىن ەدى.

　　كونسەرتتە تەك قانا قازاق ۇلتىنان شىققان ونەرپازدار عانا ەمەس، تۋىسقان ۇلتتاردان دا ۋاكىلدەر كەلىپ ويىن قويدى، ۇيعۇر ءتىل – ادەبيەت، فيلولوگيا فاكۋلتەتىنىڭ ستۋدەنتتەرى دايىنداعان ءبي ــ «ءماشىراپ» پەن موڭعۇل ءتىل–ادەبيەت، فيلولوگيا فاكۋلتەتىنىڭ ستۋدەنتتەرى دايىنداعان «قوناق قارسى الۋ ءبيى» دە كورەرمەندەردىڭ قىزۋ قارسى الۋىنا بولەنىپ، ٵر ۇلت ستۋدەنتتەرىنىڭ بەرەكەسىن، دوستىعىن ارتتىرۋعا پايداسىن تيگىزدى.

　　كونسەرتتىڭ مازمۇنى باي، ويىن – نومەرلەرى قىزىقتى، ساحناعا شىققان ونەرپازدار دا ءوز ونەرلەرىن اياماي ورتاعا سالسا، كورەرمەندەر دە اسا قىزۋ ىنتامەن ىزەت ءبىلدىرىپ، كونسەرت بارىسى اسا دۋماندى بولىپ، حالقىمىزدىڭ ءاز ناۋرىزعا دەگەن مەرەكەلىك قۇرمەتىن وزىمىزگە دە وزگەلەرگە ە جانە ءبىر قىرىنان تانىتتى.

　　حاباردى جازعان: راپعات ازات ۇلى (ورتالىق ۇلتتار ۋنيۆەرسيتەتى قازاق ءتىل – ادەبيەت، فيلولوگيا فاكۋلتەتى 2012 - جىلدىق ستۋدەنتتى)

　　سۋرەتتى تارتقان: مانەپ ەربول ۇلى

　　كەلۋ قاينارى: حالىق تورابى