تەرمە مەكەنىندەگى تەرمە جارىسى

2016.06.24 16:09   كەلۋ قاينارى : حالىق تورابى

　　گۇلميرا داۋلەتبەك قىزى حابارلايدى. ماۋسىمنىڭ 22- ، 23- ماۋسىم كۇندەرى بوز دالانىڭ بۇلبۇلى اتانعان، ونەردىڭ كوگىندە قىران بۇركىتتەي جارق ەتىپ، اعىپ تۇسكەن قازاقتىڭ بۇلبۇل قىزى اسەمقاننىڭ اۋىلى جەتى قابا ءوڭىرى شينجياڭنىڭ ءار جەرىنەن كەلگەن تەرمەشىلەردىڭ ۇنىنە قۇلاق ءتۇردى.

　　اۆتونوميالى رايوندىق ادەبيەت – كوركەمونەرشىلەر بىرلەستىگى جاعىنان ۇيىمداستىرىلعان، قابا اۋداندىق حالىق ۇكىمەتى مەن «مۇرا» جۋرنالى مەكەمەسى ۇستىنە الىپ وتكىزگەن اۆتونوميالى رايوندىق 2 – كەزەكتى تەرمە ورىنداۋ جارىسى، «جۇڭگو قازاق تەرمە مەكەنىندەگى» تۇڭعىش كەزەكتى تەرمە ورىنداۋ باسەكەسى قابا اۋدانىندا وتكىزىلدى.

　　تەرمە جارىسىن وتكىزۋ ارقىلى جاس ۇرپاق تەرمەشىلەردى كوپتەپ تاربيەلەۋگە جٶل سالىپ، ونەردى ولتىرمەي، مۇراگەرلەردى جالعاستىرىپ، حالىققا يدەيالىق، ءتالىم – تاربيە جۇرگىزۋ، سول ارقىلى بۇگىنگى باياشاتتى قوعامدى جىرلاپ، پارتيا مەن ۇكىمەتتىڭ ابزال ساياساتىنا ريزاشىلىعىمىزدى ءبىلدىرىپ، ۇلتتاردىڭ ىنتىماعىن نىعايتىپ، جۇڭگو ارمانىن ىسكە اسىرۋدى بۇل رەتكى قيمىلدىڭ باستى تاقىرىبى بولدى.

　　قيمىلدىڭ كۇن ءتارتىبى بويىنشا 22 – ماۋسىم تۇستەن بۇرىن شينجياڭ تۇڭعىش كەزەكتى قازاق تەرمە ونەرىن قورعاۋ جانە جالعاستىرۋ عىلىمي تالقى جيىنىن اشىپ، جەر – جەردەن كەلگەن تەكتى ونەر تەرمەنى زەرتتەپ جۇرگەن ءبىر توپ ماماندار تەرمەنى دامىتۋ، قورعاۋ جايىندا تالقى وتكىزدى.

　　عىلىمي تالقى جيىنىنا اۆتونوميالى رايوندىق ادەبيەت كوركەمونەرشىلەر بىرلەستىگى پارتگرۋپپاسىنىڭ ورىنباسار شۋجيى، ءتوراعاسى ازات سۇلتان، جۇڭگو فولكلورشىلار قوعامىنىڭ ورىنباسار ءتوراعاسى، اۆتونوميالى رايوندىق ادەبيەت – كوركەمونەرشىلەر بىرلەستىگىنىڭ ورىنباسار ءتوراعاسى، اۆتونوميالى رايوندىق فولكورشىلار قوعامىنىڭ ءتوراعاسى ما شيڭفۋ قاتارلى باسشىلار مەن بەكسولتان كاسەي ۇلى، باعدات ەستەمەس ۇلى، كامۋنا جانبوز ۇلى، توقان سىماعۇل ۇلى قاتارلى ماماندار، اقىن – جازۋشى، زەرتتەۋشىلەر، تەرمەشىلەر بولىپ 100 گە تارتا ادام قاتىناستى.

　　تالقى جيىنىندا اۋدان باسشىلارى قابا اۋدانىنىڭ مادەنيەت سالاسىنداعى تابىستارىن اسىرەسە، «جۇڭگو قازاق تەرمە مەكەنى» اتاعىن الۋ بارىسىنداعى جەتكەن جەتىستىكتەرى مەن ەڭبەكتەرى جايىندا توقتالسا، باعدات ەستەمەس ۇلى، بولات قازەز ۇلى، بولەش قالي ۇلى قاتارلى اقىن – جازۋشىلار، زەرتتەرمەن ماماندار تەرمە ونەرى جايلى عىلىمي ماقالا وقىدى.

　　قابا اۋداندىق پارتكومنىڭ ورىنباسار شۋجيى، اۋدان اكىمى ايدىن تولەۋقان ۇلى مارقۇم اسەمقان عيبادات قىزىنىڭ «بوز دالانىڭ بۇلبۇلى» كەسكىن تاسپاسى مەن اناسىنىڭ سۋرەتىن قىزى اياكوزگە ۇسىندى.

　　«مۇرا» جۋرنالى مەكەمەسىنىڭ باستىعى، باس رەداكتور دالەلبەك قينايات ۇلى قيمىل جٶنىندە بىلاي دەدى:« تەكتى ونەر تەرمەنىڭ تەگەۋرىندى ونەرپازدارى قابا اۋدانىندا ءوسىپ ەرجەتتى، قازاقتىڭ بۇلبۇل قىزى مارقۇم اسەمقان عيبادات قىزى دا قابانىڭ ءتول تۋماسى، اسەمقاننىڭ سالىپ كەتكەن اۋەنى بۇكىل التاي ءوڭىرى ەمەس، بۇكىل قازاق ۇلتىنىڭ ونەر مەكتەبى سانالدى، اسەمقاننىڭ ارتىنان ەرگەن ءبىر توپ ونەردەگى ۇل – قىزى كوپتەپ جەتىلدى.

　　وتكەن جىلى قابا اۋدانى مەملەكەت دارەجەلى «تەرمە مەكەنى» دەگەن داڭىقتى اتاقتى ەنشىلەگەن بولاتىن، وسى تۇرعىدان تەرمە مەكەنىنىڭ رولىن ساۋلەلەندىرۋ ءۇشىن، قابا اۋداندىق پارتكوم مەن ۇكىمەتتىڭ ۇسىنىسى بويىنشا، اۆتونوميالى رايوندىق 2 – كەزەكتى تەرمە ورىنداۋ جارىسى مەن جۇڭگو قازاق تەرمە مەكەنىندەگى تۇڭعىش كەزەكتى تەرمە ورىنداۋ باسەكەسىن قابا اۋدانىندا وتكىزىپ وتىرمىز. بۇل رەتكى تەرمە جارىسى ورەسى جاعىنان، كوركەمدىك جاعىنان، مازمۇنى جاعىنان بولسىن كوز تارتارلىق دارەجەدە ءوتتى دەپ ويلايمىز».

　　شينجياڭنىڭ ءار قايسى جەرىنەن سارالانىپ كەلگەن 28 تەرمەشى جارىسقا قاتىناستى، تەرمە جارىسىنا قاتىناساتىن تەرمەشىلەرگە جارىس باستالاردان بۇرىن تەرمەنىڭ ورىنداۋ شەبەرلىگى، تەكىستى، مازمۇنى جاعىنان ارناۋلى ماماندار جاعىنان لەكسيا سويلەنىپ، تاربيەلەۋ الىپ بارىلدى. ءبىرىنشى كۇنى 28 تەرمەشىدەن 14 تەرمەشى سارالانىپ، سوڭىندا 6 تەرمەشى شەشۋشى جارىسقا قاتىناسىپ، 23 – ماۋسىم كۇنى تەرمە جارىسى ءساتتى اياقتالدى.

　　اۆتونوميالى رايوندىق2 – رەتكى تەرمە جارىسىنىڭ باس بايگەسىن تارباعاتاي ايماعىنىڭ تەرمەشىسى سىمبات ەلتوق قىزى ەنشىلەسە، قابا اۋدانىنان باقىتنۇر ءىلياس قىزى، اقساي اۋدانىنان ايدىنگۇل امەتاقىن قىزى 1 – دارەجەلى سيلىقتى، كوكتوعاي اۋدانىنان ءجازيرا سارقىتبەك قىزى، ىلە وبىلىسىنان باقىتبەك ءشارىپ ۇلى، شينجياڭ قولدانىلمالى تەحنيكا كاسىپتىك مەكتەبىنەن وركەن ەرلان ۇلى 2 – دارەجەلى سيلىقتى، شىڭگىل اۋدانىنان التىنشۋاق تولەگەن قىزى، بۋىرشىن اۋدانىنان باقىتبەك جۇنىسبەك ۇلى، سانجى وبىلىسىنان ءسانيا ونەرقان قىزى، ىلە وبىلىسىنان جايىربەك ورازبەك ۇلى، تارباعاتاي ايماعىنان مۇرات مەيرامقان ۇلى، اقساي اۋدانىنان ورازباي جەكەن ۇلى، تارباعاتاي ايماعىنان بايبولات نۇربولات ۇلى، شينجياڭ قولدانىلمالى تەحنيكا كاسىپتىك مەكتەبىنەن جۇماگۇل بازيتاي قىزى 3- دارەجەلى بايگەنى ەنشىلەپ، 14 تەرمەشى شابىتتاندىرۋ سيلىعىنا يە بولدى.

　　بارلىق جۇرت كۋا بولىپ وتىرعان تەرمە مەكەنىندەگى تەرمە جارىسى ونەرىمىزدىڭ دە شىنايى كوكتەمى تۋعانىن ايعاقتايدى، ءيلايىم حالىقتىق ونەرىمىزدىڭ باعى جانا بەرسىن !