2016 - جىلعى جۇڭگو شينجياڭ ىلە تۇلپارى حالىقارالىق ساياحات مەرەكەسى باستالدى

2016.07.12 14:05   كەلۋ قاينارى : حالىق تورابى

　　حالىق تورابى، 10 – شىلدە، موڭعۇلكۇرە. (ءتىلشى: مانەپ ەربول ۇلى) شىڭدارىن كۇن سۇيگەن، قويناۋىن گۇل كومكەرگەن قاسيەتتى ءتاڭىرتاۋىنىڭ باۋرايىنا ورنالاسقان تۇلپار مەكەنى ــ موڭعۇلكۇرە اۋدانىندا 10 – شىلدە كۇنى تاعى ءبىر ءدۇبىرلى توي باستالدى.

　　2016 - جىلعى جۇڭگو شينجياڭ ىلە تۇلپارى حالىقارالىق ساياحات مەرەكەسىنىڭ اشىلۋ مۇراسىمى 10 - شىلدە تۇستەن بۇرىن موڭعۇلكۇرە اۋدانىنداعى تۇلپار مادەنيەتى ساياحات باقشاسىندا وتكىزىلدى. اشىلۋ مۇراسىمىنا ارنايى كەلگەن باسشىلار مەن سيلى قوناقتار قاتىناستى. ىلە قازاق اۆتونوميالى وبلىستىق پارتكوم شۋجيىنىڭ ورىنباسارى، وبلىس باستىعى قۇرماش سىرجان ۇلى ماڭىزدى ءسوز سويلەپ، 2016 – جىلعى تۇلپار مەرەكەسىنىڭ رەسمي باستالعاندىعىن جاريالادى. اشىلۋ مۇراسىمنا اي بۇرىن دايىندالعان كوركەمونەر ويىندارى مەن ات ويىندارى ەلىمىزدىڭ ءىشى – سىرتىنان كەلگەن قوناقتاردىڭ قىزۋ قارسى الۋىنا بولەندى.

　　اشىلۋ مۇراسىمنان كەيىن، «جىبەك جولى ساۋىتىنا تالاسۋ» بايگەسى، جۇڭگو - كورەيا دوستىق جارىسى، «شينجياڭ ات باپكەرلىگى ساۋىتىنا تالاسۋ» بايگەسى، جۇڭگو ات قوعامىنىڭ مەملەكەتتىك سالتاناتتى ءجۇرىس اتى ساۋىتىنا تالاسۋ بايگەسى وتكىزىلدى. شاشاسىنا شاڭ جۇقپاعان سايگۇلىكتەرىن ءدۇبىرلى دوداعا ارنايى اكەلگەن ات يەلەرى ءبىتىمى مەن شابىسى اسا جاراسىم تاپقان سايگۇلىگىنىڭ ارقاسىندا قوماقتى سيلىقتارعا يە بولىپ، جۇزدەرىنەن قۋانىشتىڭ كۇلكىسى ەستى. تۇستەن كەيىن اۋداندىق شۋەيۋان قوناقجايىنىڭ جيىن زالىندا ىلە قازاق اۆتونوميالى وبلىسىنىڭ جىلقى شارۋاشىلىعىن دامىتۋ تۋرالى اڭگىمە ءماجىلىسى اشىلدى. اڭگىمە ماجىلىسىنە ىلە قازاق اۆتونوميالى وبلىستىق پارتكوم شۋجيىنىڭ ورىنباسارى، وبلىس باستىعى قۇرماش سىرجان ۇلى موڭعۇلكۇرە اۋداندىق پارتكومنىڭ شۋجيى چيان جىفۋ، سونداي – اق، وبلىسقا توتە قاراستى ورىنداردىڭ باسىشىلارى مەن مەملەكەتتىك جىلقى شارۋاشىلىعىنىڭ ماماندارى قاتىناستى. قاتىستى باسشىلار مەن ماماندار وبلىستىڭ جىلقى شارۋاشىلىعىنىڭ قازىرگى دامۋ جاعدايى مەن بولاشاق جوسپارى تۋرالى ءوزارا پىكىر الماستىردى.

　　ساياحات مەرەكەسىنىڭ كەزەكتى كۇن ءتارتىبى بوينشا، 11 – ماۋسىم كۇنى ىلە تۇلپارىن تانۋ قيمىلى، تۇڭعىش كەزەكتى سىمباتتى ىلە تۇلپارىن سارالاۋ باسەكەسى وتكىزىلدى. مۇندا سىمباتتى ىلە تۇلپارىن سارالاۋدى ۇيىمداستىرۋ القاسى شاقىرعان ءادىلقازىلار القاسى مەن كورەرمەندەر بىرلىكتە داۋىس بەرۋ جولىمەن باعالادى. ىلە – شالا 1000 مەترلىك بايگە، 3000 مەترلىك بايگە، 10000 مەترلىك بايگە، 1500 مەترلىك بايگە، 3600 مەترلىك جورعا بايگەسى قاتارلى قىزىقتى جارىس تۇرلەرى الاڭدى وزگەشە كۇيگە بولەدى.

　　تورقالى تويدىڭ ءۇشىنشى كۇنى، ياعني، 12 – شىلدە كۇنى تۇستەن بۇرىن تۇلپارلاردىڭ تىزگىن بوس سالىپ، كەڭىنەن كوسىلە شاباتىن ون مىڭ كيلومەترلىك بايگە، ون بەس كيلومەترلىك بايگە وتكىزىلدى. بايگە دەسە ۇيدە وتىرىپ تاقىمىن قساتىن ات سۇيەر جاندار الاڭعا ەرتە كەلىپ «مىڭنان ءبىرى» شىعاتىن كوزايىم ساتكە كۋا بولىپ قايتتى.

　　بىرەۋلەر الامان دوداعا ارنايى باپتاعان تۇلپارلارىن بايگەگە سالىپ، كومەدەن كورۋگە اسىقسا، «الاشتىڭ اتى وزعانشا، اۋىلداستىڭ تايى وزسىن» دەسكەن تۇلپار يەلەرىنىڭ كورشى قولاڭدارى دا تۇلپارلار سوڭعى كومبەگە جەتكەنشە ايعايلاپ دەم بەردى. ىشكى ولكەدەن كەلگەن ساياحاتشىلار ات جالىندا ويناعان شاباندوزدار مەن بىرىنەن –ءبىرى وزا شاپقان تۇلپارلاردىڭ شابىسىنا تاڭداي قاعىسىپ، تاڭ قالىپ قايتسىپ جاتتى.

　　ۇعىسۋىمىزشا، بۇل رەتكى ساياحات مەرەكەسىنىڭ سوڭى قازاقستان، قىرعىزستان قاتارلى كورشلەس ەلدەردەن كەلگەن تۇلپارلاردىڭ باعى مەن بابىن، ازاماتتاردىڭ قارىمى مەن جالىنىن سىنايتىن حالىقارالىق ات ۇستى اۋدارىسپاق جارىسى، 2016 – جىلعى 2 - كەزەكتى جۇڭگو شينجياڭ موڭعۇلكۇرە ۆلەسيپەد جارىسى سياقتى الۋان مازمۇنداعى قيمىلدارعا ۇلاسىپ، ءبىر ايعا تاياۋ جالعاسادى.

　　كەلۋ قاينارى: حالىق تورابى