«كوكتەم كەلدى دە، باقتار گۇلدەدى...»

ماقالاسىن جازىپ، سۋرەتتەرىن تۇسىرگەن: باقىتبەك ءجۇمادىل ۇلى  

2016.03.30 15:45   كەلۋ قاينارى : حالىق تورابى

　　شۇرايلى ىلە اڭعارىندا ءار جىلى ناۋرىز ايىنىڭ ورتا شەنىنەن مامىر ايىنىڭ سوڭىنا دەيىن وي مەن قىردا ورىك شەشەك اتىپ، ىلە - شالا الما اعاشى گۇل اشاتىن «گۇلدى ماۋسىم» باستالادى.

　　جازىق وڭىرلەردەگى ەكپە الما، ورىك ورمانىنان سىرت، بولەكنۇر تاۋىنىڭ كۇن سۇيگەن وڭتۇستىك بەتكەيى مەن ءۇيسىن تاۋى سىلەمىنىڭ تەرىستىك باۋرايىن وسى مەزگىلدە تەگىس گۇل كومكەرەدى. باسى نارات ساحاراسىنان باستالىپ، باتىسى كەڭساي ەتەگىندەگى قورعاس وتكەلى ارقىلى قازاقستان ەلى مەن شەكارالاساتىن ۇلان - بايتاق ولكەنىڭ ەكى جاعىنداعى تاۋلى، ادىرلى جەرلەردىڭ ساي - سالاسىنداعى جابايى الما، ورىك وسى گۇل ماۋسىمىندا جالعاستى شەشەك اتىپ، گۇل اشىپ، دۇيىم ىلە اڭعارى گۇل تەڭىزىنە اينالىپ كەتكەندەي كورىنىس قالىپتاسادى.

　　جۋىق جىلداردان بەرى ىلە اڭعارىنىڭ «گۇل ماۋسىمى» باستالىسىمەن كۇنەس، قۇلجا، قورعاس اۋداندارى ءبىر اپتادان بىرەر ايعا دەيىن جالعاساتىن «ورىك گۇلى ساياحات مەرەكەسىن» دابىرالى وتكىزىپ، الىس جۋىقتان كەلەتىن ساياحاتشىلاردى، فوتو اۋەسكەرلەرىن باۋراپ وتىر. قۇرمەتتى وقىرمان، ءسىز مەيلى كۇنەس اۋدانىنىڭ تۇرگەن اۋىلىنداعى ورىكتى سايعا بارىپ، جالپى كولەمى 35 مىڭ مۋدان اساتىن جابايى ورىك شوعىرلى وسكەن كورىنىس وڭىرىنىڭ توتىداي تۇرلەنىپ، قۇلپىرا گۇل اشقان كورىكتى كەلبەتىن تاماشالاپ، ورىكتى سايداعى العاشقى كوكتەمنىڭ گۇل شىرايىن فوتوعا ءتۇسىرىڭىز، نەمەسە قۇلجا اۋدانىنىڭ بايىرىعى ورىك باقتارىن ارالاڭىز، بارىندە ورىك شەشەگىنىڭ الۋان كۇلتەسى مەن وزىنە ءتان كوركەمدىگىنىڭ سەزىمگە سيلار ءلاززاتى بولەك ەكەنىن سەزىنەسىز. ورىكتى سايدىڭ كوركىن فوتو مەن جەتكىزۋ ءوز الدىنا ۇلكەن تاقىرىپ. تومەندە مەن باقتاعى ەكپە ورىك گۇلىنەن كوزايىم بولۋلارىڭىزعا جاقىندا تۇسىرگەن ءبىر ءبولىم فوتو سۋرەتتەرىمدى ۇسىنىپ وتىرمىن.

　　كەلۋ قاينارى: حالىق تورابى