قۇلجادا تۇڭعىش كەزەكتى قازاقى ونىمدەر جارمەڭكە بولدى

حابارىن جازىپ، سۋرەتتەرىن تۇسىرگەن باقىتبەك ءجۇمادىل ۇلى 

2016.03.22 14:25   كەلۋ قاينارى : حالىق تورابى

　　ناۋرىزدىڭ 20 - كۇنى قۇلجا قالاسىندا ىلە قازاق اۆتونوميالى وبلىسىنا توتە قاراستى ورىندار بويىنشا تۇڭعىش رەتكى قازاقى ونىمدەر جارمەڭكەسى بولدى.

　　ىلە وبلىسىنداعى قازاق كاسىپكەرلەرى اشقان، جەكەلەر يەلىگىندەگى كاسىپورىنىداردىڭ سەركەسى ەسەپتەلەتىن «ويان حالىقارالىق ساۋدا شەكتى سەرىكتىگى» باس بولىپ، ىلە حالىق راديو ستانسياسى مەن «ىلە قازاق كاسىپورىنشىلار بىرلەستىگىنىڭ» سەلبەسۋىندە وتكىزىلگەن بۇل رەتكى جارمەڭكەگە، ىلە وبلىسىنا توتە قاراستى اۋدان، قالارداعى ۇلكەندى - كىشىلى 68 كاسىپورىن قاتىناسىپ، وزدەرى وندىرگەن، ماركا العان نەمەسە جيناپ ساۋدالاپ وتىرعان مال شارۋاشىلىق قوسىمشا ونىمدەرى، قولونەر بۇيىمدارى، شيكىزاتتىق ونىمدەر سياقتى 100 تۇردەن ارتىق قازاقى جاسىل ءونىمدى جارمەڭكەگە قويدى. ءبىر كۇندىك جارمەڭكەنىڭ ساتىلىم سوماسى 200 مىڭ يۋاننان ارتتى. بۇدان دا ماڭىزدىسى اۋدان قالالارداعى قازاق كاسىپكەرلەرى ءبىر اراعا باس قوسىپ، جۇرتشىلىققا وزدەرىنىڭ ءونىم تۇرلەرىن تانىستىرىپ، ءوزارا تاجىريبە الماستىرپ، قازاقى ونىمدەردىڭ تاۋارلانۋ جولىن كەڭەيتۋ جاعىن قارايلاستىردى.

　　وتە - موتە جارمەڭكە سوڭىنداعى قازاقى ونىمدەرىمىزدىڭ تاۋارلانۋ جولىن كەڭەيتىپ، اۋىل - قىستاق جاستارىنىڭ كاسىپتەنۋ جولىن اشۋدى باستى تاقىرىپ ەتكەن تالقى جيىن ارقىلى، قالىڭ كاسىپكەرلەر ءوز كۇشىمىزگە سۇيەنىپ، قولدا بار قولايلىلىقتان پايدالانىپ، مەملەكەتتىڭ ەكونوميكالىق باعىت - ساياساتتارى نەگىزىندە ۇلتتىق ونىمدەرىمىز بەن كاسىپورىندارىمىزدى ەل ءىشى - سىرتىنا تانىستىرىپ، ۇلكەن بازارلارعا ۇيىستىرۋ، سونىمەن قاتار كاسىپتەنۋ جولىن قارايلاستىرىپ جۇرگەن كەيىنگى بۋىن جاستارعا جول كورسەتىپ، ءبىر بۋىن ەكونوميكاعا جۇيرىك جاستاردى جەتىلدىرىپ شىعارۋ دەگەن ىزگى تىلەك پەن ماقساتقا ايقىن باعدار تاپقانداي بولدى.

　　كەلۋ قاينارى: حالىق تورابى